RFE/RL: ევროკავშირის საბჭო ქართული დიპლომატიური პასპორტებისთვის უვიზო მიმოსვლის შეჩერებას იწყებს
დიპლომატიური პასპორტებისთვის უვიზო მიმოსვლა
“რადიო თავისუფლების” ინფორმაციით, ევროკავშირის საბჭომ ევროკომისიას ოფიციალური წინადადების მომზადება დაავალა ქართული დიპლომატიური პასპორტებისთვის უვიზო მიმოსვლის გაუქმების შესახებ.
მათივე ცნობით, ევროკავშირის საბჭოში ამას მხარი დაუჭირა კვალიფიციურმა უმრავლესობამ, ევროკომისიამ კი უკვე დაიწყო საკითხზე მუშაობა და შესაბამის დოკუმენტს უახლოეს დღეებში მოამზადებს.
ევროკავშირის საგარეო საქმეთა მინისტრების დღევანდელ სხდომაზე ევროკავშირის წევრი სახელმწიფოების მინიმუმ 55%, რომლებიც წარმოადგენენ მოსახლეობის მინიმუმ 65%-ს, მხარი დაუჭირა ქართული დიპლომატიური პასპორტებისთვის უვიზო მიმოსვლის პროცედურის წამოწყებას.
ბრიუსელში ევროკავშირის საგარეო საქმეთა მინისტრების შეხვედრა კვლავ გრძელდება, თუმცა მინისტრებმა უკვე დაასრულეს მსჯელობა საქართველოს შესახებ. საბჭოს შეხვედრის დასრულების შემდეგ, ჩატარდება ოფიციალური პრესკონფერენციაც.
გამოცემა Politico-ს თანახმად, აღნიშნულ გადაწყვეტილებას ლობირებდა ევროკავშირის უმაღლესი წარმომადგენელი საგარეო და უსაფრთხოების საკითხებში, კაია კალასიც, რომელიც ევროკავშირის საგარეო ურთიერთობათა საბჭოს თავმჯდომარეცაა.
თუმცა ამის წინააღმდეგი არიან უნგრეთი და სლოვაკეთი.
მანამდე, რადიო თავისუფლების ევროპული ბიუროს უფროსი რიკარდ იოზვიაკი ევროკავშირის უფროს ოფიციალური პირზე დაყრდნობით X-ზე წერდა, რომ 16 დეკემბერს “საქართველოს შესახებ ბლოკის საგარეო მინისტრებს შორის განხილვა იქნება და “შესაძლო ახალ ზომებს მიიღებენ””.
დღეს, 16 დეკემბერს, იოზვიაკმა გაავრცელა ინფორმაცია, რომ EU საქართველოს ოფიციალურ პირებს სანქციებს არ დაუწესებდა, მაგრამ, სავარაუდოდ, დიპლომატიური პასპორტების მქონე პირებს ვიზალიბერალიზაცია შეუჩერდებოდათ.
15 დეკემბერს ესტონეთმა “ქართული ოცნების” რეჟიმის დამატებით 14 პირს დაუწესა სანქციები. ესტონეთის საგარეო საქმეთა მინისტრის თქმით, სანქცირებულთა შორის არის პრემიერმინისტრი ირაკლი კობახიძე.
ასევე, ლიეტუვამ კიდევ 17 ქართველ პოლიტიკოსს, მათ შორის პრემიერ-მინისტრ ირაკლი კობახიძეს სანქციები დაუწესა, – ამის შესახებ ლიეტუვის საგარეო საქმეთა მინისტრი, კიასტუსის ბუდრისი სოციალურ პლატფორმა X-ზე წერს.
„ლიეტუვა ქართველი ხალხის და მათი ევროპული ოცნების გვერდით დგას. ესტონეთთან კოორდინაციით, ჩვენ გავაფართოვეთ სანქცირებული ქართველი პოლიტიკოსების სია კიდევ 17 პირის დამატებით, მათ შორისაა პრემიერ-მინისტრი ირაკლი კობახიძე“, – წერს ლიეტუვის საგარეო საქმეთა მინისტრი.
5 დეკემბერს კი უკრაინის პრეზიდენტმა ვოლოდიმირ ზელენსკიმ “ქართული ოცნების” ხელისუფლებისთვის სანქციების დაწესების ბრძანებას ხელი მოაწერა. ამის შესახებ ვოლოდიმირ ზელენსკიმ ვიდეომიმართვაში ისაუბრა. ზელენსკის თქმით, სანქციები მიმართულია ხელისუფლების იმ ნაწილის მიმართ, რომელიც “საქართველოს პუტინს გადასცემს”.
