დეპუტატ კობა კობალაძის შვილს, რომელიც მედიაში გასული ანონსის შემდეგ დააკავეს, ბრალი წაუყენეს

პარლამენტში “ქართული ოცნების” დეპუტატის, კობა კობალაძის შვილს, დავით კობალაძეს, რომელსაც გამოძიება 24 ივნისს, 5 თანამზრახველთან ერთად ახალგაზრდა მამაკაცის ცემას და მისთვის მძიმე დაზიანებების მიყენებას ედავება, ბრალი დანაშაულის ჩადენიდან 17 დღის შემდეგ წაუყენეს – მას შემდეგ, რაც ამ დანაშაულის შესახებ ინფორმაცია მედიაში გავრცელდა. 

გამოძიება დავით კობალაძის წინააღმდეგ სისხლის სამართლის კოდექსის 126-ე მუხლით დაიწყო, რაც ჯგუფურ ძალადობას გულისხმობს. 

პროკურატურის ინფორმაციით, კობალაძე და მასთან ერთად მყოფი კიდევ 5 ადამიანი, შურისძიების მიზნით, თავს დაესხა 23 წლის ახალგაზრდა მამაკაცს და სცემა. 6 თავდამსხმელიდან ოთხი 23 წლის ახალგაზრდას ფიზიკურად გაუსწორდა, ორმა კი დაზიანებები ცივი იარაღით მიაყენა.

მიყენებული დაზიანებების გამო ახალგაზრდა საავადმყოფოში გადაიყვანეს. ფარულ ინტერვიუში, რომლის კადრებიც “ტვ პირველმა” გაავრცელა, დაშავებული ახალგაზრდის მამა ამბობს, რომ  მის შვილს მძიმე დაზიანებები თავის არეშიც აქვს მიყენებული. 

ამ დანაშაულის შესახებ სიუჟეტი ტელეკომპანია “პირველის” ეთერში 11 ივლისს გავიდა. სიუჟეტის ეთერში გასვლამდე გადაცემის წამყვანმა, ნოდარ მელაძემ განაცხადა, რომ 10 ივლისს, გვიან ღამით, მას შემდეგ რაც ეთერში გადაცემის ანონსი გავიდა, მას კობა კობალაძე დაუკავშირდა და სთხოვა, რომ სიუჟეტი ეთერში არ გაეშვა, რაზეც მან უარი განაცხადა. 

ამის შემდეგ, 11 ივლისს, კობა კობალაძე პოლიციის განყოფილებაში შვილთან, დავით კობალაძესთან ერთად მივიდა.  

“ჩემი შვილი და მე ერთად გამოვცხადდით განყოფილებაში. მილიონი რაღაცაა აგორებული მასზე. ჩატარდება კონკრეტული საგამოძიებო მოქმედებები და რეალურად, სამართლებრივი შეფასება მიეცემა ამას. არც არავის ვაფარებთ ხელს და არც უდანაშაულობას დანაშაულად არ ვიზამთ. ბავშვი არის სპორტსმენი, ჯანმრთელი, ამბავი… არ ვიცი, გაერკვევიან”, – ამბობს კობალაძე.

დავით კობალაძე 20 წლისაა. 

• გიორგი შაქარაშვილის საქმე: 17 დაკავებული და არც ერთი ბრალდებული. რა არის ცნობილი ამ დროისთვის

მისი ადვოკატის ინფორმაციით, ამჟამად ის დაკავებულია. დაკავებულია ამ დანაშაულში მონაწილე კიდევ 6 ახალგაზრდა.

გადაცემის ანონსის გასვლის შემდეგ შსს-მ დავით კობალაძის ორივე თანამზრახველი დააკავა და განცხადებაც გაავრცელა. განცხადებაში აღნიშნულია, რომ ამ ადამიანების დაკავების გადაწყვეტილება “ტვ პირველის” ეთერში გასული ანონსის შემდეგ მიიღეს, რადგან “მათი მიმალვის” საფრთხე შეიქმნა, დავით კობალაძე კი პოლიციაში თვითონ მივიდა.  

გარდა ამისა, შსს-ს ინფორმაციით, 23 წლის ახალგაზრდისთვის მიყენებული დაზიანების ფაქტზე გამოძიება ვაკე-საბურთალოს მთავარი სამმართველოს პოლიციის მე-7 სამმართველოში, 24 ივნისს, დანაშაულის ჩადენის დღესვე დაიწყო.

სამი დაკავებულის წინააღმდეგ გამოძიება ჯანმრთელობის განზრახ მძიმე დაზიანების მუხლით მიმდინარეობს, ორ დაკავებულს კი შსს ძალადობას და ცივი იარაღის ტარებას ედავება.