ცესკო-მ 2020 წლის არჩევნების შედეგები შეაჯამა. პარლამენტი მაქსიმუმ ათ დღეში შეიკრიბება
ცესკო-მ საქართველოს პარლამენტის 2020 წლის 31 ოქტომბრის არჩევნების საბოლოო შედეგები შეაჯამა. საკანონმდებლო ორგანო არჩევნების შედეგების შეჯამებიდან მაქსიმუმ მეათე დღეს გამართავს პარლამენტის პირველ სხდომას.
ცესკოს სხდომა დაწყებამდე დატოვეს ცესკოს ოპოზიციონერმა წევრებმა – „ერთიანი ნაციონალური მოძრაობის“, „პატრიოტთა ალიანსის“ და „ევროპული საქართველოს“ წევრებმა – დავით კირთაძემ, ხათუნა სხირტლაძემ და დავით გურგენიძემ.
მათ განაცხადეს, რომ გაყალბებული და დარღვევებით ჩატარებული არჩევნების დამტკიცებაში მონაწილეობას არ მიიღებენ. დავით გურგენიძემ დარბაზიდან გასვლის წინ ცესკოს ლოგოს მიაკრა ფურცელი წარწერით: „არჩევნები გაყალბებულია“.
● საქართველოს ერთპარტიული პარლამენტი: შეძლებს თუ არა იგი სრულფასოვნად მუშაობას
შემაჯამებელი ოქმის თანახმად, ამომრჩეველთა საერთო რაოდენობამ შეადგინა 3 511853. პროპორციული საარჩევნო სისტემით ჩატარებულ არჩევნებში მონაწილეობა მილიონ 992 891-მა ამომრჩეველმა მიიღო.
წარმოდგენილი შედეგებით, ყველაზე მეტი მანდატი მე-10 მოწვევის პარლამენტში „ქართული ოცნების“ და „ნაციონალური მოძრაობის“ პარტიებმა მიიღეს.
საბოლოოდ შედეგები ასე განაწილდა:
● 41 „ქართული ოცნება – დემოკრატიული საქართველო“ – 48, 22%, მიღებული მანდატების რაოდენობა – 60
● 5 ბლოკი „ერთიანი ნაციონალური მოძრაობა“ გაერთიანებული ოპოზიცია „ძალა ერთობაშია“ – 27,18%, მიღებული მანდატების რაოდენობა – 36
● 2 ბაქრაძე, უგულავა, ბოკერია „ევროპული საქართველო“ მოძრაობა თავისუფლებისთვის“ – 3,79%, მიღებული მანდატების რაოდენობა – 5
● 56 „ლელო“ – 3,15%, მიღებული მანდატების რაოდენობა – 4
● 27 ბლოკი გიორგი ვაშაძე სტრატეგია აღმაშენებელი“ – 3,15%, მანდატების რაოდენობა – 4.
● 8 – დავით თარხან მოურავი/ირმა ინაშვილი „პატრიოტთა ალიანსი“ – 3,14%, მიღებული მანდატების რაოდენობა – 4.
● 36 „გირჩი – 2,89%, მანდატების რაოდენობა – 4
● 24 „ალეკო ელისაშვილი – მოქალაქეები“ – 1,33%, მიღებული მანდატების რაოდენობა – 2
● 10 შალვა ნათელაშვილი „საქართველოს ლეიბორისტული პარტია“ – 1%, მიღებული მანდატების რაოდენობა – 1
რაც შეეხება მაჟორიტარული სისტემით ჩატარებულ არჩევნებს, 30-ვე მაჟორიტარულ საარჩევნო ოლქში პარლამენტის მაჟორიტარ წევრებად არჩეული არიან „ქართული ოცნება – დემოკრატიული საქართველოს” მიერ წარდგენილი კანდიდატები.
არჩევნების შედეგები ბათილად იქნა ცნობილი და განმეორებითი კენჭისყრა არ გამართულა #11 მაჟორიტარულ საარჩევნო ოლქის 46-ე უბანზე.
სხდომის პარალელურად, ხმაური იყო ცესკოს შენობასთან, სადაც აქცია-პერფორმანსი მიმდინარეობდა. იქ ვითარება რამდენჯერმე დაიძაბა. ადგილზე იმყოფებოდა საპატრულო პოლიციის რამდენიმე ეკიპაჟი. სამოქალაქო აქტივისტები შენობაში შესვლას ცდილობდნენ, რისი საშუალებასაც მათ პოლიციამ არ მისცა.
აქტივისტების თქმით, მათ ცესკო-ს შენობაში კარტოფილის შეტანა სურდათ, რომელიც სიმბოლურად მოპარულ არჩევნებს გამოხატავს.
ამასთან, აქციაზე მოქალაქეებმა ტრანსფარანტი დაწვეს წარწერით: “შემაჯამებელი ოქმი”, რითაც კომისიის მიერ შემაჯამებელი ოქმის მიღება გააპროტესტეს.
