ბოლნისის სოფელ გეტაში კარანტინი გაუქმდა

ბოლნისის მუნიციპალიტეტის სოფელ გეტაში, რომელიც კორონავირუსის პანდემიის გავრცელების მაღალი რისკის გამო 15 მაისიდან ჩაკეტილი იყო, კარანტინი გაუქმდა. 

15  ივნისის მონაცემებით, საქართველოში კორონავირუსით ინფიცირების 879 შემთხვევაა დადასტურებული. კარანტინის რეჟიმშია 2710 ადამიანი, ხოლო სტაციონარში მეთვალყურეობის ქვეშ – 267 პირი. კორონავირუსით ინფიცირებულთაგან 704 გამოჯანმრთელდა და 14  გარდაიცვალა.

ბოლო 2 კვირის განმავლობაში გეტაში კორონავირუსით დაინფიცირების ახალი შემთხვევა აღარ გამოვლენილა. 

ამ დროისთვის მკაცრი კარანტინი მთელი საქართველოს მასშტაბით ბოლნისის მუნიციპალიტეტის მხოლოდ ერთ სოფელში – მუშევანში მოქმედებს. 

• როგორი იქნება ტურიზმი კორონავირუსის შემდეგ. საქართველო ტურისტების მისაღებად ემზადება
• პირბადე, დამცავი ფარი და უკონდიციონერობა. 6 ივლისს საქართველოში ეროვნული გამოცდები იწყება
• ვირუსის აფეთქება სომხეთში – მიზეზები და დასკვნები საქართველოსთვის

ბოლნისის მუნიციპალიტეტში კორონავირუსით სულ 180 ადამიანი დაინფიცირდა.

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. კორონავირუსის პანდემიის შესაჩერებლად 21 მარტიდან 23 მაისამდე საქართველოში საგანგებო მდგომარეობა იყო გამოცხადებული. 

კორონავირუსის პანდემიის გამო დაწესებული შეზღუდვების მოხსნის პირველი ეტაპი საქართველოში 27 აპრილიდან ამოქმედდა.15 ივნისიდან საქართველოში შიდა ტურიზმი განახლდა. 1 ივლისიდან კი ქვეყანა საზღვრების გახსნას და უცხოელი ტურისტების მიღებას გეგმავს.