"ცეცხლის წვიმა" და "კოლექტიური ნაცმოძრაობის გასამართლება" - ოცნებამ ივანიშვილის წერილი გამოაქვეყნა
ბიძინა ივანიშვილის წერილი
“ქართული ოცნება” პირველ ოქტომბერთან დაკავშირებით, პარტიის საპატიო თავმჯდომარის, ბიძინა ივანიშვილის წერილს აქვეყნებს, სადაც ის “ცეცხლის წვიმით” გვაშინებს და “კოლექტიური ნაცმოძრაობის გასამართლებით” იმუქრება.
2012 წლის პირველ ოქტომბერს, როდესაც საპარლამენტო არჩევნებში “ქართულმა ოცნებამ” პირველად გაიმარჯვა, ივანიშვილი ვრცელ წერილში თავისუფლების დაბრუნების დღედ მოიხსენიებს და წერს, რომ ოცნების ხელისუფლებას “ბეწვის ხიდზე უწევს სიარული, რათა გარე თუ შიდა მტრების” მხრიდან მუდმივად რევოლუციების მოწყობისა და ქვეყნის არევის მცდელობის რეჟიმში, ქვეყანაში “უწყვეტი მშვიდობა შევინარჩუნოთ და არ დავუშვათ” ის, რაც “ჩვენს” მეზობელ უკრაინაში ხდება, ის, რაც 2008 წელს “გამოვიარეთ”.
მმართველი პარტიის საპატიო თავმჯდომარე კვლავ საკონსტიტუციო უმრავლესობის მოპოვებაზე აკეთებს აქცენტს და უმრავლესობის მოპოვების შემთხვევაში უკვე ნაცნობ 4 დაპირებას იმეორებს:
● ნაცმოძრაობის გასამართლება
● ქვეყნის გაერთიანება
● ოჯახის სიწმინდის დაცვა
● ეკლესიის როლის გაძლიერება
“ჯერ არაკონსტიტუციურად გამოცხადდეს, ხოლო შემდეგ კანონის მთელი სიმკაცრით გასამართლდეს კოლექტიური ნაციონალური მოძრაობა, რეჟიმი, რომელმაც საკუთარ მოსახლეობას ტერორი, მკვლელობა, წამება არ აკმარა და ომის ქარ-ცეცხლი დაატეხა თავს;
იმისთვის, რომ საქართველოს — ჩვენი ხალხის მიერ არჩეული ხელისუფლება მართავდეს და არა უცხო ძალების აგენტებით დაკომპლექტებული კოლექტიური „ნაციონალური მოძრაობა“;
იმისთვის, რომ ერთად ავისრულოთ დიდი ხნის ნატვრა და მშვიდობის გზით, შერიგებისა და ურთიერთშენდობის საფუძველზე, კვლავაც გაერთიანებული ვიხილოთ ჩვენი სამშობლო;
იმისთვის, რომ სამუდამოდ დავასრულოთ ოჯახის, ეროვნულობის, რწმენის შეურაცხყოფის და დაკნინების მუდმივი მცდელობები და მართლმადიდებლური ეკლესიის დამოუკიდებლობის, მისი გაძლიერების და დაცვის მიზნით, კონსტიტუციაში ავსახოთ მართლმადიდებლური ეკლესიის, როგორც საქართველოს სახელმწიფოს თვითმყოფადობის საყრდენის როლი!
ასე რომ, 26 ოქტომბერს, დღის წესრიგში არა პოლიტიკური სიმპათია-ანტიპათიის, არამედ საქართველოს ყოფნა — არ ყოფნის საკითხი დგას!” — ნათქვამია ივანიშვილის წერილში
2012 წლის 1 ოქტომბერს “ქართულმა ოცნებამ” საპარლამენტო არჩევნები მოიგო, შეცვალა “ნაციონალური მოძრაობა” და ქვეყნის სათავეში მოვიდა.
ივანიშვილი პოლიტიკაში სამჯერ დაბრუნდა. ამჯერად ის პარტიის საპატიო თავმჯდომარის პოსტს იკავებს, ხელისუფლების უმაღლესი წარმომადგენლები კი მხოლოდ მასთან კონსულტაციის შემდეგ იღებენ მნიშვნელოვან გადაწყვეტილებებს – პრეზიდენტის და პრემიერ-მინისტრის კანდიდატურებსაც ივანიშვილი არჩევს.
ივანიშვილი ერთადერთი ქართველი ბიზნესმენია, რომელიც ფორბსის მსოფლიოს მილიარდერების სიაშია. მისი ქონება 2024 წლის მონაცემებით 7.4 მილიარდი დოლარია. შედარებისთვის, მისი ქონება 2019 წელს 4.9 მილიარდი დოლარი იყო.
