ბიძინა ივანიშვილის ქონება 25 მილიონი დოლარით შემცირდა

Bloomberg-ის მონაცემებით, საქართველოს ყოფილი პრემიერ-მინისტრის, ბიძინა ივანიშვილის ქონება წელს 25 მილიონი დოლარით, 5 მლრდ 450 მლნ დოლარამდე შემცირდა. Bloomberg-ის უმდიდრესი ადამიანების რეიტინგში ივანიშვილი ამჟამად 410-ე ადგილზეა.

ბიძინა ივანიშვილი მმართველი პარტიის – “ქართული ოცნება – დემოკრატიული საქართველოს” თავმჯდომარეა. 2012-2013 წლებში ის საქართველოს პრემიერ-მინისტრი იყო. 

ბიძინა ივანიშვილი ამავე დროს ქვეყნის ყველაზე მდიდარი ადამიანია. Forbes-ის მონაცემებით, ის $4.8-მილიარდიანი კაპიტალით მსოფლიოს 500 ყველაზე მდიდარ ადამიანთა სიაში 349-ე ადგილზეა. 

• კავშირი რუსეთის მთავრობასთან, დასავლური ბიზნესის შევიწროება – რას წერენ სენატორები აშშ-ს სახელმწიფო მდივანს

• რუსი ოლიგარქის, ივანიშვილის მოსვლის შემდეგ საქართველომ რეგრესი განიცადა – კონგრესმენების წერილი მაიკ პომპეოს

• დიდი ხეები – მილიარდერის უკანასკნელი ცდუნება. როგორ ცვლის ბიძინა ივანიშვილი ლანდშაფტს. რეპორტაჟი შავი ზღვისპირეთიდან

ივანიშვილმა ქონების დაგროვება პოსტსაბჭოთა რუსეთში, გასული საუკუნის 90-იან წლებში დაიწყო. მას ბიზნესი ჰქონდა საბანკო სფეროში, უძრავ ქონებაში, ფოლადისა და რკინის წარმოებაში. 

ივანიშვილმა აქტივების დიდი ნაწილი 2003-2006 წლებში გაყიდა. აქვს ძვირადღირებული ნახატების დიდი კოლექცია. 

მასზე ხშირად წერს საერთაშორისო მედია. მისი სახელი ამოტივტივდა “Panama Papers”- ის სკანდალური დოკუმენტების გამოქვეყნების დროსაც. 

ბიძინა ივანიშვილმა stopcov ფონდში, რომელიც საქართველოს მთავრობის ინიციატივით კორონავირუსთან ბრძოლის მიზნით შეიქმნა და სადაც თანხებს ცალკეული ადამიანები და ბიზნეს-კომპანიები რიცხავენ, წელს 100 მლნ ლარი ჩარიცხა. 

ბიძინა ივანიშვილი 64 წლისაა, ჰყავს მეუღლე, ოთხი შვილი და შვილიშვილი.