BBC: 9 აპრილს ათასობით დემონსტრანტმა ქვეყნის ხელისუფლებისადმი მზარდი წინააღმდეგობის ფონზე აქცია გამართა

ჯემნიუსი

თბილისი

BBC აპრილის აქციაზე

BBC 9 აპრილს “ნაციონალური მოძრაობის” ორგანიზებით გამართულ აქციას სტატიით ეხმაურება, სადაც წერს, რომ ათასობით დემონსტრანტმა კვირას, საქართველოს პარლამენტის წინ, ქვეყნის ხელისუფლებისადმი მზარდი წინააღმდეგობის ფონზე აქცია გამართა. გამოცემის ცნობით, აქციის მონაწილეები მმართველ პარტიას რუსეთის ზეწოლის ქვეშ ყოფნაში, დემოკრატიიდან უკანდახევაში, ოპონენტების დაკავებასა და დამოუკიდებელი მედიის ჩახშობაში ადანაშაულებენ.

სტატიაში საუბარია საქართველოს მესამე პრეზიდენტის, მიხეილ სააკაშვილის პატიმრობაზეც და აღნიშნულია, რომ “სააკაშვილი, რომელიც ორი ვადით იყო პრეზიდენტი 2004-დან 2013 წლამდე”, ამჟამად იხდის ექვსწლიან პატიმრობას უფლებამოსილების ბოროტად გამოყენებისთვის, თუმცა, გამოცემის თქმით, საერთაშორისო უფლებადამცველმა ჯგუფებმა დაგმეს მისი დაპატიმრება და პოლიტიკურად მოტივირებულად მიიჩნიეს.

“აქცია მთავარი ოპოზიციური პარტიის მიერ, პატიმრობაში მყოფი ყოფილი პრეზიდენტის მიხეილ სააკაშვილის მხარდასაჭერად გაიმართა.” – წერია სტატიაში.

BBC ასევე ამბობს, რომ აქციის მონაწილეებმა თბილისში, პარლამენტის შენობის წინ საქართველოს, უკრაინისა და ევროკავშირის დროშები აწიეს და უზარმაზარი ბანერი, რომელზეც ეწერა: “ევროპული მომავლისთვის”.

“საზოგადოება საქართველოში ევროკავშირში გაწევრიანების მომხრეა. მთავრობა ამბობს, რომ ქვეყნის ბლოკში გაწევრიანების წინადადების ერთგული რჩება, მაგრამ ოპონენტები ამბობენ, რომ მათი ქმედებები ზიანს აყენებს საქართველოს [ევროკავშირში] გაწევრიანების შანსს” – წერს გამოცემა.

● ვინ არიან ფრანკლინელები და რას ერჩის მათ ხელისუფლება
● რა გეგმა აქვს ოპოზიციას ხელისუფლების შესაცვლელად?
● Foreign Affairs: რუსეთი საქართველოში იმარჯვებს

“ერთად ევროპაში” – რუსთაველის გამზირზე ნაციონალური მოძრაობის ორგანიზებით 9 აპრილს აქცია გაიმართა.

აქცია სამი ჰიმნით გაიხსნა – საქართველოს, ევროკავშირის და უკრაინის, მთავარი მოთხოვნები კი ის იყო, რომ ქვეყანამ მიიღოს ევროკავშირის წევრობის კანდიდატის სტატუსი და პოლიტპატიმრები გათავისუფლდნენ, რომელშიც მოიაზრებიან “მთავარი არხის” გენერალური დირექტორი, ნიკა გვარამია, საქართველოს მესამე პრეზიდენტი, მიხეილ სააკაშვილი და ლაზარე გრიგორიადისი, რომელიც 29 მარტს დააკავეს. შსს-ს მტკიცებით, მან 7-9 მარტის აქციებზე პოლიციელებს ქვები და ე.წ. მოლოტოვის კოქტეილები ესროლა. 31 მარტს სასამართლომ ლაზარე გრიგორიადისს აღკვეთის ღონისძიების სახით პატიმრობა შეუფარდა.

აქციის გამართვასთან დაკავშირებით, ნაციონალური მოძრაობის თავმჯდომარემ, ლევან ხაბეიშვილმა 14 მარტს ბრიფინგზე დააანონსა და ქართულ ოცნებას 12 რეკომენდაციის შესასრულებლად 9 აპრილამდე დრო მისცა.