ჯო ბაიდენის თანაშემწე: (ივანიშვილის სანქცირების) ყველა შესაძლო ვარიანტი მაგიდაზეა
ბაიდენის თანაშემწე ივანიშვილის სანქცირებაზე
აშშ-ის პრეზიდენტის ჯო ბაიდენის სპეციალურმა თანაშემწემ და ეროვნული უშიშროების საბჭოს ევროპის მიმართულების უფროსმა მაიკლ კარპენტერმა “გლობალნიუსთან” ინტერვიუში საქართველოში ვითარებაზე ისაუბრა და განაცხადა, რომ აშშ-მა უკვე გადადგა ნაბიჯები და არ გამორიცხა შემდგომი ზომების მიღება, სანქციების ჩათვლით, “რათა პასუხი გაეცეთ იმას, რასაც საქართველოში ახლა ვხედავთ”.
“ბოლო რამდენიმე თვის განმავლობაში, საქართველოში განვითარებული მოვლენების საპასუხოდ, ჩვენ მთელი რიგი ზომები გავატარეთ და ეს მოხდა იმ მიმდინარე საპროტესტო აქციებამდე, რაც ევროკავშირთან მოლაპარაკების გახსნის შეჩერებას მოჰყვა.
მას შემდეგ, რაც უცხოური გავლენის შესახებ კანონის მიიღეს და სამოქალაქო საზოგადოების შევიწროებისა და დაშინების მიზნით სხვადასხვა ღონისძიებები გაატარეს, ჩვენ გადავდგით ნაბიჯები საქართველოს მთავრობისთვის დახმარების შესაჩერებლად. ეს გახლავთ 95 მილიონი დოლარის ოდენობის დახმარება, რაც ამჟამად შეჩერებულია.
ცოტა ხნის წინ კი, შევაჩერეთ სტრატეგიული პარტნიორობაც. ასევე, სხვადასხვა ინსტიტუციის წარმომადგენელ ქართველ ათობით მაღალჩინოსანზე სანქციები დავაწესეთ სავიზო შეზღუდვის პოლიტიკის ფარგლებში. ასე რომ, ჩვენ უკვე გადავდგით ნაბიჯები და არ გამოვრიცხავთ შემდგომი ზომების მიღებას სანქციების ჩათვლით, რათა პასუხი გავცეთ იმას, რასაც საქართველოში ახლა ვხედავთ”, – თქვა კარპენტერმა.
ბიძინა ივანიშვილის შესაძლო სანქცირებაზე დასმული კითხვის პასუხად ის ამბობს, რომ სხვადასხვა ვარიანტს განიხილავენ:
“ახლა არ ვაპირებ სანქციებთან დაკავშირებით წინასწარი განცხადება გავაკეთო, მაგრამ როგორც უკვე აღვნიშნე, იმ შემზარავი ძალადობის პასუხად, რასაც საქართველოში ვადევნებთ თვალს, ჩვენ სხვადასხვა ვარიანტს განვიხილავთ, რათა პასუხისმგებელ პირებს შესაბამისი პასუხისმგებლობა დავუწესოთ. ყველა შესაძლო ვარიანტი მაგიდაზე დევს.” – ამბობს ის.
სანქციებზე გუშინ აშშ-ის სახელმწიფო მდივანმა ენტონი ბლინკენმაც მიუთითა. ქართულ თემაზე მომუშავე ჟურნალისტი ალექს რაუფოღლუ, აშშ-ს სახელმწიფო მდივნის, ენტონი ბლინკენის კომენტარს ავრცელებს, რომელშიც ვკითხულობთ, რომ შეერთებული შტატები ემზადება მათ ხელთ არსებული ინსტრუმენტების გამოსაყენებლად, მათ შორის სანქციებისთვის.
მანამდე საქართველოში მიმდინარე პოლიტიკურ მოვლენებთან დაკავშირებით, ამერიკის შეერთებული შტატების ჰელსინკის კომისიის თავმჯდომარემ, ჯო უილსონი საგანგებო განცხადება გაავრცელა.
ჯო უილსონი სახელმწიფო დეპარტამენტს და ევროპულ მოკავშირეებს მოუწოდებს, თბილისის მერს, შინაგან საქმეთა მინისტრსა და “რეპრესიების ორგანიზებაზე პასუხისმგებელ ყველა პირს” პერსონალური სანქციები დაუწესონ.
“აშშ-ის სახელმწიფო დეპარტამენტმა უნდა დაუწესოს პერსონალური სანქციები თბილისის მერს, შინაგან საქმეთა მინისტრს და ყველა სხვა ოფიციალურ პირს, ვინც პასუხისმგებელია ამ [აქციის დაშლის] ორგანიზებაზე. მოვუწოდებ ევროპელ მოკავშირეებს, იგივე გააკეთონ.” – ამბობს უილსონი.
