აზერბაიჯანში ყარაბაღის მიმართულებით ავტობუსების მარშრუტების გახსნის შესახებ განაცხადეს
24 იანვარს, ავტობუსებით პირველი სამგზავრო რეისები განხორციელდება ბაქო-შუშისა და ბაქო-აღდამის მიმართულებით. მგზავრობა ხელმისაწვდომია მხოლოდ აზერბაიჯანის მოქალაქეებისთვის, წელიწადში ერთხელ და ღამით დარჩენის უფლების გარეშე. ავტობუსებს მთელი მარშრუტის განმავლობაში პოლიციის თანამშრომლები გააცილებენ.
ბაქოში გაიმართა ბრიფინგი, რომელიც მიეძღვნა ქალაქების, შუშისა და აღდამის მიმართულებით რეგულარული ავტობუსის მარშრუტების გახსნას. ეს ქალაქები აზერბაიჯანის კონტროლქვეშ ყარაბაღის მეორე ომის შედეგად გადავიდა.
ციფრული განვითარებისა და ტრანსპორტის მინისტრის მოადგილის, რაჰმან გუმეტოვის თქმით, ამ მოგზაურობებში მთავარი პირობა მგზავრთა უსაფრთხოების უზრუნველყოფაა.
მარშრუტები და ფასები
როგორც ავტოტრანსპორტის სახელმწიფო სამსახურის ხელმძღვანელმა, ანარ რზაევმა აღნიშნა, განისაზღვრა ბილეთების ფასები ავტობუსების ახალი მარშრუტებისთვის.
- ბაქო-აღდამი 9.40 მანათი ($5.53)
- ბაქო-შუშა 10.40 მანათი ($6.12)
- აჰმედბეილი-შუშა 7 მანათი ($4.12)
- ბარდა-აღდამი 5 მანათი ($2.94)
- ფუზულის აეროპორტი-შუშა 6 მანათი ($3.53)
აჰმედბეილი-შუშის რეისი კვირაში 4-ჯერ შესრულდება, ბაქო-შუშის – 2-ჯერ.
ფუზულის საერთაშორისო აეროპორტიდან ქალაქ შუშის მიმართულებით რეისების დრო სინქრონიზებული იქნება თვითმფრინავების დაშვების დროსთან.
ბილეთების შეძენა შესაძლებელი იქნება წინასწარ, სპეციალურად შექმნილ ვებგვერდზე yolumuzqarabaga.az.
წელიწადში მხოლოდ ერთხელ
რზაევმა დასძინა, რომ აზერბაიჯანის თითოეულ მოქალაქეს უფლება აქვს, წელიწადში მხოლოდ ერთხელ მოინახულოს აღდამი და შუშა.
შეჰიდების ოჯახის წევრებისთვის (ყარაბაღის ომის დროს დაღუპულები, 1990 წლის 20 იანვარს ბაქოში საბჭოთა არმიის თავდასხმის შედეგად დაღუპულები და სხვა მათთან გათანაბრებული პირები – JAMnews), ყარაბაღის მეორე ომის მონაწილეებისა და ეროვნული გმირებისთვის მგზავრობა უფასო იქნება.
რეისებზე დაიშვებიან მხოლოდ ის პირები, რომლებსაც COVID-პასპორტი აქვთ.
პოლიციის თანხლებით
აზერბაიჯანის შინაგან საქმეთა სამინისტროს საზოგადოებრივი უსაფრთხოების მთავარი სამმართველოს უფროსის მოადგილის, ილდანიზ მამედოვის თქმით, აღნიშნული მიმართულებებით ავტობუსების რეგულარული მარშრუტები განხორციელდება პოლიციის თანამშრომლების თანხლებით.
„ეს მნიშვნელოვანია მოგზაურობის დროს შესაძლო პრობლემური სიტუაციების შემთხვევაში პოლიციის დროული ჩარევისთვის“, – დასძინა მან.
მამედოვმა აღნიშნა, რომ მოგზაურობისთვის ნაღმებისგან გაწმენდილი ტერიტორიების რუკა მომზადდა.
ღამის გათენების უფლების გარეშე
ბრიფინგზე განაცხადეს, რომ ვიზიტორებს აღდამსა და შუშაში ღამის გათენების უფლება არ ეძლევათ უსაფრთხოების ზომებიდან გამომდინარე.
„მოქალაქეებს იქ სულ რამდენიმე საათის გატარება შეეძლებათ“, – განაცხადა რაჰმან გუმეტოვმა.
მისი თქმით, მომავალში შესაძლოა ტურისტული მოგზაურობების ორგანიზება უცხოელებისთვის აღდამისა და შუშის მიმართულებით.
