აზერბაიჯანში ოპოზიციონერს თავისი დის ინტიმური ვიდეოთი აშანტაჟებდნენ
აზერბაიჯანში, მორიგი სექსსკანდალი აგორდა: საფრანგეთში მცხოვრებ ოპოზიციონერ მაგომედ მირზალის თავისი დის ინტიმური ვიდეოთი აშანტაჟებდნენ. ამის შესახებ თავად ოპოზიციონერმა განაცხადა.
- მოლდოვა: სექს-სკანდალები, როგორც პოლიტიკის მოქმედი ინსტრუმენტი
- კარანტინი აზერბაიჯანში: სუიციდი, პოლიციის მხრიდან სექსუალური შევიწროება და სხვა შედეგები
- „ახლა შენ უკვე აგებ პასუხს მკვლელობაზე“ – როგორ მიულოცეს რუსეთში მოზარდებს 14 წლის შესრულება
Youtube-ის საკუთარ არხზე გამოსვლისას, მაგომედ მირზალიმ განაცხადა, რომ მას თავისი დის ინტიმური ვიდეოთი აშანტაჟებდნენ.
„ჩემთვის WhatsApp-ის მესენჯერში გამოგზავნილ ვიდეოში, აღბეჭდილია ჩემი დის ინტიმური კადრები, სადაც ის თავის ქმართან ერთად არის გადაღებული. ვიღაცამ კამერა მათ საძინებელში განათავსა“, – აღნიშნა ოპოზიციონერმა.
მისი თქმით, მოგვიანებით მას კიდევ ერთხელ დაუკავშირდნენ და გაჩუმება შესთავაზეს: „წინააღმდეგ შემთხვევაში, ამ კადრების გავრცელებით დამემუქრნენ“.
ვინ არის მაგომედ მირზალი?
27 წლის ოპოზიციონერმა რამდენიმე წლის წინ დატოვა აზერბაიჯანი და საფრანგეთში დამკვიდრდა. თავად მირზალის თქმით, მისი დევნა მას შემდეგ დაიწყო, რაც ქალაქ გოქჩაიში (ქალაქი აზერბაიჯანის ცენტრალურ ნაწილში) ჯარისკაცების გარდაცვალების წინააღმდეგ, საპროტესტო აქციებს გაუწია ორგანიზება.
ემიგრაციაში მცხოვრებმა მაგომედ მირზალიმ აზერბაიჯანის ხელისუფლების მწვავე კრიტიკა დაიწყო. სწორედ ამის შემდეგ დაიწყო მისი ოჯახის წევრების დევნა და თვალთვალი.
ნარკოტიკების შენახვის ბრალდებით მისი დის ქმარი დააპატიმრეს. ოპოზიციონერის ზოგიერთმა ნათესავმა მასთან ნათესაობაზე უარის თქმის შესახებ დაწერა პოლიციაში განცხადება – ამის შესახებ, რადიო „თავისუფლება“ იტყობინება.
ინტიმური ვიდეო, როგორც იარაღი ოპოზიციის წინააღმდეგ
ოპოზიციონერები და ჟურნალისტები, რომლებიც ღიად გამოდიან აზერბაიჯანის ხელისუფლების წინააღმდეგ, არაერთხელ გახდნენ ინტიმური ხასიათის ვიდეოკადრებით შანტაჟის მსხვერპლი.
ჟურნალისტები ხადიჯა ისმაილი, გან თურალი და განიმათ ზაჰიდი, ოპოზიციონერები ქემალ ბენენიარლი, აზერ აჰმედოვი, ნატიკ ადილოგი – მხოლოდ არასრული ჩამონათვალია მათი, ვინც თავის დროზე, მსგავსი ტიპის შანტაჟი განიცადეს.
აღსანიშნავია ყოფილი აზერბაიჯანელი ოპოზიციონერის, აშშ-ის მოქალაქის, საიდ ნურის საქმე, რომელიც 2014 წელს, ბაქოში, თავის მეგობარ გოგონასთან ერთად ჩამოვიდა. სოციალურ ქსელებში გავრცელდა ინტიმური ხასიათის ვიდეო, რომელშიც აღბეჭდილია სასტუმრო, სადაც ნური თავის მეგობარ გოგონასთან ერთად იყო გაჩერებული.
რამდენიმე დღის შემდეგ, აზერბაიჯანის ხელისუფლებამ საიდ ნურის ქვეყნის ტერიტორიის დატოვების უფლება არ მისცა, მასთან დაკავშირებული სისხლის სამართლის საქმის დაუსრულებელი გამოძიების გამო. ინციდენტი აშშ-ის სახელმწიფო დეპარტამენტის ჩარევის შემდეგ ამოიწურა.
კომენტარები სოციალურ ქსელებში
მაგომედ მირზალის შანტაჟმა სოციალური ქსელების აზერბაიჯანულ სეგმენტში აღშფოთების ქარიშხალი გამოიწვია.
აი, ზოგიერთი სახასიათო კომენტარი:
„დიახ, მაგომედ მირზალი იგინება, შეურაცხყოფას აყენებს. მაგრამ ის ფიზიკური პირია. მის წინააღმდეგ კი ამას უმაღლესი ინსტანციები აკეთებენ. ეს პოლიტიკაა. საკმარისია ადამიანის პირად ცხოვრებაში ძრომიალი. სექსი – სამარცხვინო არ არის. სამარცხვინო ასეთი რაღაცის ფარულად გადაღებაა. ეს დანაშაულია“.
„რატომ უნდა რცხვენოდეს ადამიანს სიყვარულით დაკავება? მთელი კაცობრიობა ამის პროდუქტი არ არის? ხელისუფლება მრავალი წელია ინტიმური ვიდეოებით აშანტაჟებს ადამიანებს. ეს ერთ-ერთი ყველაზე უფრო მდაბალი საქციელია“.
„მათ ფარული კამერა საძინებელში დაამონტაჟეს (!) მისი დის (!), საკუთარ ქმართან ინტიმური სცენები გადაუღეს (!) და ახალგაზრდა მამაკაცს ამ ვიდეოთი აშანტაჟებდნენ. არ შეუძლიათ დაპატიმრება, ნარკოტიკების ჩადება, როგორც სხვა ბევრი ხელისუფლების გამკრიტიკებელის შემთხვევაში, არ შეუძლიათ მისი მოსყიდვა ან მოკვლა, როგორც ელმარ ჰუსეინოვის, რაფიკ ტაგის, გადაწყვიტეს დაეშანტაჟებინათ, როგორც ბევრი სხვა ადამიანი აქამდე. როგორი სირცხვილია!“.
