ასლან ბჟანიამ ხელისუფლებაში ყოფნის პერიოდში 14 მილიონი დოლარის უძრავი ქონება შეიძინა
ასლან ბჟანიას ძვირადღირებული უძრავი ქონება
აფხაზეთის ოპოზიციური ტელეგრამ-არხები ირწმუნებიან, რომ აფხაზეთის სათავეში ყოფნის დროს, ყოფილმა ე.წ. პრეზიდენტმა ასლან ბჟანიამ 1,5 მილიარდ რუბლზე [14 მილიონ დოლარზე მეტი] უძრავი ქონება შეიძინა.
ოპოზიცია თავის მტკიცებას მედიის მიერ მოწოდებული დოკუმენტებით ადასტურებს.
კერძოდ, ეს არის ხელშეკრულება მოსკოვის ცენტრში 100 მილიონი რუბლის ღირებულების 165 კვ.მ. უძრავი ქონება. შეთანხმებას ხელი მოეწერა 2024 წლის 12 აგვისტოს, როდესაც აფხაზეთი უკვე ჩაძირული იყო სერიოზულ პოლიტიკურ და ეკონომიკურ კრიზისში, რომელიც გამოწვეული იყო რუსეთთან ურთიერთობის გაუარესებით.
შესაძლებელია, რომ ბინის რეალური ფასი მნიშვნელოვნად აღემატებოდეს ხელშეკრულებაში მითითებულს, ვინაიდან აფხაზურმა მედიამ აღმოაჩინა რეკლამა იმავე კორპუსში მსგავსი ბინის 190 მილიონ რუბლზე მეტით [დაახლოებით 1 მილიონ 819 ათასი აშშ დოლარი] გაყიდვის შესახებ.
ამასთან, ოფიციალური მყიდველი იყო ასლან ბჟანიას მეუღლის ძმისშვილი ლეონ კირტბაია და გარიგება მისი სახელით ექსპრეზიდენტის ვაჟმა, მაქსიმ ბჟანიამ გააფორმა.
მედია ყურადღებას ამახვილებს იმ ფაქტზეც, რომ გარიგება იმ დროს დასრულდა, როცა აფხაზეთის ხელისუფლება ცივი ზამთრისთვის უნდა ემზადებოდეს და რუსეთიდან ელექტროენერგიის შესაძენად თანხებს ეძებდეს. სხვათა შორის, სახსრები ვერ მოიძებნა, რის შედეგადაც აფხაზეთი ახლა ენერგეტიკულ კოლაფსს განიცდის და დღეში 10 საათის განმავლობაში ელექტროენერგიის გარეშე რჩება.
ეს და სხვა უძრავი ქონების ყიდვა-გაყიდვის ხელშეკრულებები ბჟანიას ოფისში მას შემდეგ აღმოაჩინეს, რაც ოპოზიცია 15 ნოემბერს მთავრობის სახლის შენობაში შეიჭრა.
ოპოზიციის თქმით, ბოლო ოთხი წლის განმავლობაში ბჟანიას ოჯახმა კიდევ სამი ძვირადღირებული უძრავი ქონება შეიძინა:
- კიდევ ერთი ბინა მოსკოვში 350 კვადრატულ მეტრზე მეტი ფართობით;
- აგარაკი მოსკოვის რეგიონში;
- ბინები სოჭში.
ამრიგად, რუსეთსა და აფხაზეთში უძრავი ქონების მთლიანი საბაზრო ღირებულება, რომელიც ასლან ბჟანიამ პრეზიდენტის რანგში შეიძინა, წინასწარი შეფასებით, შეიძლება აღწევდეს 1,5 მილიარდ რუბლს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
