აშშ-მა საქართველოსთან სამხედრო სწავლება განუსაზღვრელი ვადით გადადო
აშშ – საქართველოს ერთობლივი წვრთნები
ამერიკის შეერთებულმა შტატებმა განისაზღვრელი ვადით გადადო ამერიკა-საქართველოს ერთობლივი სამხედრო სწავლება “ღირსეული პარტნიორი”, რომელიც საქართველოში 2016 წლიდან ტარდებოდა. წელს სამხედრო წვრთნა 25 ივლისი-6 აგვისტოს პერიოდში იყო დაგეგმილი.
შეერთებული შტატების თავდაცვის დეპარტამენტის ოფიციალური განცხადების თანახმად, ეს გადაწყვეტილება მიღებულია ორმხრივი ურთიერთობების გადახედვასთან დაკავშირებით მიღებული გადაწყვეტილების ფარგლებში.
განცხადებაში ასევე ნათქვამია, რომ გადაწყვეტილება განპირობებულია საქართველოს „მთავრობის ცრუ ბრალდებებით შეერთებული შტატებისა და სხვა დასავლური სუბიექტების მიმართ”.
ცრუ ბრალდებებში დასახელებულია საქართველოს ხელისუფლების ნარატივი, რომ თითქოს აშშ აიძუელბდა საქართველოს გაეხსნა მეორე ფრონტი. ასევე, რომ თითქოს ამერიკის შეერთებულ შტატებს საქართველოში რევოლუციის მოწყობის ორი მცდელობა ჰქონდა.
განცხადებაში აშშ-ის თავდაცვის დეპარტამენტი წერს, რომ “ახლა შეუფერებელი დროა საქართველოში ფართომასშტაბიანი სამხედრო წვრთნების ჩასატარებლად”.
განცხადებაში ასევე ხაზგასმულია, რომ აშშ აპირებს გააგრძელოს საქართველოს თავდაცვის ძალებთან მუშაობა, რათა გააძლიეროს საქართველოს შესაძლებლობა, დაიცვას თავისი სუვერენიტეტი და შეინარჩუნოს ტერიტორიული მთლიანობა.
„ეს გადაწყვეტილება მარტივად არ მიგვიღია და დიდ ყურადღებას ვაქცევთ იმ ღირებულებას, რასაც ჩვენი მოკავშირეები და პარტნიორები „ღირსეული პარტნიორის“ მსგავს წვრთნებს ანიჭებენ. შეერთებული შტატები მოუთმენლად ელის მოკავშირეებთან და პარტნიორებთან ერთად თანამშრომლობის მომავალ შესაძლებლობებს, მათ შორის სამხედრო სწავლების „მტკიცე სულის“ ჩატარებას 2025 წელს“, – ნათქვანია განცხადებაში.
საქართველოს თავდაცვის სამინისტროს პოზიცია
“დასანანია ამერიკის შეერთებული შტატების თავდაცვის დეპარტამენტის მიერ გავრცელებული განცხადება, მრავალეროვნული სწავლება „ღირსეული პარტნიორი 2024“-ის გაურკვეველი დროით გადადების შესახებ“, – ასე გამოეხმაურა ამერიკის თავდაცვის დეპარტამენტის განცხადებას საქართველოს თავდაცვის სამინისტრო.
- “ვიზალიბერალიზაცია, ვაჭრობა, უსაფრთხოება” – ანტიდემოკრატიული კურსის ცვლილების შემთხვევაში, საქართველო აშშ-სგან მსხვილ პაკეტს მიიღებს
- “ქართული ოცნება” MEGOBARI Act-ზე: ამერიკელი პოლიტიკოსები შეცდომას შეცდომაზე უშვებენ, შანტაჟის ენით გვესაუბრებიან
“საერთაშორისო სწავლებებს, მათ შორის „ღირსეული პარტნიორი 2024“-ს სარგებელი მოაქვს როგორც საქართველოსთვის, ასევე, ამერიკის შეერთებული შტატებისთვის და მასში მონაწილე პარტნიორი ქვეყნებისთვის, რადგან ხელს უწყობს თავდაცვისუნარიანობის გაძლიერებას, სამხედრო მოსამსახურეების შესაძლებლობების განვითარებას, პროფესიონალიზმის ამაღლებასა და ურთიერთთავსებადობის გაზრდას“, – ნათქვამია სამინისტროს განცხადებაში.
და, იქვე აღნიშნულია, რომ აშშ-ის თავდაცვის დეპარტამენტსა და საქართველოს თავდაცვის სამინისტროს თავდაცვისა და უსაფრთხოების სფეროში ურთიერთსასარგებლო თანამშრომლობის ფორმატები არსებობს და ეს ფორმატები გრძელდება.
საქართველოს პრეზიდენტი: “დასუსტებულ და იზოლირებულ საქართველოს უჩენენ ბევრად დიდ საფრთხეს”
საქართველოს პრეზიდენტი სალომე ზურაბიშვილი აშშ-ს თავდაცვის დეპარყამენტის განცხადებას სოციალურ ქსელში, მოკლე განცხადებით გამოეხმაურა.
პრეზიდენტი წერს, რომ ხელისუფლებამ რუსული კანონის მიღებით საფრთხის ქვეშ დააყენა ქვეყნის ევრიპული გზა. ამერიკელი პარტნიორების შეურაცხყოფით და მათ მიმართ გაჟღერებული ბრალდებებით კი ახლა საფრთხეს უქმნიან ორი ქვეყნის სტრატეგიულ პარტნიორობას, რომელსაც ეფუძნება ქვეყნით თავდაცვის ძალების გაძლიერება და ნატოს სტანდარტებზე გადაყვანა.
“ამას ეძახიან საქართველოს ინტერესებს … ამ დროს დასუსტებულ და იზოლირებულ საქართველოს უჩენენ ბევრად დიდ საფრთხეს“, – წერს პრეზიდენტი.
რა არის სამხედრო სწავლება “ღირსეული პარტნიორი”
საქართველოსა და ამერიკის ერთობლივი სამხედრო წვრთნები “ღირსეული პარტნიორი” (Noble Partner) საქართველოში 2016 წლიდან იმართებოდა.
ორი წლის წინ, 2022 წელს, საქართველო ამ წვრთნებს მეექვსედ მასპინძლობდა. საერთაშორისო წვრთნებს საქართველოს თავდაცვის ძალების აღმოსავლეთის სარდლობა და ევროპასა და აფრიკაში აშშ-ის სარდლობა (USAREUR) ხელმძღვანელობდა, ხოლო მხარდაჭერას წვრთნებისა და სამხედრო განათლების სარდლობის წვრთნებისა და შეფასების ერთობლივი ცენტრი (JTEC) ახორციელებდა.
ამ წელს, ამ წვრთნებში, 2400-ზე მეტი სამხედრო იყო ჩართული. „ღირსეული პარტნიორი 2022“-ის მიზანი იყო საქართველოს, აშშ-ს, რეგიონულ პარტნიორებსა და მოკავშირე ქვეყნებს შორის მზადყოფნისა და ურთიერთთავსებადობის გაზრდა შავი ზღვის რეგიონში სტაბილური და უსაფრთხო გარემოს უზრუნველყოფისთვის.
მთავარი ფოტო: საქართველოს, ამერიკის შეერთებული შტატებისა და დიდი ბრიტანეთის შეიარაღებული ძალების ერთობლივი სამხედრო წვრთნა “Noble Partner 2016”, 24.05.16. ვაზიანი © EPA/ZURAB KURTSIKIDZE
აშშ – საქართველოს ერთობლივი წვრთნები
