აშშ-ს საელჩო მოსმენების კანონზე: საქართველოს აშორებს ევროპულ ინტეგრაციას

აშშ-ს საელჩო მოსმენების კანონზე

ამერიკის შეერთებული შტატების საელჩო საქართველოში პარლამენტის მიერ მოსმენების კანონის მიღებას ეხმაურება და აცხადებს, რომ ის საქართველოს აშორებს ევროპულ ინტეგრაციას.

“პარლამენტის გადაწყვეტილება, გამიზნულად მიეღო მოსმენების შესახებ კანონი, რომელიც უზრდის მთავრობას შესაძლებლობას, გააკონტროლოს თავისი მოქალაქეები, არ არის თანხვედრაში ევროპულ სტანდარტებთან და ეწინააღმდეგება ვენეციის კომისიისა და დასავლელი პარტნიორების მკაფიო რეკომენდაციებს. ეს კანონი საქართველოს აშორებს ევროპულ ინტეგრაციას, ნაცვლად მასთან დაახლოებისა”. – წერია საელჩოს მიერ გამოქვეყნებულ განცხადებაში.

საქართველოს პარლამენტმა პრეზიდენტის ვეტო 6 სექტემბერს დაძლია და მოსმენების კანონი მაინც მიიღო.

აღნიშნული კანონი ძალოვან სტრუქტურებს საშუალებას მისცემს მოუსმინოს უფრო მეტ მოქალაქეს და ბევრად უფრო მარტივად, ვიდრე აქამდე უსმენდა. სისხლის სამართლის საპროცესო კოდექსში ცვლილებებით ფარული საგამოძიებო მოქმედებების ჩატარება, მოსმენა და თვალთვალი შესაძლებელი ხდება დამატებით 27 დანაშაულზე.

ცვლილებების შედეგად იზრდება ფარული მოსმენების ვადაც – 6 თვიდან 9 თვემდე, ხოლო 100 დანაშაულზე ფარული საგამოძიებო მოქმედებები შეიძლება უვადოდ გაგრძელდეს, თუკი სასამართლო პროკურატურას ამის ნებართვას მისცემს.

ასევე, ახალი კანონით, გამოძიება თავისუფლდება შეტყობინების ვალდებულებისგან მათ მიმართ, ვისზეც ფარულ საგამოძიებო მოქმედებებს ატარებენ, რიგი დანაშაულების შემთხვევაში.

● სალომე ზურაბიშვილი: ისეთ ქვეყანაში ვართ, საუბარი რომ გვინდა, ვფიქრობთ, ტელეფონი ხომ არ დავტოვოთ
● “ვაგროვებთ კომპრომატებს” – გავრცელდა საიდუმლო ფაილები, სადაც სუს-ი მღვდელმთავრებს უსმენს
● დაუსჯელობა, სასამართლო, მედია და სააკაშვილი. რა წერია სახდეპის ახალ ანგარიშში

7 ივნისს “ქართული ოცნების” დეპუტატების ინიციირებული კანონპროექტი პარლამენტმა მესამე მოსმენით მიიღო, ხოლო პრეზიდენტმა მას ვეტო დაადო.

ევროპის საბჭოს ვენეციის კომისიის იურიდიული და საკონსტიტუციო ექსპერტთა გადაუდებელი დასკვნის მიხედვით, მოსმენების შესახებ კანონპროექტი მიღებულია ნაჩქარევად და მოითხოვს როგორც ზემოქმედების შეფასებას, ასევე უფრო დეტალურ დასაბუთებას.

ვენეციის კომისიის მიხედვით:

● საქართველოში ფარული თვალთვალის ღონისძიებების ზედამხედველობის მექანიზმი არაადეკვატურია და საჭიროა არსებული ფარული თვალთვალის სისტემების ყოვლისმომცველი გადახედვა.

● კომუნიკაციის თავისუფლება და კონფიდენციალურობა ფუნდამენტური ღირებულებებია ნებისმიერ ლიბერალურ საზოგადოებაში. ამიტომ ფარული თვალთვალის ზომები უნდა იყოს ფრთხილად ფორმულირებული და ვიწრო ინტერპრეტაციით სახელმწიფო უწყებებისა და სასამართლოების მიერ.

საქართველოს პრეზიდენტის თქმით, იმ ფორმით, რა ფორმითაც იყო მიღებული ცვლილებები, დაუსაბუთებლად და აჩქარებული წესით და ა.შ – ეს ყველაფერი აჩენს ახალ ეჭვს, რომ “ეს არის ძალაუფლების გამყარებისთვის მიღებული ცვლილებები”.