უკრაინის მმართველი პარტიის, “ხალხის მსახურის”თავმჯდომარე დავით არახამია პარლამენტის თავმჯდომარეს, ირაკლი კობახიძეს ეხმაურება და მას კოლაბორაციონისტს უწოდებს.
ხუთ ივლისს ჟურნალისტებთან საუბრისას ირაკლი კობახიძემ დავით არახამიაზე თქვა, რომ ის უსამშობლოა.
“არც უკრაინა არის მისი სამშობლო, არც საქართველო, არც რუსეთი”- განაცხადა კობახიძემ.
“პასუხი კობახიძეს – შენნაირი კოლაბორანტების დამსახურებით დავკარგე სახლი ჩემს სამშობლოში. მოვა დრო და ქვეყანა გაიგებს, რომ საქართველოს პოლიტიკური ინტერესების პლატფორმად იყენებ და სინამდვილეში რუსეთია შენი სამშობლო, სადაც გაქცევა მოგიწევს, რადგან სხვაგან არსად მიგიღებენ.
შენნაირებისგან გათავისუფლებით იზეიმებს საქართველოც და უკრაინაც მტერზე გამარჯვებას, რასაც როგორც ხედავ, წარმატებით ვახერხებთ.”
5 ივლისს მმართველი პარტია “ქართული ოცნების” თავმჯდომარემ, ირაკლი კობახიძემ 12 რეკომენდაციის შესახებ პრესკონფერენცია გამართა, სადაც ჟურნალისტების კითხვებს უპასუხა. კობახიძემ ყოფილი პრეზიდენტის, მიხეილ სააკაშვილის ამჟამინდელ მდგომარეობის “კუჭის ოპერაციის რეკლამა” უწოდა, ხოლო ევროპარლამენტზე განაცხადა, რომ ხელისუფლებას ევროკომისიიდან ეუბნებიან, “ყურადღებას ნუ აქცევთ ევროპარლამენტარებსო.”
მისივე თქმით, უკრაინის ხელისუფლების კონკრეტული მაღალჩინოსნები იყვნენ ჩართულები საქართველოში სააკაშვილის გამოგზავნაშიდა დღეს როდესაც იგივე ხელისუფლება ითხოვს სააკაშვილის უკრაინაში დაბრუნებას, ეს რა თქმა უნდა შეიცავს შეურაცხყოფის ნიშნებს.
ვოლოდიმირ ზელენსკიმ 3 ივლისს მიხეილ სააკაშვილის სამკურნალოდ უკრაინაში გადაყვანა მოითხოვა. უკრაინის საგარეო საქმეთა მინისტრის, დმიტრო კულებას თქმით, მიხეილ სააკაშვილის სასამართლო პროცესის კადრების გამოქვეყნების შემდეგ ყველაფერმა “დუღილის წერტილს მიაღწია“, რის გამოც კიევმა მკვეთრი, მაგრამ “სამართლიანი ნაბიჯი“ გადადგა.
3 ივლისს სააკაშვილმა ვიდეო ბმულით მიიღო მონაწილეობა სასამართლო სხდომაში, სადაც 7 ნოემბრის აქციის დარბევის საქმეს განიხილავენ. სასამართლო დარბაზიდან გადაღებულ ფოტოზე ჩანს, თუ რამდენად დაიკლო წონაში საქართველოს ყოფილმა პრეზიდენტმა, რომელიც 2021 წლის ოქტომბრიდან პატიმრობაშია.
