თავისუფლება ნიკა გვარამიას - პრეზიდენტის სასახლესთან აქცია გაიმართა
აქცია ნიკა გვარამიას გათავისუფლების მოთხოვნით
“ნიკა გვარამიას თავისუფლების მოძრაობის” წევრებმა, ჟურნალისტებმა და აქტივისტებმა “მთავარი არხის” დამფუძნებლის გათავისუფლების მოთხოვნით პრეზიდენტის სასახლესთან აქცია გამართეს.
მსვლელობა “მთავარი არხის” ოფისიდან დაიწყო და აქტივისტები ორბელიანების სასახლესთან მივიდნენ. მათ საქართველოს პრეზიდენტს მოუწოდეს, რომ შეიწყალოს ნიკა გვარამია.
აქციის მონაწილეებმა სალომე ზურაბიშვილს ბრიუსელში ვიზიტამდე შეახსენეს, რომ მედია მენეჯერის პოლიტიკური პატიმრობა ერთ-ერთი მთავარი შემაფერხებელი ფაქტორია საქართველოს ევროინტეგრაციის გზაზე.
● ნინო ლომჯარია: პრეზიდენტის პასუხისმგებლობაც არის, რომ ნიკა გვარამია დღემდე ციხეში ზის
● რატომ დააპატიმრეს ნიკა გვარამია. მოკლედ საქმის არსი და შეფასებები
● “დაუწესდეს სანქციები ივანიშვილს, გათავისუფლდნენ სააკაშვილი და გვარამია” – EPP-ის რეზოლუცია
პრეზიდენტის რეზიდენციასთან გამართულ აქციაზე ორგანიზატორებმა ქართველი ემიგრანტების წერილი წაიკითხეს. ემიგრანტები წერილში აცხადებენ, რომ ისინი მიხეილ სააკაშვილისა და ნიკას გვარამიას თავისუფლებისთვის აქციის მონაწილეებთან ერთად იბრძვიან.
წერილით სხვადასხვა ქვეყანაში მყოფი ქართველი ემიგრანტები ამბობენ, რომ ირჩევენ ევროპას და მიუხედავად იმისა, რომ “იძულებულები გახდნენ დაეტოვებინათ საქართველო, არ აპირებენ მის დათმობას.”
ნიკა გვარამია 2022 წლის 16 მაისს, სასამართლო დარბაზში დააპატიმრეს. კრიტიკული მედიის ხელმძღვანელს სამი წლით და ექვსი თვით თავისუფლების აღკვეთა მიესაჯა ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.
“მთავარი არხის” დამფუძნებლის საქმე მოხვდა ამერიკის სახელმწიფო დეპარტამენტის ბოლო ანგარიშშიც. დოკუმენტის ქვეთავებში, რომლებიც პოლიტიკურ პატიმრებსა და გამოხატვის თავისუფლება ეხება, საუბარია მთავარი არხის გენერალური დირექტორი, ნიკა გვარამიას დაკავების შესახებ.
თეთრი სახლი Amnesty International-ზე დაყრდნობით წერს, რომ გვარამიას საქმემ გამოავლინა “მთავრობის მზარდი გავლენა სასამართლოებზე რიგ საქმეებში”, რომლებიც მიზნად ისახავს მათი კრიტიკოსებისა და ოპონენტების დათრგუნვას.
კომენტარები:
პაატა იაკობაშვილი, ტელეწამყვანი: “ეს აქცია რამდენიმე დღით ადრე იმართება, ვიდრე სალომე ზურაბიშვილი ევროპაში, ბრიუსელში გაემგზავრება. სწორედ ამიტომ მივდივართ ჩვენ დღეს მასთან, რომ ვთხოვოთ, გადადგას ნაბიჯი, რომელიც შესაძლებლობას მისცემს, ამაყად წარსდგეს ჩვენი ევროპელი მეგობრების წინაშე და აჩვენოს და სათქმელი ჰქონდეს მათთან კიდევ ერთხელ, რომ ეს ქვეყანა ირჩევს ევროპულ განვითარებას, რომ ეს ქვეყანა ღირსია, იყოს ევროპული თანამეგობრობის წევრი და ამ ქვეყანაში პოლიტიკოსები და პირველ რიგში პრეზიდენტი, რა თქმა უნდა, მოქმედებენ ისე, როგორც ცივილიზებულ ევროპულ ქვეყნებში მოქმედებენ პოლიტიკოსები, ანუ აკეთებენ ყველაფერს რომ, მაგალითად, აღმოიფხვრას დანაშაულებრივი და პოლიტიზებული სასამართლოს გადაწყვეტილებები და დასრულდეს გამოხატვის თავისუფლების გამო მედია მენეჯერების პატიმრობა.”
ყოფილი ევროპარლამენტარი, რებეკა ჰარმსი: “თავისუფლება ნიკას! გთხოვთ იმოქმედოთ, ქალბატონო პრეზიდენტო.”
ნიკა მელია, “ერთიანი ნაციონალური მოძრაობა”: “მესმის მღელვარების საზოგადოების დიდ ნაწილში, რომ ქალბატონი ზურაბიშვილი ამ ნაბიჯს არ დგამს, მაგრამ საბოლოო ჯამში, ასევე უნდა გვახსოვდეს, რომ ეს მისი უფლებაა და არა ვალდებულება, შეიწყალოს ან არ შეიწყალოს თუნდაც უსამართლოდ დაკავებული პატიმარი, ამ შემთხვევაში, პოლიტიკური პატიმარი. მე იმედს ვიტოვებ, რომ საღი აზრი გაიმარჯვებს ყველაში და ყველგან. რა მოხდება, ამას უახლოეს მომავალში გავიგებთ.”
ზუკა გუმბარიძე, “ფორმულას” გენერალური დირექტორი: “მე მოვედი იმისთვის, რომ გავაპროტესტო ეს მოვლენა, რომელიც უსამართლობაა. მოვედი იმისთვის, რომ სხვა ადამიანებთან ერთად ჩემი ხმა გავაგონო საქართველოს პრეზიდენტს, ქვეყნის კონსტიტუციის გარანტს და უმაღლეს მთავარსარდალს… მას როგორც პრეზიდენტს და ქვეყნის პირველ პირს კარგად უნდა ჰქონდეს გააზრებული მათ შორის თავისი ვალდებულებებიც. ის არის ერთადერთი ადამიანი, ვისაც შეუძლია ერთი ხელის მოწერით ადამიანი გაათავისუფლოს და ეს დიდი უსამართლობა აღმოფხვრას – ეს მისი, როგორც პრეზიდენტის ვალდებულება უნდა იყოს. ის ამას არ აკეთებს გაუგებარი მიზეზების გამო. შესაბამისად, მე მისი სწორი ნარატივები მომწონს მაგრამ ადამიანი საბოლოო ჯამში პირველ რიგში მისი სწორი ქმედებების მიხედვით განისჯება. სამწუხაროდ, სალომე ზურაბიშვილი ქმედებების ნაწილში მნიშვნელოვნად ჩამორჩება იმ სწორ ნარატივებს, რომლებიც მას ბოლო პერიოდში აქვს ხოლმე.”
ლევან ხაბეიშვილი, “ერთიანი ნაციონალური მოძრაობის” თავმჯდომარე: “საერთოდ არ მაქვს წარმოდგენა, რომ [ზურაბიშვილი] დამოუკიდებელ ნაბიჯს გადადგამს. თუმცა მე მაგალითად, ბოდიშს მოვიხდი და ვიტყოდი, რომ ის არის დამოუკიდებელი ფიგურა, თუ იმ ინსტრუმენტს გამოიყენებს, რაც მას შეუძლია. და მას შეუძლია შეიწყალოს გვარამია, გაათავისუფლოს პრეზიდენტი სააკაშვილი. სხვა შემთხვევაში, ფაქტობრივად, შეგვიძლია ვთქვათ, რომ ის ევროკავშირის რეკომენდაციებს არ ასრულებს. ერთია რას საუბრობს, მეორეა – რას აკეთებს. შეუძლია და არ აკეთებს.
ამიტომ, გვაქვს ლეგიტიმური ფიქრის უფლება, ვთქვათ, რომ ეს ადამიანი შეკრულია რუსულ მთავრობასთან, ვგულისხმობ ბიძინა ივანიშვილს და მის მართულ ხელისუფლებასთან და უბრალოდ სიტყვებით ხანდახან აკეთილშობილებს ქვეყნის ხელისუფლებას, როცა სწორად საუბრობს, მაგრამ არ მოქმედებს.”
