ბათუმის პორტში მიმდინარე აქციაზე პოლიციამ ჯამში 23 ადამიანი დააკავა

აქცია ბათუმში

31 ივლისის დილის საათებში ბათუმის პორტში მიმდინარე საპროტესტო აქციაზე პოლიციამ 23 ადამიანი დააკავა. შსს-ში ამტკიცებენ, რომ სამართალდამცველების არაერთი მოწოდების მიუხედავად, “აქციის მონაწილეები არ დაემორჩილნენ მათ კანონიერ მოთხოვნას”.

31 ივლისის დილას რუსეთიდან მომავალ საკრუიზო გემ ASTORIA GRANDE-ს ბათუმის პორტში მოქალაქეები საპროტესტო აქციით დახვდნენ.
აქცია ბათუმში გვიან ღამით დაიწყო.

აქციამდე რამდენიმე საათით ადრე შინაგან საქმეთა სამინისტრომ პორტის მიმდებარე ქუჩები გადაკეტა, ნავსადგურთან კი რკინის ჯებირებით შემოსაზღვრეს ტერიტორია, სადაც საკრუიზო გემი უნდა შემოსულიყო.

ეს პირველი შემთხვევა არ არის, როდესაც საკრუიზო გემი Astoria Grande ბათუმში ჩერდება. საკრუიზო ლაინერი ბათუმის პორტში 27 ივლისს გაჩერდა. საკრუიზო ლაინერმა მოგზაურობა სოჭის პორტიდან დაიწყო და რუსი ტურისტები გადაჰყავდა, რომლებმაც მედიებთან ანტიქართული განცხადებები გააკეთეს.

საკრუიზო გემზე იმყოფებიან უკრაინის წინააღმდეგ რუსეთის ომისა და პრეზიდენტ ვლადიმირ პუტინის მხარდამჭერი არტისტებიც. ამჯერად რუს ტურისტებს ტელეარხ RU.TV-ის ვარსკვლავებთან ერთად მოგზაურობას სთავაზობდნენ.

პარტია ლელოს გენერალური მდივნის, ირაკლი კუპრაძის თქმით, ბათუმის პორტში მიმდინარე საპროტესტო აქციაზე უკრაინის მოქალაქე ქალი დააკავეს. კუპრაძე ამბობს, რომ პოლიციამ ქალს სხვადასხვა პირადი ნივთიც ჩამოართვა.

“დააკავეს უკრაინის მოქალაქე ქალი, რომელსაც წაართვეს ტელეფონი, დროშა, პირადი ნივთები და არ აძლევენ ზარის განხორციელების შესაძლებლობას”. – წერს კუპრაძე Facebook-ზე.

საკრუიზო გემის მარშრუტი არის სოჭი-ტრაპიზონი-ბათუმი-ამასრა-სტამბოლი-სოჭი. საკრუიზო ლაინერზე, დაახლოებით, 850 მგზავრი იმყოფება.

ხომალდი პალაუს დროშის ქვეშ დაცურავს და მომსახურებას თურქული საკრუიზო კომპანია Miray Cruises International-ი უწევს.

● “თქვენ ჩვენი რაღაც რესპუბლიკა იყავით” – რას ამბობენ რუსეთის მოქალაქეები, რომლებიც ბათუმში საკრუიზო ლაინერით შემოვიდნენ
● “სანამ ჩვენ ვსწავლობთ, ისინი ფუძნდებიან” – საზღვაო სეზონი “ოკუპირებულ” ბათუმში
● უკრაინის ომის შემდეგ საქართველოს ეკონომიკა სულ უფრო დამოკიდებული ხდება რუსეთზე. ციფრები და ანალიზი

25 ივლისს ცნობილი გახდა, რომ 22 ივლისს საკრუიზო ლაინერმა Astoria Grande-მ სოჭიდან ახალი მარშრუტით მოგზაურობა დაიწყო, რომლის მიხედვითაც მეხუთე დღეს კრუიზი ბათუმის პორტშიც შევიდოდა. ინფორმაცია დაადასტურა საქართველოს საზღვაო ტრანსპორტის სააგენტომაც, რომლის განმარტებითაც, გემი თურქული საკრუიზო კომპანია Miray Cruises International-ს ემსახურება და მისი შემოსვლა კომერციული ხასიათისაა.

გამოცემა “ეხო კავკაზა” იუწყება, რომ კრუიზი ტურისტებს ბათუმის ღირსშესანიშნაობების დათვალიერებასა და ადგილობრივი სამზარეულოს გასინჯვას სთავაზობს. ამასთან, ლაინერის მენიუს ქართული ტრადიციული კერძებიც დაემატა.

Россия 1-ის რეპორტაჟში ნათქვამია, რომ ორგანიზატორების განმარტებით, ქართული კურორტები რეისის მიმართ ინტერესს მნიშვნელოვნად გაზრდის. “მით უმეტეს, არანაირი დამატებითი დოკუმენტის” გაფორმება მგზავრებს არ მოუწევთ.

აღსანიშნავია ისიც, რომ სოჭის პორტის ადმინისტრაცია 2023 წლის იანვარში ამბობდა, რომ საქართველოსთან და ოკუპირებული აფხაზეთის ხელისუფლებასთან აწარმოებდა მოლაპარაკებებს, მათ პორტებში მიმოსვლის დაწყების შესახებ. სოჭის პორტის დირექტორმა, იური ვლადიმიროვმა მაშინ აღნიშნა, რომ მგზავრობების დაწყებას 2023 წლის ზაფხულისთვის აპირებდნენ. ამ სიტყვებს გამოეხმაურა საქართველოს საზღვაო ტრანსპორტის სააგენტო, რომელმაც აღნიშნა, რომ “უცნობია, რაზე საუბრობს სოჭის პორტის ადმინისტრაცია”.