"ამოიღეთ პროპაგანდისტული წიგნი პროგრამიდან!" - განათლების სამინისტროსთან აქცია გაიმართა
განათლების სამინისტროსთან პარტია “დროამ” აქცია გამართა. პარტიის ლიდერი ელენე ხოშტარია და აქციის მონაწილეები სამინისტროსგან მოითხოვენ, რომ დაუყოვნებლივ ამოიღონ 2020 წელს დამტკიცებული მე-9 კლასის ისტორიის სახელმძღვანელო სასწავლო პროგრამიდან, რადგან, მათი შეფასებით, სახელმძღვანელოში 2012 წლის მოვლები პროპაგანდისტულადაა აღწერილი.
„ვხედავთ, რომ მე-9 კლასის ისტორიის სახელმძღვანელოში გამოჩნდა პროპაგანდისტული გზავნილები, აქ აქცენტი უფრო ხშირად არის გაკეთებული ბიძინა ივანიშვილის ბიოგრაფიაზე, თუმცა ჩვენ ასევე ამ წიგნებში ვხედავთ ომის შესახებ ინფორმაციის ისე მოწოდებას, რომელიც თითქოსდა ხაზს უსვამს, რომ საქართველო ყოფილიყო ამ ომში დამნაშავე, რაც ძალიან სახიფათოა. ასევე ვხედავთ ეთნიკური უმცირესობის წარმომადგენლის ინტერვიუს, რომელიც შეიძლება გარკვეული ინტერპრეტირების საშუალებას აძლევდეს ადამიანებს.
ვფიქრობ, რომ სახელმძღვანელოებში პროპაგანდის შეტანა ძალიან სახიფათოა, ჩვენი მოთხოვნა არის, რომ უფრო მეტი იმუშაონ განათლების სპეციალისტებმა, ისტორიკოსებმა და მათი ჩართულობით მოხდეს დაბალანსებული, რეალური ინფორმაციის მიწოდება. საჭიროა ფაქტობრივი ინფორმაციის მიწოდება სკოლებში და არა ისეთი ინფორმაციის რომელიც არის პროპაგანდისტული“, – უთხრა ონლაინსააგენტო „პუბლიკას“ აქციის მონაწილემ , პარტია „დროას“ წევრმა, თამაზ ახობაძემ.
განათლების და მეცნიერების სამინისტროში აცხადებენ, რომ საქართველოს ისტორიის მე-9 კლასის სახელმძღვანელოში, რომელმაც 2012 წლის მოვლენების აღწერის გამო ბოლო რამდენიმე დღის განმავლობაში საზოგადოების ნაწილის კრიტიკა გამოიწვია, ისტორიული პროცესები აღწერილია გამართულად, კომპეტენტურად და მრავალმხრივად.
მათივე განმარტებით, მე-9 კლასის ისტორიის ორივე ახლად გრიფირებულ სახელმძღვანელოში მიმოხილულია საქართველოს უახლესი ისტორიის პერიოდი, უახლესი წლები, მათ შორის, დამოუკიდებლობის გამოცხადების დღიდან: პირველი პრეზიდენტის მმართველობა, აფხაზეთის და სამაჩაბლოს კონფლიქტები, მეორე პრეზიდენტის მმართველობის პერიოდი, დასავლური კურსის არჩევა, ასევე, ვარდების რევოლუციის გზით ხელისუფლების მშვიდობიანი ცვლილება და მესამე პრეზიდენტის მოღვაწეობასთან დაკავშირებული ფაქტები.
წიგნზე კომენტარი გააკეთა ფინანსთა მინისტრმა ლაშა ხუციშვილმაც. მისი თქმით, მისთვის გაურკვეველია ის აჟიოტაჟი, რომელიც ამ წიგნს მოჰყვა. მთავრობის სხდომის შემდეგ გამართულ ბრიფინგზე მინისტრმა განაცხადა, რომ წიგნებში ფაქტებზეა საუბარი და იქ შეფასება ვერ დაინახა.
უმრავლესობის წევრის, ალუდა ღუდუშაურის თქმით კი, ბიძინა ივანიშვილის შესახებ ისტორიის წიგნში უნდა ეწეროს, რადგან მას “ისტორიაში დაფასებული ადგილი” აქვს, განსხვავებით სააკაშვილისგან.
“ძალიან სწორად არის შეყვანილი. რა, არ უნდა იყოს? არ უნდა იყოს? როგორც ჩანს, ნებისმიერი პირი ამ ისტორიის სახელმძღვანელოს კარგად უნდა გეცნოს, იმიტომ, რომ ნამდვილად საჭიროებს… კიდევ კარგად გაეცანით, სხვა შემთხვევაში ამ კითხვას, რომ თურმე დღეს ბიძინა ივანიშვილი ხელისუფლების წარმომადგენელი ყოფილა, ამ განცხადებას და ამ მოსაზრებას უბრალოდ არ გააკეთებდით.
თუ ამ ისტორიის წიგნში რაიმე არის არასწორი და არ ასახავს რეალობას, არის ის, რომ ამ ისტორიის სახელმძღვანელოში მიხეილ სააკაშვილის ის “საგმირო საქმეები” არ არის ასახული, რაც მან ჩაიდინა და რისთვისაც არის მსჯავრდადებული და რაზეც მიმდინარეობს არაერთი საქმე”, – განაცხადა ღუდუშაურმა.
● მოსაზრება: ვის ელაპარაკება ოპოზიცია
● რას ფიქრობენ ექსპერტები და პოლიტიკოსები ივანიშვილის პოლიტიკიდან წასვლაზე
● გავრილოვი, პროპორციული, რკინის ღობე – რით დაგვამახსოვრდება მეცხრე მოწვევის პარლამენტი
რა წერია მე-9 კლასის ისტორიის სახელმძღვანელოში
გამომცემლობა “დიოგენეს” მე-9 კლასის ისტორიის წიგნში – რომელსაც განათლების სამინისტროსგან გრიფი 2020 წელს მიენიჭა – ივანიშვილი “ქმელმოქმედად” და “მეცენატად” არის მოხსენიებული.
“[2012 წელს] მთავრობის მეთაური, პრემიერ-მინისტრი ქართული ოცნების დამფუძნებელი, ცნობილი ქველმოქმედი და მეცენატი, ბიძინა ივანიშვილი გახდა. ხელისუფლების ცვლილების მიუხედავად, საქართველოს ევროპული კურსი არ შეცვლილა და პირიქით, ინტეგრაცია კიდევ უფრო გაღრმავდა (გვერდი 410)”, – წერია სახელმძღვანელოში.
წიგნში საუბარია “ვარდების რევოლუციასა” და “ნაციონალური მოძრაობის” მმართველობაზეც. კერძოდ, ნათქვამია, რომ ხელისუფლებამ დაამარცხა კორუფცია და გაატარა მნიშვნელოვანი რეფორმები, თუმცა იყო გადაცდომებიც – “დაიწყო გაურკვეველი დაჭერები და ადამიანთა უფლებები ხშირად ირღვეოდა.”
“კორუფციასთან წარმატებულ ბრძოლასთან ერთად დაიწყო გაურკვეველი დაჭერები, კრიმინალთან ბრძოლის საბაბით რამდენიმე მკვლელობა მოხდა. თუმცა შინაგან საქმეთა სამინისტროს მაღალჩინოსნები არ დასჯილან, გაურკვეველ ვითარებაში გარდაიცვალა პრემიერმინისტრი, ზურაბ ჟვანია. სასამართლოს საქმეები 99%-ს პროკურატურა იგებდა. ადამიანთა უფლებები ხშირად ირღვეოდა. დაიწყო უკმაყოფილო მოსახლეობის საპროტესტო გამოსვლები. ამ აქციებში მონაწილე აქტიურ პირებს ხშირად უსაფუძვლოდ აპატიმრებდნენ და ციხეში სვამდნენ. ციხეებში კი განუკითხაობა სუფევდა, რაც პატიმრების ფსიქოლოგიურ და ფიზიკურ შეურაცხყოფაში გამოიხატებოდა”, – ვკითხულობთ სახელმძღვანელოში.
“დიოგენეს” მიერ გამოცემულ წიგნში საუბარია 2008 წლის აგვისტოს ომზეც. სახელმძღვანელოში ვკითხულობთ, რომ 6-7 აგვისტოს “ოსურმა შეიარაღებულმა ფორმირებებმა” ცხინვალის მიმდებარე ქართულ სოფლებს ცეცხლი გაუხსნეს.
“2008 წლის ივნის-ივლისში მკვეთრად მოიმატა შეიარაღებულმა პროვოკაციებმა ცხინვალის რეგიონში. ქართული სოფლებისთვის ცეცხლის გახსნა, გზების დანაღმვა, მშვიდობიანი მოსახლეობის გატაცება ყოველდღიურ მოვლენად იქცა. 2008 წლის 6-7 აგვისტოს ოსურმა შეიარაღებულმა ფორმირებებმა ცხინვალის მიმდებარე ქართულ სოფლებს ინტენსიური ცეცხლი გაუხსნეს.
საქართველოს პრეზიდენტმა ადგილობრივი მოსახლეობის დასაცავად ცხინვალის რეგიონში შეიარაღებული ძალების შეყვანის ბრძანება გასცა, რასაც რუსეთის ფედერაციამ პირდაპირი სამხედრო აგრესიით უპასუხა. 2008 წლის 8-10 აგვისტოს რუსეთმა სამხრეთ ოსეთსა და აფხაზეთში ათასობით ერთეული სამხედრო ტექნიკა და ათიათასობით სამხედრო ძალა შემოიყვანა. მძიმე ბრძოლების შემდეგ, ძალების აშკარა უთანასწორობის გამო, საქართველოს ხელისუფლებამ კონფლიქტის ზონიდან ჯარები გამოიყვანა”, – წერია წიგნში.
ამავე სახელმძღვანელოში სადისკუსიო თემად მოცემულია შემდეგი კითხვა: “შენი აზრით, დაუშვა თუ არა შეცდომა საქართველოს პრეზიდენტმა, როდესაც ოსური შეიარაღებული ფორმირებების მიერ ქართული სოფლების მიმართულებით სროლას რეგიონში სამხედრო ნაწილების შეყვანით უპასუხა?”
