საქართველოში ორმა უმსხვილესმა ბანკმა, “თიბისიმ” და “საქართველოს ბანკმა”, ძალადობრივი, ჰომოფობიური და პრორუსული ორგანიზაცია ალტ-ინფოს ანგარიშები დაუბლოკა. ბანკების მიერ ალტ-ინფოს ანგარიშის დაბლოკვის შესახებ ჯგუფის ერთ-ერთმა წევრმა სოციალურ ქსელში დაწერა. ამასთან, „პუბლიკა“ ანგარიშების დაბლოკვაზე ინფორმაციას საკუთარ წყაროზე დაყრდნობით ავრცელებს.
თბილისში პრაიდის კვირეული მიმდინარეობს. დასკვნითი ღონისძიება პრაიდფესტივალია, რომელიც 8 ივლისს, ლისის ტბაზე გაიმართება. აღსანიშნავია, რომ მოძალადე და პრორუსული ჯგუფები ღონისძიების ჩაშლით იმუქრებიან. ამ მიზნით, რეგიონებიდან ხალხის ჩამოსაყვანად, ძალადობრივმა ჯგუფებმა საბანკო ანგარიშის ნომრები გაავრცელეს. სწორედ ამას მოჰყვა ქვეყნის უმსხვილესი ბანკების მხრიდან ძალადობრივი ჯგუფების ანგარიშების დაბლოკვა.
უკრაინის ომის პარალელურად, საქართველოში განსაკუთრებით გააქტიურდა პრორუსული, ძალადობრივი, ულტრარადიკალური მედია-ორგანიზაცია “ალტ-ინფო”, რომლის წარმომადგენლებმა გასული წლის ბოლოს პოლიტიკური პარტიაც დააფუძნეს.
ალტ-ინფოს ეთერის მსმენელები დღეს უწყვეტ რეჟიმში ისმენენ უკრაინის ომის რუსულ ვერსიას – დასავლეთზე, რომელმაც წააქეზა უკრაინა და ზელენსკიზე, რომელმაც ნატოს გამო საკუთარი ხალხი არ დაინდო. საქართველოსთვის კი, ერთადერთი ხსნა და პრაგმატული გამოსავალი, რუსეთთან დიალოგია, – აცხადებენ ისინი – და მხოლოდ რუსეთს შეუძლია დაუბრუნოს ქვეყანას ოკუპირებული ტერიტორიები – აფხაზეთი და სამხრეთ ოსეთი.
ოპოზიცია მიიჩნევს, რომ ამგვარი ჯგუფების უკან ხელისუფლება დგას და მათი გაძლიერება საზიანოა ქვეყნის უსაფრთხოებისთვის. კავშირს “ალტ-ინფოს” ჯგუფსა და ხელისუფლებას შორის ადასტურებენ არასამთავრობო ორგანიზაციები და ექსპერტებიც.
პარტია “კონსერვატიული მოძრაობა”, რომელიც ძალადობრივი ჯგუფის და ტელევიზიის,“ალტ-ინფოს” ნაწილია, საჯარო რეესტრმა 2021 წლის 7 დეკემბერს ოფიციალურად დაარეგისტრირა.
