აფხაზი ექიმები შიშობენ, რომ ჯანდაცვის სისტემა რუსეთთან საზღვრის გახსნას ვერ გაუძლებს

აფხაზეთის ჯანდაცვის მინისტრი და კლინიკების ხელმძღვანელები შიშობენ, რომ რუსეთთან საზღვრების გახსნა კორონავირუსის ახალ აფეთქებას გამოიწვევს, რომელსაც ჯანდაცვის სისტემა ვერ გაუმკლავდება. 

ხელისუფლებას ექიმების მოსმენა არ სურს, პრემიერმა კი „პანიკიორებს“ გადადგომა ურჩია.

საზღვრების გახსნა – მოულოდნელობა ექიმებისთვის 

რუსეთსა და აფხაზეთს შორის საზღვრის გახსნის გადაწყვეტილებამ, ფაქტობრივად, ყველა გააკვირვა. საზღვარი ტურისტებისთვის 1-ელ აგვისტოს, ყველანაირი შეზღუდვის გარეშე გაიხსნა. მხოლოდ პირველი სამი დღის განმავლობაში აფხაზეთში 30 ათასზე მეტი ტურისტი შევიდა. 

თუმცა, მანამდე, კორონავირუსის პანდემიასთან ბრძოლისათვის შექმნილი საკოორდინაციო შტაბი საზღვრების ეტაპობრივი გახსნის საკითხს განიხილავდა, რომელიც ამავდროულად საზღვრის გადაკვეთისას ცნობის ან კოვიდპასპორტის წარდგენას ითვალისწინებდა. 

• რუსი ტურისტების რიგი აფხაზეთში

• აფხაზეთში რუსეთთან საზღვრის გახსნას მოითხოვენ, ინფიცირების შემთხვევების რიცხვი იზრდება

• ანტიკრიზისული სოფლის მეურნეობა: ორი ამბავი აფხაზეთიდან

რუსი ტურისტებისთვის გახსნის თაობაზე შეშფოთება ექიმებმა აფხაზეთის ჯანდაცვის სამინისტროში გამართულ შეხვედრაზე პოსტფაქტუმ გამოხატეს. მასში, ოპერატიული შტაბის წევრების გარდა, ადგილობრივი საავადმყოფოების მთავარი ექიმებიც მონაწილეობდნენ. 

„ჩვენთან ჯერ კიდევ საზღვრების გახსნამდე მოხდა კორონავირუსის აფეთქება და გუდაუთის საავადმყოფო ნელ-ნელა ივსება. ყოველდღიურად, დაახლოებით, 8-10 ინფიცირებულ პაციენტს ვავლენთ.

და თუ ჩვენ მოსახლეობას დავუმატებთ მათ, ვინც ჩამოვა, ჩვენ უბრალოდ „დავიხრჩობით“ და ვერ შევძლებთ დახმარების აღმოჩენას ვერც ჩვენი მოქალაქეებისთვის და ვერც სხვისთვის“, – განაცხადა ჯანდაცვის მინისტრის მოადგილემ, ალხას კონჯარიამ.

ასეთი შიშის ერთ-ერთი მთავარი მიზეზი სამედიცინო სფეროში კადრების დეფიციტია. 

აფხაზეთში შეზღუდული რაოდენობით არიან რეანიმატოლოგები, ინფექციონისტები და თერაპევტებიც კი. ვირუსის მასობრივი აფეთქების შემთხვევაში მკურნალობას ვერავინ მოახერხებს. 

„ჩვენთვის მოულოდნელი იყო ის, რომ საზღვრების გახსნა ასე უცებ მოხდა, არ იყო შემუშავებული ეტაპობრივი გახსნა, უბრალოდ, საზღვარი სრულად გაიხსნა და დღეს ნებისმიერ მსურველს შეუძლია შემოვიდეს“, – განაცხადა კონჯარიამ.

„პანიკიორები – გადადგნენ“ 

პრემიერ-მინისტრმა ალექსანდრ ანქვაბმა, ვისი განკარგულებითაც რუსეთთან საზღვარი ყველანაირი შეზღუდვების გარეშე გაიხსნა, მედიკოსების შიშზე მკაცრი რეაქცია ჰქონდა:

„ჯანდაცვის გარკვეული მიმართულებების საკადრო უზრუნველყოფასა და პანდემიის დაძლევის სრულ მზადყოფნასთან დაკავშირებული სირთულეები სენსაციური ახალი ამბავი არ არის. ჯანდაცვის სისტემა მთლიანობაში, სასურველი დონისგან შორს არის. 

და თუ ეს ზოგიერთი ხელმძღვანელისთვის აღმოჩენად იქცა, დასკვნა მხოლოდ ერთი შეიძლება იყოს – ისინი ცუდი ხელმძღვანელები არიან, რომლებმაც არ იციან, სად და რად მუშაობენ“.

ანქვაბი გაკვირვებულია, რომ მედიკოსებს შეშფოთება საზღვრების გახსნისთვის მზადების პროცესში არ გამოუთქვამთ. 

მისი თქმით, „პანიკური განცხადებებით“, სამედიცინო სექტორის ხელმძღვანელები წინასწარ იზღვევენ თავს იმ შემთხვევისთვის, თუ ეპიდემიოლოგიური ვითარება გართულდება

„ისღა დაგვრჩენია, რესპუბლიკის ჯანდაცვის სისტემის ოფიციალურ პირებს, რომლებიც პანიკაში ჩავარდნენ, ვურჩიოთ, დაუყოვნებლივ გადადგნენ თანამდებობიდან. მოიხსენით პასუხისმგებლობა დღესვე.

ჩვე გვჭირდება ხელმძღვანელები, რომლებსაც არასტანდარტულ სიტუაციებში სწრაფი, პროფესიონალური გადაწყვეტილებების მიღება შეუძლიათ, და არა პროვოკაციული განცხადებების გამავრცელებლები, რომლებიც მზად არიან გაიქცნენ ვითარების ნებისმიერი გართულების შემთხვევაში“, – განაცხადა პრემიერმა.

4 აგვისტოს მონაცემებით, აფხაზეთში, კორონავირუსით ინფიცირებულია 107 ადამიანი. მათგან 37 გამოჯანმრთელდა, 3 პაციენტი კი გარდაიცვალა.

107-დან 60 ადამიანზე მეტი უკანასკნელი ათი დღის განმავლობაში დაინფიცირდა. 

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო