ბოლო თვეების განმავლობაში არაერთმა პოლიტიკურმა და საზოგადო მოღვაწემ, საერთაშორისო ორგანიზაციების თანამშრომელმა და ჟურნალისტმა აფხაზეთიდან განაცხადა, რომ მათ რუსეთის საზღვარზე აკავებენ და დაკითხვას უწყობენ.
საკითხები ძირითადად შიდა აფხაზურ დღის წესრიგს ეხება. რამდენიმე დღის წინ აფხაზეთის გმირმა, ლევან მიქამ ფსოუს საგუშაგოზე გაიარა ეს პროცედურა – ის დააკავეს როგორც რუსეთში გადასვლისას, ასევე სამშობლოში დაბრუნებისას.
ლევან მიქას თქმით, მას კითხვები დაუსვეს აფხაზეთში ანტირუსულ განწყობებზე და ზოგადად, სოციალურ-პოლიტიკურ მდგომარეობაზე.
„მათ აინტერესებდათ რა ხდებოდა აფხაზეთში, არის თუ არა აქ ანტირუსული განწყობები, არიან თუ არა ორგანიზაციები, რომლებიც აწარმოებენ ანტირუსულ საქმიანობას“, – განაცხადა ლევან მიქამ 31 იანვარს გამართულ პრესკონფერენციაზე.
ომის ვეტერანის თქმით, საზღვარზე მას სხვებმაც უთხრეს, რომ აჩერებენ ადამიანებს, რომელთა ანტირუსულ განწყობებზეც იღებენ ინფორმაციას.
მიქა დარწმუნებულია, რომ ამაში პირადად ასლან ბჟანიას ხელი ურევია, და რომ აფხაზეთში დაიწყო ფართო კამპანია სამოქალაქო საზოგადოებისა და მთელი არასამთავრობო სექტორის წინააღმდეგ, რომლის ნაწილიც არის კანონპროექტი უცხოური აგენტების შესახებ.
საზოგადო მოღვაწეები ახრა ბჟანია და თენგიზ ჯოპუა აფხაზი აქტივისტების საზღვარზე დაკავებას შიდაპოლიტიკური ბრძოლის ნაწილად და პოტენციური კონკურენტების ან მათი მხარდამჭერების დაშინების მეთოდად მიიჩნევენ.
„ბჟანია რუსულ მხარეს საკუთარი პოლიტიკური პრობლემების გადასაჭრელად იყენებს. მაგრამ მე მინდა დავსვა კითხვა: რატომ ეყრდნობა ისეთი სერიოზული ორგანიზაცია, როგორიც არის რუსეთის უსაფრთხოების სამსახური, აბსოლუტურად არაადეკვატურ ოპერატიულ ინფორმაციას, რომელიც მას აფხაზეთიდან ეგზავნება.“ – დაბნეულია თენგიზ ჯოპუა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
