ადვოკატის თქმით, სასამართლო მოითხოვს, სააკაშვილი სასამართლო დარბაზში გადაიყვანონ

საქართველოს მესამე პრეზიდენტის, მიხეილ სააკაშვილის ადვოკატის, ბექა ბასილაიას თქმით, თბილისის საქალაქო სასამართლოს წარმომადგენელმა დაურეკა და შეატყობინა, რომ გაკეთდება სპეციალური მოთხოვნა მიხეილ სააკაშვილის სასამართლო დარბაზში გადაყვანის შესახებ. 

ბასილაიას განმარტებით, ამ მოთხოვნის შემდეგ, იუსტიციის სამინისტრო და პენიტენციური სამსახური ვალდებულები არიან, სასამართლოს ეს მოთხოვნა შეასრულონ. 

აღსანიშნავია, რომ 6 ნოემბერს, იუსტიციის მინისტრმა რატი ბრეგაძემ განაცხადა, რომ უწყება მკაცრ რეკომენდაციას იძლევა, რომლის მიხედვით, მიხეილ სააკაშვილმა სასამართლოს გამო ციხის ტერიტორია არ დატოვოს.

ბექა ბასილაია ამბობს იმასაც, რომ თუ ხვალ მიხეილ სააკაშვილის სასამართლო პროცესი არ ჩატარდა სასამართლო დარბაზში, ეს იქნება კიდევ ერთი მაჩვენებელი იმისა, რომ ხელისუფლება არის შეშინებული და ცდილობს, მხოლოდ კრიმინალის ხელით ჩაახშოს ის დიდი პროტესტი, რაც ქართველ ხალხშია. 

“არ არსებობს არავითარი სამართლებრივი საფუძველი, ხვალინდელი პროცესის სასამართლოში არგამართვასთან და მიხეილ სააკაშვილის არგადაყვანასთან დაკავშირებით არ არსებობს“. – თქვა ადვოკატმა.

მიხეილ სააკაშვილის მონახულების შემდეგ, ადვოკატებმა კომენტარი გააკეთეს ციხეში არსებულ ვითარებაზეც. მათი თქმით, ციხეში აბსოლუტურად ჯოჯოხეთური მდგომარეობაა, ციხის დერეფანში მოძრაობა თავისუფალია და შესაბამისად, სააკაშვილზე თავდასხმა ნებისმიერ დროს შესაძლებელია. ისინი აღნიშნავენ, რომ საავადმყოფოში არ არის გარანტირებული არანაირი უფლება:

“მეტიც, აქ მიხეილ სააკაშვილი გადმოყვანილია იმისთვის, რომ მოხდეს მისი ლიკვიდაცია”. 

ბექა ბასილაიას განცხადებით, ადვოკატებს კვლავ არ ეძლევათ დაცვის უფლების განხორციელების საშუალება და არ არის დაცული კონფიდენციალურობა, ვინაიდან ისინი მესამე პრეზიდენტს საავადმყოფოს შენობაში ტელეფონით ელაპარაკნენ. 

● რა ვიცით გლდანის ციხეში გადაყვანილ მიხეილ სააკაშვილზე. 8 ნოემბრის ქრონოლოგია
● თითქმის ერთი თვეა სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე
● არჩევნები დასრულდა. რას აპირებს ოპოზიცია

დღესვე განცხადება გაავრცელა სახელმწიფო ინსპექტორის სამსახურმაც. მათი თქმით,  9 ნოემბერს სააკაშვილის მიმართ განხორციელებული შესაძლო არაადამიანური მოპყრობის ფაქტზე გამოძიება დაიწყო.

„სახელმწიფო ინსპექტორის სამსახურმა უკვე მიმართა სპეციალურ პენიტენციურ სამსახურს 2021 წლის 08 ნოემბერს, მ. სააკაშვილის გადაადგილების ამსახველი ვიდეოჩანაწერების, მათ შორის, №12 პენიტენციური დაწესებულებიდან №18 პენიტენციურ დაწესებულებაში ტრანსპორტირების ამსახველი ვიდეოჩანაწერების დაარქივების მოთხოვნით, სასამართლოს განჩინების საფუძველზე მათი გამოთხოვის მიზნით”, – წერია განცხადებაში.

ინსპექტორის სამსახურში აღნიშნავენ, რომ სისხლის სამართლის საქმის გამოძიების პროცესში ჩართულობისა და გამოძიების შესახებ სრულყოფილი ინფორმირების მიზნით, ისინი ითანამშრომლებენ მიხეილ სააკაშვილთან და მის ადვოკატებთან.

●  სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე
● მეუფე ნიკოლოზი: სააკაშვილის ღვაწლი დემეტრე თავდადებულის და დავით აღმაშენებლის მსგავსია

სახალხო დამცველმა გლდანის ციხეში არსებული სამკურნალო დაწესებულება რამდენჯერმე შეისწავლა. ომბუდსმენი ანგარიშებში წერდა, რომ კლინიკაში პაციენტის მკურნალობისთვის შეუსაბამო პირობებია.

ეს ერთ-ერთი არგუმენტი იყო მიხეილ სააკაშვილის მკურნალი ექიმებისა და ადვოკატებისთვის, რის გამოც ისინი კატეგორიულად ეწინააღმდეგებოდნენ მიხეილ სააკაშვილის გლდანის ციხეში გადაყვანას. ამას არც თავად ყოფილი პრეზიდენტი თანხმდებოდა.

ექიმთა კონსილიუმი, სამოქალაქო სექტორი, ოპოზიცია, ქართველი ხელოვანები და სხვა, არაერთი ადამიანი, ხელისუფლებას ყოფილი პრეზიდენტის სამოქალაქო, მრავალპროფილურ კლინიკაში გადაყვანას სთხოვდა.

ამ მოთხოვნით პოლიტიკური პარტია “დროას” ლიდერმა ელენე ხოშტარიამ პარლამენტში შიმშილობაც დაიწყო. ხელისუფლება კი ჯიუტად იმეორებდა, რომ საჭიროების შემთხვევაში პატიმარს მხოლოდ გლდანის ციხის სამკურნალო დაწესებულებაში გადაიყვანდა.

მიხეილ სააკაშვილი გლდანის ციხეში 8 ნოემბერს, საღამოს გადაიყვანეს.

სააკაშვილის გადაყვანის შესახებ უწყებას წინასწარ ინფორმაცია არ გაუვრცელებია. ამის შესახებ წინასწარ ინფორმაცია არც პრეზიდენტის ოჯახს ჰქონდა.

სად და როგორ გადაიყვანეს პატიმარი ექს-პრეზიდენტი, რომელსაც 40-დღიანი შიმშილობის შემდეგ მძიმე ჯანმრთელობის მდგომარეობა აქვს, რამდენიმე საათის განმავლობაში იყო უცნობი.

ამ პროცესების პარალელურად, 8 ნოემბრიდან ოპოზიციამ მიხეილ სააკაშვილის გათავისუფლებისა და რიგგარეშე არჩევნების დანიშვნის მოთხოვნით, ფართომასშტაბიანი, უწყვეტი საპროტესტო აქციები დაიწყო.

“ერთიანი ნაციონალური მოძრაობის” ლიდერმა ნიკა მელიამ განაცხადა, რომ „პროტესტი იქნება მტკიცე, ხალხმრავალი, უწყვეტი და მშვიდობიანი“ და ის გაგრძელდება იქამდე, ვიდრე ოპოზიცია საბოლოო გამარჯვებას არ მიაღწევს.