აზერბაიჯანელი გენერალი 20 წლის წინ, უკრაინაში ჩადენილი მკვლელობისთვის დააკავეს
დააკავეს აზერბაიჯანის ეროვნული გმირი, გენერალ-ლეიტენანტი როვშან აკპეროვი. მას გამოძიების პერიოდში, აღკვეთის ღონისძიების სახით, ოთხთვიანი პატიმრობა შეუფარდეს. გავრცელებული ინფორმაციით, აკპეროვის დაკავების მიზეზი, 20 წლის წინ, უკრაინაში მის მიერ ჩადენილი დანაშაული გახდა.
- აზერბაიჯანში წინადადებით გამოდიან, არჩევნებზე გამოუცხადებლობა დასჯადი გახდეს
- არასტაბილურობა, უმუშევრობა, ყარაბაღის კონფლიქტი – სამი მთავარი პრობლემა სომხეთში
- რატომ გახდა აფხაზეთი “კრიპტოვალუტის სამოთხე”
როგორც აზერბაიჯანის გენერალურ პროკურატურაში განაცხადეს, გენერალ-ლეიტენანტი როვშან აკპეროვი სისხლის სამართლის საქმეზე დააპატიმრეს, რომელზე გამოძიებასაც გენპროკურატურის საგამოძიებო სამსახური აწარმოებს. აღნიშნავენ, რომ საზოგადოების ინფორმირება ამ სისხლის სამართლის საქმეზე მოგვიანებით მოხდება.
რა მოხდა უკრაინაში 2001 წელს?
ახალი ამბების პორტალ Qafqazinfo-ს მიერ გავრცელებული ინფორმაციით, ცოტა ხნის წინ თადარიგში გაშვებულ გენერალს განზრახ მკვლელობაში ადანაშაულებენ. ამის შესახებ, თავის დროზე წერდა აზერბაიჯანული მედია.
დანაშაული 20 წლის წინ, კიევში მოხდა. როვშან აკპეროვმა კონფლიქტის ნიადაგზე, გულის არეში დანით მიყენებული ჭრილობით მოკლა ბიზნესმენი ელჩინ ალიევი.
ევროსასამართლომ განიხილა როვშან აკპეროვის საქმე
2014 წელს, ევროპის ადამიანის უფლებათა სასამართლომ განიხილა 2001 წელს, კიევში მოკლული ბიზნესმენის, ელჩინ ალიევის ოჯახის სარჩელი.
ეს საქმე გენერალ როვშან აკპეროვს უკავშირდებოდა.
როგორც გაირკვა, უკრაინულმა სამართალდამცავმა ორგანოებმა დაამტკიცეს აკპეროვის მონაწილეობა ალიევის მკვლელობაში და ბიზნესმენის გარდაცვალების ფაქტზე მოპოვებული ყველა მონაცემი აზერბაიჯანის პროკურატურას გადაუგზავნეს.
მაგრამ აზერბაიჯანულმა მხარემ ფაქტობრივად არ ჩაატარა ამ დანაშაულზე გამოძიება და სისხლის სამართლის საქმე დახურა. ალიევის ოჯახი თავის სარჩელში, რომლითაც ევროპის ადამიანის უფლებათა სასამართლოს მიმართა, მატერიალურ კომპენსაციას არ მოითხოვდა.
ვინ არის როვშან აკპეროვი?
56 წლის გენერალ-ლეიტენანტი როვშან აკპეროვი აზერბაიჯანის შეიარაღებული ძალების ბაქოსა და შამქორის კორპუსების მეთაური იყო. 2021 წლის თებერვალში, ის თავდაცვის მინისტრის ბრძანებით თადარიგში გადაიყვანეს.
არის ბაქოს ჯ. ნახიჩევანსკის სახელობის სპეციალური სამხედრო სკოლისა და კიევის უმაღლესი სამხედრო სამეთაურო სასწავლებლის კურსდამთავრებული.
სასწავლებლის დამთავრების შემდეგ, ლეიტენანტი აკპეროვი შემდგომი სამსახურის გასაგრძელებლად კავკასიის სამხედრო ოლქში გააგზავნეს. ის 75-ე მოტომსროლელთა დივიზიის, 342-ე მოტომსროლელთა პოლკის, მზვერავთა ოცეულის მეთაურად დანიშნეს, რომელიც აზერბაიჯანის საბჭოთა სოციალისტური რესპუბლიკის ქალაქ ნახიჩევანში იყო განთავსებული.
1987 წელს, ის საბჭოთა ჯარების შეზღუდული კონტინგენტის შემადგენლობაში, ავღანეთში გაგზავნეს. ერთი წლის შემდეგ, კავკასიის სამხედრო ოლქსა და ძველ სამსახურს დაუბრუნდა. 1989 წელს, 409-ე მოტომსროლელთა პოლკის დაზვერვის დანაყოფის მეთაურად დაინიშნა.
მონაწილეობა მიიღო ყარაბაღის პირველ ომში.
როვშან აკპეროვი მონაწილეობდა როვშან ჯავადოვის ხელმძღვანელობით მოქმედი აზერბაიჯანის პოლიციის სპეციალური დანიშნულების ქვედანაყოფის აჯანყების ჩახშობაში, 1995 წლის მარტში. 2002 წელს, გენერალ-ლეიტენანტის წოდება მიიღო. 2011 წელს, აზერბაიჯანის შეიარაღებული ძალების შამქორის კორპუსის მეთაურად დანიშნეს.
2004 წლის 5 ოქტომბერს, პრეზიდენტის ბრძანებით, მას აზერბაიჯანის ეროვნული გმირის წოდება მიანიჭეს.
დაქორწინებულია და ოთხი შვილი ჰყავს.
