რუსეთის სახელმწიფო სათათბირომ ოჯახური ძალადობის დეკრიმინალიზაციის კანონი საბოლოოდ მიიღო

რუსეთის სახელმწიფო სათათბირომ საბოლოო, მესამე მოსმენით  ოჯახური ძალადობის დეკრიმინალიზაციის შესახებ  რეზონანსული კანონპროექტი  მიიღო.

მესამე მოსმენით კანონის მიღებას ხმა 380-მა, წინააღმდეგ  სამმა დეპუტატმა მისცა. კომუნისტურ პარტიას კენჭისყრაში მონაწილეობა არ მიუღია.

კანონპროექტი სისხლის სამართლის კოდექსის  116-ე მუხლიდან –  „ცემა“ – სიტყვების „ახლო ნათესავების მიმართ“ ამოღებას და ამით სისხლის სამართლის პასუხისმგებლობისგან ნათესავების მიერ ადამიანის ცემის ფაქტის გათავისუფლებას ითვალისწინებს. კანონის თანახმად, ოჯახური ძალადობის პირველი შემთხვევა, რომელსაც ჯანმრთელობის დაზიანება არ მოჰყვება, ადმინისტრაციულად დაისჯება – ჯარიმით ან 15 დღიანი პატიმრობით.

პარტია „ედიანია როსიას“ წარმომადგენელმა ანდრეი ისაევმა აღნიშნა, რომ საუბარია არა ოჯხური ძალადობის უფლების მიცემაზე ან მის გამართლებაზე, არამედ „უბრალოდ გატყეპვასა და სილის გაწვნაზე“. „თუ მარტოხელა დედა თავის ვაჟს სილას გააწნავს, ის სოსხლის სამართლის დამნაშავე ხდება. არადა, ვინმე უცხო ბიძას ამისთვის ჯარიმით დასჯიან“, – ციტირებს „მედუზა“ ისაევის გამოსვლას.

თავის მხრივ, კომუნისტმა იური სინელშიკოვმა განაცხადა, რომ „ეს კანონი  ძალადობას, როგორც ქცევის ნორმას გაამყარებს“.

კანონპროექტის ავტორები „ედინაია როსიას“ დეპუტატები არიან ოლგა ბატალინას ხელმძღვანელობით, ასევე – ფედერაციის საბჭოს წევრი ელენა მიზულინა და რამდენიმე სენატორი.

ეს ინიციატივა გასული წლის ივნისში სისხლის სამართლის კოდექსში შეტანილ ცვლილებებზე პასუხს წარმოადგენს, როელთა თანახმად, ცემის ფაქტის დეკრიმინალიზაცია მოხდა. თუმცა, ერთ-ერთი გამონაკლისი ახლო ნათესავების ცემა გახდა, რისთვისაც სისხლის სამართლის პასუხისმგებლობა იყო გათვალისწინებული.

სენატორი ელენა მიზულინა მაშინვე გამოვიდა ამ ცვლილებების წინააღმდეგ და განაცხადა, რომ ისინი „ანტიოჯახურია“. „კანონი კრძალავს ოჯახში შერიგებასა და პატიებას. მაგრამ პატიების უნარი  – ეს ეროვნული ტრადიციის ნაწილია, კერძოდ, მართლმადიდებლური ტრადიციის. და ამ თვალსაზრისით, „ გატყეპვის შესახებ კანონი“ ოჯახის მიმართ სიძულვილის აქტად იქცა“, – აღშფოთებით აცხდებდა მიზულინა ტრიბუნიდან.