წინა წლის აგვისტოსთან შედარებით რუსეთიდან ფულადი გზავნილები თთქმის 88%-ით შემცირდა

რუსეთიდან ფულადი გზავნილები

საქართველოში ფულადი გზავნილების მოცულობა შემცირდა. ეროვნული ბანკის მონაცემებით, აგვისტოს თვეში ქვეყანაში უცხოეთიდან 295 მილიონ დოლარზე მეტი გადმოირიცხა, რაც გასული წლის იმავე პერიოდთან შედარებით დაახლოებით 8%-ით ნაკლებია.

თუმცა საერთო კლების ფონზე ყველაზე თვალსაჩინო ცვლილება რუსეთიდან გადმორიცხვებს შეეხო. ქვეყანა, რომელიც ბოლო წლების განმავლობაში საქართველოში ფულადი გზავნილების ერთ-ერთი მთავარი წყარო იყო, აგვისტოში უკვე მეთერთმეტე ადგილზე აღმოჩნდა.

რუსეთიდან საქართველოში აგვისტოში მხოლოდ 5 მილიონი დოლარი გადმოირიცხა, თითქმის 88%-ით ნაკლები, ვიდრე ერთი წლის წინ. ამგვარად, რუსეთი პირველად აღმოჩნდა იმ ქვეყნების მიღმა, რომლებიც საქართველოში ფულადი გზავნილების ძირითად ნაწილს უზრუნველყოფენ.

ელოდებიან თუ არა საქართველოში რუსეთიდან მიგრანტების ახალ ტალღას

რუსეთიდან მიგრანტების ახალი ტალღა პირველ რიგში უძრავი ქონების გაქირავების ბაზარზე აისახება, ვარაუდობენ ექსპერტები

ამ ცვლილებას წინ უძღოდა რუსეთის წინააღმდეგ ევროკავშირის სანქციების ახალი პაკეტის ამოქმედება. ივლისის ბოლოს რუსულმა საგადახდო და ფინანსური სერვისების სისტემამ Zolotaya Korona-მ საქართველოში ფულადი გზავნილების განხორციელება შეაჩერა.

აგვისტოში ყველაზე მეტი თანხა საქართველომ აშშ-დან მიიღო, რომელმაც 64 მილიონ დოლარზე მეტი შეადგინა. მას იტალია და გერმანია მოჰყვნენ. ამ ქვეყნებიდან გზავნილები, პირიქით, წლიურად გაიზარდა.

მნიშვნელოვანი წყაროებად რჩებიან ასევე საბერძნეთი და ისრაელი, რაც კიდევ ერთხელ აჩვენებს, რომ საქართველოში ფულადი გზავნილების გეოგრაფია თანდათან იცვლება და რუსეთის წილი ამ სურათში სწრაფად მცირდება.

ქვეყნები, საიდანაც გასულ თვეს საქართველოში ყველაზე მეტი თანხა გადმოირიცხა: 

1. აშშ – $64.14 მილიონი.
2. იტალია – $55.22 მილიონი. 
3. გერმანია – $31.31 მილიონი.
4. საბერძნეთი – $28.24მილიონი.
5. ისრაელი – $27.92 მილიონი.
6. თურქეთი – $10.56 მილიონი.
7. ესპანეთი – $10.26 მილიონი.
8. ყაზახეთი – $8.04 მილიონი.
9. გაერთიანებული სამეფო – $7.29 მილიონი.
10. საფრანგეთი – $6.91 მილიონი.
11. რუსეთის ფედერაცია – $5.07 მილიონი. 
12. ირლანდია – $5.06 მილიონი.
13. აზერბაიჯანი – $2.98 მილიონი.
14. კანადა – $2.92 მილიონი.
15. ყირგიზეთი – $2.19 მილიონი

The Foreign Policy Centre: რუსეთი სანქციებს გვერდს უვლის და საქართველო ამ სისტემის ცენტრშია

ორგანიზაციის თანახმად, შემჩნეულია ნავთობის “წარმოშობის გათეთრების” რისკი”

ამასთან, აგვისტოში საქართველოდან უცხოეთში დაახლოებით 34 მილიონი დოლარი გადაიგზავნა, რაც წინა წლის შესაბამის პერიოდთან შედარებითაც შემცირებული მაჩვენებელია.