რუსეთი ჟენევის დისკუსიებზე საქართველოსთან ძალის გამოუყენებლობის შეთანხმების გაფორმებას კვლავ მოითხოვს

რუსეთი ჟენევის დისკუსიებზე

რუსეთის საგარეო საქმეთა სამინისტრომ ჟენევის საერთაშორისო დისკუსიების 67-ე რაუნდის დასრულების შემდეგ განაცხადა, რომ მოსკოვი მხარს უჭერს მოლაპარაკებების ფორმატის გაგრძელებას და კვლავ მოითხოვს საქართველოს, აფხაზეთსა და სამხრეთ ოსეთს შორის ძალის გამოუყენებლობის შესახებ იურიდიულად სავალდებულო შეთანხმების გაფორმებას.

რუსეთის საგარეო უწყების ცნობით, დისკუსიები 30 ივნისიდან 1 ივლისამდე ჟენევაში გაიმართა გაეროს, ეუთოსა და ევროკავშირის თანათავმჯდომარეობით. შეხვედრაში მონაწილეობდნენ საქართველოს, რუსეთის, აშშ-ის, ასევე აფხაზეთისა და სამხრეთ ოსეთის წარმომადგენლები.

მინსკის იდეა და ჟენევის ფორმატი — ზახაროვა ამბობს, რომ მოლაპარაკებებზე მთავარი არა ადგილი, არამედ შეთანხმებაა

“რამდენიმე წლის წინ რუსეთმა წამოაყენა ეს წინადადება და ამას მხარი აქტიურად დაუჭირა აფხაზეთმა და სამხრეთ ოსეთმა”

განცხადების თანახმად, მოსკოვი მიიჩნევს, რომ ჟენევის ფორმატი „საიმედო სამოლაპარაკო ჩარჩოა“ თბილისის, სოხუმისა და ცხინვალის პირდაპირი დიალოგისთვის და მისი მიზანი პოსტკონფლიქტური ურთიერთობების აღდგენაც არის.

რუსეთის საგარეო საქმეთა სამინისტრო აცხადებს, რომ არსებული მანდატის ფარგლებში აუცილებელია პრაქტიკული ნაბიჯების გადადგმა აფხაზეთისა და სამხრეთ ოსეთის უსაფრთხოების უზრუნველსაყოფად. უწყების შეფასებით, საქართველოსა და ორ „სუვერენულ რესპუბლიკას“ შორის ძალის გამოუყენებლობის შესახებ იურიდიულად სავალდებულო შეთანხმების გაფორმება მნიშვნელოვნად შეუწყობდა ხელს როგორც მოლაპარაკებების პროცესის წინსვლას, ისე რეგიონში სტაბილურობის განმტკიცებას.

მოსკოვი ასევე ამტკიცებს, რომ მსგავსი შეთანხმების საჭიროება იზრდება ნატოსა და საქართველოს თანამშრომლობის გაღრმავების ფონზე. განცხადებაში ნათქვამია, რომ ალიანსი საქართველოს ტერიტორიაზე სამხედრო სწავლებებსა და სხვა სამხედრო-საწვრთნელ ღონისძიებებს ატარებს, რასაც რუსეთი უსაფრთხოების რისკად აფასებს.

რუსეთის საგარეო უწყებამ აღნიშნა, რომ ადგილზე არსებული ვითარება ამჟამად „შედარებით მშვიდია“ და ეს, მათი შეფასებით, ჟენევის დისკუსიების ფარგლებში მოქმედი მექანიზმების შედეგია. მათ შორის დასახელებულია მოლაპარაკებების რეგულარული რაუნდები, 24-საათიანი „ცხელი ხაზები“ და ერგნეთში ინციდენტების პრევენციისა და მათზე რეაგირების მექანიზმის შეხვედრები.

ამასთან, მოსკოვი ითხოვს გალში მოქმედი ანალოგიური მექანიზმის აღდგენას და საქართველოს სახელმწიფო საზღვრის დელიმიტაციის პროცესის დაწყებას აფხაზეთთან და სამხრეთ ოსეთთან.

განცხადებაში ასევე კრიტიკულად არის შეფასებული საქართველოს პოზიცია ჰუმანიტარულ საკითხებთან დაკავშირებით. რუსეთის საგარეო საქმეთა სამინისტრო თბილისს ადანაშაულებს თემის პოლიტიზებაში და აცხადებს, რომ ეს ხელს უშლის ჟენევის საერთაშორისო დისკუსიების ფარგლებში კონსტრუქციულ დიალოგს.

მოსკოვი ასევე აკრიტიკებს საქართველოს ინიციატივით გაეროს გენერალურ ასამბლეაზე ყოველწლიურად წარდგენილ რეზოლუციას იძულებით გადაადგილებულ პირებსა და ლტოლვილებთან დაკავშირებით.

რუსეთის საგარეო უწყების განცხადებით, საკითხის გაეროს პლატფორმაზე განხილვა არღვევს იმ შეთანხმებას, რომლის მიხედვითაც მსგავსი თემები ჟენევის საერთაშორისო დისკუსიების ფარგლებში უნდა განიხილებოდეს, სადაც, როგორც მოსკოვი აცხადებს, სოხუმისა და ცხინვალის წარმომადგენლებს საკუთარი პოზიციის წარმოდგენის შესაძლებლობა აქვთ.

"ახალი სამხრეთ კავკასია: გადამწყვეტ როლს მარშრუტები თამაშობს და არა საზღვრები" — მოსაზრება

“ახალ სისტემაში რეგიონის სახელმწიფოების როლები იცვლება”

2008 წლის აგვისტოს ომის შემდეგ საქართველოსა და რუსეთს შორის შეწყდა ყველანაირი პირდაპირი დიალოგი. 2008 წლის 12 აგვისტოს ცეცხლის შეწყვეტის შეთანხმების შესაბამისად მიღებულ იქნა გადაწყვეტილება, რომ შექმნილიყო ჟენევის საერთაშორისო მოლაპარაკებების ფორმატი, სადაც რუსეთი და საქართველო სოხუმისა და ცხინვალის წარმომადგენლებთან და ასევე საერთაშორისო ორგანიზაციების წარმომადგენლებთან ერთად, სხვადასხვა ჰუმანიტარულ საკითხზე იმსჯელებდა. ჟენევაში წელიწადში 4 რაუნდი ტარდება.