აფხაზ ოპოზიციონერ დეპუტატს სისხლის სამართლის ბრალდება ემუქრება. საბოლოო სიტყვა პარლამენტს ეკუთვნის

ბრალდება დეპუტატ კან კვარჩიას წინააღმდეგ

აფხაზეთის უზენაესმა სასამართლომ, ოპოზიციონერი დეპუტატის კან კვარჩიას ქმედებებში, დანაშაულის ნიშნების არსებობა დაადგინა. ეს იმას ნიშნავს, რომ მას შესაძლოა საპარლამენტო იმუნიტეტი ჩამოერთვას. გადაწყვეტილება ახლა პარლამენტზეა.

2026 წლის 16 მარტს უზენაესმა სასამართლომ განიხილა და დააკმაყოფილა გენერალური პროკურატურის შუამდგომლობა – დეპუტატ კან კვარჩიას ქმედებებში დანაშაულის ნიშნების არსებობის შესახებ. საუბარია აფხაზეთის სისხლის სამართლის კოდექსის 113-ე მუხლით გათვალისწინებულ დანაშაულზე – მკვლელობის მუქარა.

სასამართლოს დასკვნა, საქმის მასალებთან ერთად, პარლამენტს გადაეგზავნება, რათა მიიღონ თანხმობა კან კვარჩიას ბრალდებულის სახით პასუხისგებაში მიცემაზე პროკურატურის მიერ აღძრული სისხლის სამართლის საქმის ფარგლებში.

აფხაზ ოპოზიციონერს საპარლამენტო იმუნიტეტს ართმევენ

პარლამენტის წევრი კან კვარჩია სკანდალურ “რუსი პოლიტსტრატეგების საქმეში“ ერთ-ერთი ბრალდებულია

საქმე ეხება სკანდალს, რომელიც დაკავშირებულია რუს პოლიტტექნოლოგებთან, რომლებიც უკანონოდ მუშაობდნენ პროსამთავრობო კანდიდატებისთვის, აფხაზეთში, 2025 წლის ნოემბერში ჩატარებული მუნიციპალური არჩევნების დროს.

კან კვარჩიამ, რამდენიმე სხვა ოპოზიციონერ აქტივისტთან ერთად, პოლიტტექნოლოგების საქმიანობა ამხილა და ისინი აფხაზეთის სახელმწიფო უსაფრთხოების სამსახურს (СГБ) გადასცა შემდგომი გამოძიებისთვის. თუმცა, უსაფრთხოების სამსახური მხოლოდ იმით შემოიფარგლა, რომ პოლიტტექნოლოგები უბრალოდ რუსეთში გააბრუნა.

თავის მხრივ, მათ რუსეთის ფედერაციის საგამოძიებო კომიტეტს მიმართეს საჩივრით და კომიტეტმა აფხაზ ოპოზიციონერებზე აღძრა სისხლის სამართლის საქმე რუსეთის მოქალაქეებზე ყაჩაღური თავდასხმის ბრალდებით.

ამის შემდეგ აფხაზეთის სამართალდამცავ ორგანოებსაც მოუწიათ ანალოგიური საქმის აღძვრა. ამ დროისთვის ოთხი ოპოზიციონერი შინაპატიმრობაში იმყოფება, კიდევ ორ ადამიანს კი აფხაზეთის დატოვება აეკრძალა.

რაც შეეხება კან კვარჩიას, მის წინააღმდეგ ჯერჯერობით ვერანაირი ზომა ვერ მიიღება, რადგან იგი დეპუტატის იმუნიტეტით სარგებლობს. ამის მოხსნას ცდილობს ახლა პროკურატურა.

აფხაზეთში რუსი პოლიტიკური სტრატეგები ფარულად მუშაობდნენ ე.წ. სამთავრობო კანდიდატებისთვის

ერთი გამოსცემდა “ადგილობრივ“ გაზეთს და ოპონენტების წინააღმდეგ ცილისმწამებლურ კამპანიას აწარმოებდა

პოლიტოლოგი ახრა ბჟანია სასამართლოს გადაწყვეტილებას აფასებს, როგორც აფხაზეთის სახელმწიფო ინსტიტუტების „ბუტაფორიზაციის“ ნიშანს.

„ის ადამიანები, რომლებიც ჩვენი უფლებების დასაცავად პასუხისმგებელ თანამდებობებზე დავნიშნეთ, მეორე [რუსული] პასპორტის დაკარგვის პანიკური შიშით, მზად არიან დაადასტურონ ყველაზე აბსურდული ბრალდებები აფხაზი მოქალაქეების წინააღმდეგ“, – ამბობს ბჟანია და მიანიშნებს, რომ აფხაზი მოსამართლეები კრემლს კვალდაკვალ მიჰყვებიან და მის სასარგებლოდ გამოაქვთ განაჩენები.

პოლიტოლოგი იმედოვნებს, რომ პარლამენტი კან კვარჩიას გენერალურ პროკურატურას არ გადასცემს და მის საპარლამენტო იმუნიტეტს შეინარჩუნებს.