იანვარში საგარეო სავაჭრო ბრუნვა, წინა წელთან შედარებით 23.6%-ით შემცირდა - საქსტატი

საქსტატის მონაცემები

საქართველოს საგარეო სავაჭრო ბრუნვამ 2026 წლის იანვარში 1,609.9 მილიონი აშშ დოლარი შეადგინა, რაც წინა წლის ანალოგიურ პერიოდთან შედარებით 23.6%-ით ნაკლებია. ექსპორტი 480.4 მილიონ დოლარს აღწევს და წინა წელთან შედარებით 19%-ით გაიზარდა, იმპორტი კი 1,129.5 მილიონ დოლარს შეადგენს, რაც 33.7%-ით შემცირებულია. შედეგად, ქვეყანაში საგარეო სავაჭრო ბალანსი 649.1 მილიონი დოლარით ნეგატიურია. ამის შესახებ “საქსტატის” ახალ მონაცემებში ვკითხულობთ.

"აი, ფაქტის" გამოძიება: საქართველოში შემოსული 19 გემი "ჩრდილოვანი ფლოტის" კრიტერიუმებს აკმაყოფილებს

გამომძიებელი ჟურნალისტები საქართველოს პორტებში – ბათუმში, ფოთსა და ყულევში შემოსულ გემებს 2 თვის განმავლობაში აკვირდებოდნენ

საქართველოს სავაჭრო მონაცემების მიხედვით, ქვეყნის ათი უმსხვილესი სავაჭრო პარტნიორი ქვეყნის წილმა მთლიან ბრუნვაში 67.9% შეადგინა. ყველაზე დიდი პარტნიორები იყვნენ თურქეთი (247.1 მილიონი დოლარი), ჩინეთი (223.3 მილიონი დოლარი) და რუსეთი (195.4 მილიონი დოლარი). აღსანიშნავია, რომ აშშ აღარ არის უმსხვილესი სავაჭრო პარტნიორების სამეულში.

ექსპორტში, 10 უმსხვილესი პარტნიორი ქვეყნის წილმა მთლიან ექსპორტში 74.5% შეადგინა. სამეული ასეთია:

• ჩინეთი (66.1 მლნ დოლარი),
• თურქეთი (52.1 მლნ დოლარი)
• ყირგიზეთი (49.9 მლნ დოლარი).

ექსპორტში დსთ-ის ქვეყნების წილი 46.7%-ს, ევროკავშირის წევრების – 16.1%-ს, დანარჩენი ქვეყნების კი 37.2%-ს შეადგენს.

საექსპორტო პროდუქტებიდან წამყვანი იყო მსუბუქი ავტომობილები (100.7 მლნ დოლარი, მთლიან ექსპორტში 21%), ნავთობი და ნავთობპროდუქტები (58.7 მლნ დოლარი, 12.2%) და ძვირფასი ლითონების მადნები (51.0 მლნ დოლარი, 10.6%).

იმპორტში 10 უმსხვილესი პარტნიორის წილმა 71.4% შეადგინა, მათ შორის თურქეთი (195.0 მლნ დოლარი), ჩინეთი (157.3 მლნ დოლარი) და რუსეთი (156.8 მლნ დოლარი).

იმპორტში ევროკავშირის წილი 23.4%, დსთ-ის ქვეყნების – 23.3%, დანარჩენი ქვეყნების – 53.3%-ს შეადგენს. ყველაზე მეტი იმპორტი მსუბუქ ავტომობილებს დაეთმო (150.0 მლნ დოლარი, 13.3%), შემდეგ ნავთობი და ნავთობპროდუქტები (96.7 მლნ დოლარი, 8.6%) და ნავთობის აირები (79.1 მლნ დოლარი, 7%).

კომენტარი: ასეთი უსიცოცხლო სისტემა არც რუსი ოლიგარქებისთვის არის საინტერესო და რუსული რეჟიმისთვისაც ზედმეტია

დიმიტრი ცქიტიშვილი: “ეს არის მექანიზმი, რომელიც აფასებს რეჟიმის ანტიდემოკრატიულობის მასშტაბებს და მაღალი ალბათობით დაადგენს კონკრეტულ დანაშაულებს”

კომენტარი

“საქსტატის” ახალ მონაცემებზე საუბრისას ეკონომისტი რომან გოცირიძე ამბობს, რომ ქვეყანა დიდ სკანდალში ეხვევა.

რომან გოცირიძე: “ახლა უფრო ნათელია, თუ რატომ შეიყვანა ევროკავშირმა ყულევის პორტი დასასანქცირებელთა სიაში.

ქვეყანა დიდ სკანდალში ეხვევა. საქსტატმა გამოაქვეყნა 2026 წლის საგარეო ვაჭრობის შესახებ ინფორმაცია და საოცარ ამბავს ვიგებთ: ქვეყანას, რომელიც არ ეწევა ნავთობის გადამუშავებას, მაშინ, როცა ყულევში მშენებარე ქარხანა ჯერაც არ ამოქმედებულა, იანვარში თურმე გააქვს 56 მილიონი დოლარის ღირებულების მზა ნავთობპროდუქტი. ნედლი ნავთობი კი არა, მზა ნაწარმი დიზელის საწვავის ან ბენზინის სახით. გრძელდება ის აფიორა, რაც გასული წლის ნოემბერ-დეკემბერში ხდებოდა.

შარშან საქართველომ ექსპორტით(და არა რეექსპორტით) გაიტანა 79,5 მილიონი დოლარის ღირებულების 151,7 ათასი ტონა მზა საწვავი. ეს ოპერაცია განხორციელდა ძირითადად ნოემბერ-დეკემბრის თვეში. ეს ემთხვევა ოქტომბრის თვეში ყულევის მშენებარე ნავთობგადამამუშაველ ქარხანაში 105 ტონა რუსული ნედლი ნავთობის(ასეა კლასიფიცირებული საბაჟოს მიხედვით) შემოტანას.

პრობლემა იმაშია, რომ ეს ქარხანა ჯერაც არაა შესული ექსპლუატაციაში. მაშინ რა შეიძლება მომხდარიყო:

-საბუთებში მითითებული ნედლი ნავთობის ნაცვლად შემოიტანეს რუსული წარმოების დიზელის საწვავი ან ბენზინი და ექსპორტზე გაიტანეს როგორც ქართული პროდუქტი. ეს საბაჟო საბუთების გაყალბება და სისხლის სამართლის დანაშაულია. ამავე დროს, ეს სანქციების გვერდის ავლაცაა, ვინაიდან რუსული ნავთობპროდუქტი ევროკავშირის ქვეყანაში(მალტა) გაიყიდა.

– შესაძლოა შემოტანილი იყო დიზელის საწვავის ნახევარფაბრიკატი(თუმცა საბაჟოზე ნედლი ნავთობია დაფიქსირებული), მოხდა მასში მცირე მოცულობით სხვა ნივთიერებების შერევა, ანუ ხარისხის “გასწორება” დამამატებით. ეს არ არის ნავთობის გადამუშავება, ეს ლოგისტიკური კოსმეტიკაა. მისი გატანა თუნდაც ამ მანიპულაციით არის სანქციების დარღვევა.

საქართველოს ნავთობგადამამუშავებელი ქარხნის მფლობელის, მაკა ასათიანის ოჯახის ბიზნესპარტნიორი ГРУ-ს გენერლის შვილია

ნავთობკომპანია “რუსნეფტმა” ამ თვეში საქართველოში ახალაშენებულ ყულევის ნავთობგადამამუშავებელს პირველი ტვირთი მიაწოდა

მეორე ვერსიაა, შემოვიდა ყულევის ტერმინალში რუსული ნედლი ნავთობი და გავიდა ექსპორტზე აზერბაიჯანული მზა ნავთობროდუქტი, ოღონდ როგორც საქართველოში წარმოებული.

“აზერბაიჯანული” სოკარიც დიდ შარშია გახვეული, რადგან ყულევის ტერმინალი მისი, ანუ აზერბაიჯანის სახელმწიფოს საკუთრებაა.

ყულევის ნავთობგადამამუშავებელი ქარხანა, რომელსაც რუსეთთან აკავშირებენ, როგორც ზემოთ ითქვა, ჯერაც არ ამუშავებულა და უკვე სერიოზული დარღვევებით იწყებს ოპერირებას და დიდ საფრთხეს უქმნის ქვეყანას.

შეიძლება ვინმემ იფიქროს, მერე რა, ვიხეიროთ შექმნილი მდგომარრობით, ფული ხომ ქვეყანაში რჩება? არავითარი ფული არ რჩება: შემოვიდა რუსული საქონელი, გადმოიტვირთა ყულევის ტერმინალის რეზერვეუარებში, ისევ გადაიტვირთა გემზე და გავიდა უცხოეთში. არავითარი დამატებული ღირებულება არ შექმნულა, არც ყულევის ქარხანას მიუღია მოგება, არც ბიუჯეტში შესულა ფული, არც მუშებს მიუღიათ ხელფასი. ნაღები მოხსნეს ვიღაცებმა და ქვეყანა სერიოზული რისკის ქვეშ ჩააყენეს.

“სოკარმაც” უნდა გასცეს პასუხი ბრალდებებს. ევროკავშირში მისი პორტის დასანქცირების საკითხი იხილება და ჯერჯერობით იტალია აფერხებს ამ პროცესს. ალბათ ერთ-ერთი მიზეზი ისიცაა, რომ აზერბაიჯანული გაზი საქართველოს გავლით შედის იტალიაში.

სისხლიანი ფულით ხელის მოთბობა და ქვეყნის იზოლაციაში მოქცევა არავის შერჩება.”

ყულევის პორტი – ევროკავშირის სანქციების სამიზნე. რას ნიშნავს ეს საქართველოსთვის

რუსული კავშირების გამო ყულევის პორტი ბოლო თვეებში რამდენჯერმე აღმოჩნდა საერთაშორისო ყურადღების ცენტრში