გერმანიის ელჩი: ჩვენ არ ვართ რეჟიმის შემცვლელი აგენტები, არ გვადარდებს, ვინ მართავს საქართველოს
გერმანიის ელჩის ინტერვიუ
გერმანიის ელჩის საქართველოში, პეტერ ფიშერის, “ინტერპრესნიუსისთვის” მიცემული ინტერვიუ გამოირჩეოდა მკაფიო განცხადებებით ქართული პოლიტიკური ნარატივებისა და ევროკავშირთან საქართველოს ურთიერთობების შესახებ. ელჩის თქმით, ბოლო წლებში გავრცელებული მტკიცებები ევროკავშირის “გლობალურ ომის პარტიად“ წარმოჩენასა და “დიფ-სთეითის“ არსებობაზე საფუძველს მოკლებულია და მიზნად მხოლოდ პოლიტიკური პასუხისმგებლობის სხვაზე გადატანას ემსახურება.
“ჩვენ არ ვართ უცხოური აგენტები. არ გვადარდებს, ვინ მართავს საქართველოში. ჩვენ ვაქვეყნებთ ჩვენს მოსაზრებას ადამიანის უფლებებისა და ფუნდამენტური თავისუფლებების დაცვის შესახებ, მაგრამ არასდროს ვიქნებით რეჟიმის შეცვლის აგენტები“, — აღნიშნა ფიშერმა.
ელჩის თქმით, მსგავსი ბრალდებები ევროკავშირის მიმართ მიზნად მხოლოდ “გარე მტრებზე“ პასუხისმგებლობის გადატანს ემსახურება, რაც, მისი განმარტებით, კლასიკური “პროპაგანდისტული ხრიკია”.
ფიშერის თქმით, ევროპა ყოველთვის იყო საქართველოს სტრატეგიული პარტნიორი დემოკრატიის, ეკონომიკის განვითარებისა და ევროატლანტიკური ინტეგრაციის პროცესში.
“ჩვენ ვიყავით საქართველოს საუკეთესო მეგობარი და პარტნიორი უკანასკნელი 30 წლის განმავლობაში. უცნაურია, რომ დღეს ზოგიერთი ნარატივის მიხედვით, ჩვენ მხარს ვუჭერთ ძალადობრივ გადატრიალებას“, — თქვა ფიშერმა.
ელჩი ასევე შეეხო უვიზო მიმოსვლის საკითხს. მისი თქმით, ევროკავშირის გადაწყვეტილება ვიზების შეჩერებაზე დამოკიდებულია საქართველოს მოქმედებებსა და საერთაშორისო ვალდებულებების შესრულებაზე:
“უვიზო მიმოსვლა პრივილეგიაა, არა უფლება. კომისია ყოველწლიურად განიხილავს მდგომარეობას, და ყველაფერი დამოკიდებული იქნება იმაზე, როგორ დაიცავს ქვეყანა ადამიანის უფლებებს.”
ფიშერმა ყურადღება გაამახვილა ქართველი პოლიტიკოსების განცხადებების სპეციფიკაზეც. მან უპასუხა კითხვას, რატომ აბრალებენ ელჩს “დიფ-სთეითში“ ჩართულობას:
“ეს არ არის პირადად ჩემთან დაკავშირებული, საქმე ნარატივშია. მე მხოლოდ გამოყენებული ვარ, როგორც “გარე მტერი‘, ან “განტევების ვაცი”, – თქვა ელჩმა.
დიპლომატმა ასევე გაამახვილა ყურადღება კონკრეტულ პირებზეც და მაგალითად მოიყვანა საქართველოს პარლამენტის თავმჯდომარის, შალვა პაპუაშვილის პროფესიული გამოცდილება:
“ბატონ პაპუაშვილს კარგად ვიცნობ. ვიკიპედიის მონაცემებით, ის 4 წელი გერმანიაში სწავლობდა სტიპენდიით, 17 წელი კი GIZ-ის პროექტებში ჩართული იყო, რომელიც გერმანიის განვითარების თანამშრომლობის სააგენტოა. ჯამში, 21 წელი გერმანულ ანაზღაურებაზე მუშაობდა.“
ფიშერმა ასევე დასძინა, რომ მიუხედავად ბოლო დროს გავრცელებული ნარატივებისა, გერმანია და ევროკავშირი მზად არიან მხარი დაუჭირონ საქართველოს, ხელი შეუწყონ უვიზო მიმოსვლასა და სტაბილურ პარტნიორობას.
“ჩვენ გვსურს, რომ ქართველები უსაფრთხოდ ჩავიდნენ გერმანიასა და ევროკავშირის სხვა ქვეყნებში, როგორც ამას ახლა აკეთებენ. საქართველოს კანდიდატის სტატუსი აქვს და ჩვენ გვსურს, რომ ევროკავშირის წევრი გახდეს.“ — თქვა ფიშერმა.
“გერმანიის ელჩი ცდილობს ძირი გამოუთხაროს ქართულ დემოკრატიას” – შალვა პაპუაშვილი
მანამდე შალვა პაპუაშვილი კიდევ ერთხელ დაესხა თავს გერმანიის ელჩს და მას ბრალი დასდო “ქართული დემოკრატიის ძრის გამოთხრაში”. პაპუაშვილის თქმით, საქართველოსა და გერმანიას შორის უერთიერობების გაუარესება ფიშერმა და მისმა ხელმძღვანელობამ გამოიწვია.
“გერმანიის ელჩს საქართველოსთან მხოლოდ და მხოლოდ სამწლიანი მისია აკავშირებს, მე და ჩვენი გუნდის ბევრ წევრს მრავალწლიანი ურთიერთობა გვაქვს, მათ შორის ჩვენი პროფესიული გამოცდილებიდან და განათლებიდან, გერმანიასთან და გერმანელ ხალხთან.
მისი [ელჩი ფიშერის] წუხილი რა მოსატანია იმ წუხილთან, რაც ჩვენ გვაქვს. იმის გამო თუ რა უქნეს ქართულ-გერმანულ ურთიერთობას, იმ ხელმძღვანელობამ, რომელმაც ფაქტობრივად აგურ-აგურ ნაშენი 30-წლიანი მეგობრობა ჩვენს ორ ქვეყანას და ხელისუფლებებს შორის, რომელიც გენშერის დროიდან დაიწყო და რეპუტაცია გერმანიისა განსაკუთრებით მაღალი იყო ქართულ საზოგადოებას შორის და დღეს, როდესაც ადამიანებს, საზოგადოებას ვხვდები, მეკითხებიან, რა სჭირს გერმანიას, რატომ იქცევა ასე?!
ქვეყანა, რომელმაც პირველი საელჩო გახსნა საქართველოში, მისი ელჩის სახით, წარმოდგენილია ქართველი ხალხის თვალში ისე, თითქოს არის ქვეყანა, რომელიც პირველი უთხრის ძირს ქართულ დემოკრატიას. ამას გვეკითხება ჩვენ ჩვენი მოსახლეობა – რა სჭირს, რა დაემართა გერმანიას, რომ მისი ელჩი ცდილობს ძირი გამოუთხაროს ქართულ დემოკრატიას.
ასე რომ, გასცენ პასუხი ქართველ ხალხს ამასთან დაკავშირებით.” – განაცხადა პაპუაშვილმა.
