სახელისუფლებო მედიის კოორდინირებული შეტევა ღარიბაშვილის ოჯახზე: სცენაზეა ფეიკ-ანგარიშები
მითების დეტექტორის კვლევა
იმის მიხედვით, თუ რა პოსტებს აქვეყნებენ სამთავრობო მედიები და მათი ტროლები, კარგად ჩანს, თუ რა განწყობის შექმნა სურს ხელისუფლებას და როგორ მანიპულირებს ის საზოგადოებრივი აზრით.
“მითების დეტექტორმა” გამოიკვლია, თუ როგორ კოორდინირებულად მუშაობს სახელისუფლებო პროპაგანდა 13 იანვარს დაკავებული ექს-პრემიერის, ირაკლი ღარიბაშვილის და მისი ოჯახის წინააღმდეგ.
13 იანვარს, ხელისუფლებასთან ასოცირებულმა მედია-პლატფორმებმა – POSTV-, მხარე • mkhare.ge-მ, Ongo-მ, რეპორტიორი-მ, InfoPostalioni.com-მა, მედიაჰოლდინგმა “კვირას” და საერთო გაზეთი-მა ფეისბუქ-გვერდებზე ერთი და იგივე შინაარსის მასალა გამოაქვეყნეს – გაავრცელეს ფეისბუქ-პოსტი, რომლის ავტორად მითითებულია ვინმე ექიმი ნათია თოფურია ( ფეისბუკზე Nati Topuria). იმავე დღესვე “ნათია თოფურიას” პოსტი გამოჩნდა newshub.ge-სა და region.ge-ს ვებ-გვერდებზეც და ასევე ტელეკომპანია რუსთავი 2-ის ვებ-გვერდზეც.
პოსტის ადრესატები ყოფილი პრემიერ-მინისტრის, ირაკლი ღარიბაშვილის, ნათესავები არიან. ავტორი ღარიბაშვილს უწოდებს „კორუმპირებულ ნაძირალას“ და „ქვეყნის მოღალატეს“ და მის ნათესავებს მოუწოდებს, ან „საჯაროდ დაიცვან თავიანთი ფალავანი“, ან გაჩუმდნენ და მადლობა თქვან, რომ „მძიმე დანაშაულისთვის მხოლოდ ხუთი წელი მიიღო“.
POSTV News-ის პოსტსა და სხვა საინფორმაციო სააგენტოების მიერ გავრცელებულ სტატიებში, პოსტის ავტორ Nati Topuria-ს ერთმანეთისგან სრულიად განსხვავებული ფოტოები იყო გამოყენებული.
“მითების დეტექტორმა” გადაამოწმა და დაადგინა, რომ Nati Topuria-ს ანგარიში ყალბი იყო და vk.com-ის მომხმარებლის, Натиа Двали -ის ფოტოს იყენებდა. ანგარიში Nati Topuria 2024 წლის 27 თებერვალს შეიქმნა, აქტიურად პოსტვა კი 2024 წლის მაისში, პროევროპული პროტესტის დისკრედიტაციის მიზნით დაიწყო.
კიდევ ერთი ფოტო, რომელსაც პროსახელისუფლებო მედია “ექიმ ნათია თოფურიას” პოსტების საილუსტრაციოდ იყენებდა, ასევე Vkontakte.ru-დან მოპარული აღმოჩნდა და მომხმარებელ ქსენია კოვალენკოს ეკუთვნის.
აქედან გამომდინარე, აღმოჩნდა, რომ პროსახელისუფლებო მედიამ, მათ შორის რუსთავი 2-მა, პროსახელისუფლებო ტროლზე დაყრდნობით მოამზადეს ღარიბაშვილის საწინააღმდეგო მასალა.
საგულისხმოა, რომ სულ რამდენიმე თვის წინ იგივე მედია საშუალებები ღარიბაშვილის პროპაგანდით იყვნენ დაკავებულნი.
13 სექტემბერს საქართველოს ორგზის პრემიერ-მინისტრ ირაკლი ღარიბაშვილს 5 წლით თავისუფლების აღკვეთა და 1 მილიონი ლარის ჯარიმა განესაზღვრა. მას ბრალი წარდგენილი აქვს მუხლით, რომელიც გულისხმობს უკანონო შემოსავლის ლეგალიზაციას, რასაც თან ახლდა განსაკუთრებით დიდი ოდენობით შემოსავლის მიღება. პროკურატურის განცხადებით, ღარიბაშვილი აღიარებს ჩადენილ დანაშაულს და ეთანხმება საპროცესო შეთანხმების პირობებს.
