4 ოქტომბერს განვითარებულ მოვლენებთან და არჩევნებთან დაკავშირებით საგარეო უწყებაში ელჩები დაიბარეს
საგარეო უწყებაში ელჩები დაიბარეს
4 ოქტომბერს განვითარებულ მოვლენებთან და არჩევნებთან დაკავშირებით საგარეო საქმეთა სამინისტროში ელჩები დაიბარეს. უწყების განცხადების თანახმად, მინისტრის მოადგილემ, გიორგი ზურაბაშვილმა შეხვედრაზე 4 ოქტომბრის მოვლენების “ადეკვატური შეფასების” მნიშვნელობას გაუსვა ხაზი და აღნიშნა, რომ მნიშვნელოვანია, საერთაშორისო პარტნიორები გაემიჯნონ და დაგმონ აქციის მონაწილეების ძალადობრივი ქმედებები.
რას ამბობს საგარეო საქმეთა სამინისტრო
“საგარეო საქმეთა სამინისტროში, საქართველოში აკრედიტებული დიპლომატიური კორპუსის წარმომადგენლებთან გაიმართა შეხვედრა. საგარეო საქმეთა მინისტრის პირველმა მოადგილემ, გიორგი ზურაბაშვილმა დიპლომატიური კორპუსის წარმომადგენლებს მიაწოდა ინფორმაცია 2025 წლის ადგილობრივი თვითმმართველობის არჩევნების მიმდინარეობის, შედეგების, ასევე 4 ოქტომბერს განვითარებული მოვლენების შესახებ.
მინისტრის მოადგილის განცხადებით, 4 ოქტომბრის არჩევნებს 28 საერთაშორისო და 27 ადგილობრივი ორგანიზაცია, ასევე 73 მედია საშუალების დაახლოებით 1 000 წარმომადგენელი აკვირდებოდა. საერთო შეფასებამ კი დაადასტურა, რომ არჩევნები ჩატარდა მშვიდობიან, გამჭვირვალე პირობებში, საარჩევნო პროცესი ადმინისტრირებული იყო პროფესიონალურად და საქართველოს მოქალაქეებს შესაძლებლობა ჰქონდათ, თავისუფლად ესარგებლათ დემოკრატიული უფლებებით.
4 ოქტომბერს განვითარებულ მოვლენებზე საუბრისას, საგარეო საქმეთა მინისტრის პირველმა მოადგილემ აღნიშნა, რომ მას შემდეგ, რაც აქცია გასცდა შეკრებისა და მანიფესტაციის კანონით დადგენილ ნორმებს, აქციის ორგანიზატორების მხრიდან გახმოვანდა ძალადობრივი შინაარსის მოწოდებები, სამართალდამცველებმა კანონმდებლობით გათვალისწინებულ ზომებს მიმართეს საზოგადოებრივი წესრიგის აღდგენის მიზნით.
გიორგი ზურაბაშვილმა შეხვედრაზე 4 ოქტომბრის მოვლენების ადეკვატური შეფასების მნიშვნელობას გაუსვა ხაზი და აღნიშნა, რომ მნიშვნელოვანია, საერთაშორისო პარტნიორები გაემიჯნონ და დაგმონ აქციის მონაწილეების ძალადობრივი ქმედებები, რომლის შედეგადაც დაშავდა არაერთი სამართალდამცველი და ჟურნალისტი, დაზიანდა მუნიციპალური ინფრასტრუქტურა.
საგარეო საქმეთა მინისტრის პირველმა მოადგილემ დიპლომატებს დაუდასტურა სამინისტროს ღიაობა და მზაობა განაგრძოს თანამშრომლობა პარტნიორებთან და საქართველოში აკრედიტებულ დიპლომატიურ კორპუსთან.”
კომენტარი
“გთხოვთ, იხილოთ კაია კალასისა და ევროკომისარ კოსის ოფიციალური განცხადება. მეტი კომენტარი არ მაქვს”, – ამის შესახებ საქართველოში ევროკავშირის ელჩმა, პაველ ჰერჩინსკიმ საგარეო საქმეთა სამინისტროდან გამოსვლის შემდეგ ჟურნალისტებს განუცხადა.
ევროკომისარი საგარეო ურთიერთობათა საკითხებში კაია კალასი და გაფართოების საკითხებში ევროკავშირის კომისარი, მარტა კოსი თვითმმართველობის არჩევნებთან დაკავშირებით ერთობლივ განცხადებას ავრცელებენ და აღნიშნავენ, რომ არჩევნები განსხვავებული აზრის ფართომასშტაბიანი ჩახშობის ფონზე ჩატარდა.
მისივე თქმით, საგარეო უწყებაში ბოჭორიშვილის პირველმა მოადგილემ წარმოადგინა ხელისუფლების შეფასება არჩევნებთან და არჩევნების შემდეგ განვითარებულ მოვლენებთან დაკავშირებით.
“მე მომიწვიეს ჩემს კოლეგებთან ერთად საგარეო საქმეთა სამინისტროში. საგარეო საქმეთა მინისტრის პირველმა მოადგილემ წარმოადგინა ხელისუფლების შეფასება მომხდართან დაკავშირებით, არჩევნებთან და არჩევნების შემდეგ განვითარებული მოვლენების შესახებ. არჩევნებზე და არჩევნების შემდგომ ევროკავშირის შეფასება ძალიან მკაფიოდ იყო გამოთქმული უმაღლესი წარმომადგენლის, კაია კალასისა და ევროკომისარ კოსის ოფიციალურ განცხადებაში. გთხოვთ, იხილოთ კვირას გავრცელებული განცხადებები. მეტი კომენტარი არ მაქვს.” – განაცხადა ჰერჩინსკიმ.
საგარეოში შეხვედრის დასრულების შემდეგ მინისტრმა მაკა ბოჭორიშვილმა კომენტარი გააკეთა და თქვა, რომ ელჩების დაბარების მიზანი – “4 ოქტომბრის არჩევნებთან და ამ დღეს განვითარებულ მოვლენებთან დაკავშირებით მათთვის ინფორმაციის მიწოდებაა”.
მან ასევე აღნიშნა, რომ ისაუბრეს საერთაშორისო გამოხმაურებებზე, რომლებიც, მისი მტკიცებით, “ხშირ შემთხვევაში, არასწორად ასახავს და ეხმაურება განვითარებულ მოვლენებს” და ხდის “მცდარ” აღქმებსა და წარმოდგენებს საქართველოზე.
“ჩვენ ძალიან კარგად ვაფასებთ თითოეული ელჩის, თითოეული დიპლომატის საქმიანობას საქართველოში. არაერთხელ დაგვიფიქსირებია, რომ, რა თქმა უნდა, სასურველია ისინი იქცეოდნენ ვენის კონვენციის შესაბამისობაში და ისე, როგორც ეს შეესაბამება დიპლომატს.
ჩვენ ძალიან კარგად ვიცით, რა წერია ვენის კონვენციაში, ვიცით, როგორი ქცევა შეესაბამება ვენის კონვენციას, ჩვენც გვყავს დიპლომატები და ჩვენი დიპლომატები არ ერევიან სხვა ქვეყნების საშინაო საქმეებში. თუ ისინი ამას გააკეთებენ, ზუსტად ვიცით, რომ იმ ქვეყნებიდან იქნება შესაბამისი რეაგირება.” – ამბობს მაკა ბოჭორიშვილი.
