აფხაზეთი აღადგენს მინისტრთა საბჭოს ყოფილ შენობას, რომელიც აფხაზეთის ომის დროს დაიწვა

მინისტრთა საბჭოს ყოფილი შენობა აფხაზეთში

აფხაზეთში გეგმავენ ყოფილი მინისტრთა საბჭოს შენობის აღდგენას. სოხუმის ცენტრში მდებარე დანგრეული სამთავრობო კომპლექსი უკვე სამი ათწლეულზე მეტია, 1992-93 წლების აფხაზეთის ომის ერთ-ერთ მთავარ სიმბოლოდ ითვლება.

აფხაზეთის ე.წ. პრეზიდენტმა ბადრა გუნბამ სოხუმის მერს, ტიმურ აგრბას, დაავალა გამოაცხადოს კონკურსი ყოფილი მინისტრთა საბჭოს შენობის ადგილისთვის საუკეთესო პროექტის შესარჩევად. მთავარი პირობაა შენარჩუნდეს კომპლექსის ორი ფასადი, რომლებიც აფხაზეთის ისტორიულ-კულტურული მემკვიდრეობის ძეგლების ნუსხაშია შეტანილი.

“სამოცზე მეტი წლის განმავლობაში ეს შენობა მძიმე მდგომარეობაში იყო და ამახინჯებდა დედაქალაქის იერსახეს,“ – აღნიშნა გუნბამ. მისი თქმით, ობიექტის რეკონსტრუქცია ან ახალი ნაგებობის აგება ამ ადგილზე უნდა იქცეს არა მხოლოდ დედაქალაქის, არამედ მთლიანად აფხაზეთის განახლების სიმბოლოდ.

აფხაზეთის ომი. როგორ დაიწყო და განვითარდა კონფლიქტი – ქრონოლოგია

 როგორ დაიწყო და განვითარდა კავკასიის ერთი-ერთი ყველაზე სისხლიანი კონფლიქტი. ხედვა თბილისიდან და სოხუმიდან

სოხუმის ცენტრში მდებარე სამთავრობო კომპლექსი საბჭოთა წლებში ეტაპობრივად აშენდა:

1935 წელს ცნობილი არქიტექტორების, ვლადიმირ შჩუკოსა და ვლადიმირ გელფრაიხის პროექტის მიხედვით, ორსართულიანი გვერდითი კორპუსები აიგო,
მალევე კი, 1980-იანი წლების დასაწყისში, 12-სართულიანი მთავარი შენობა აღიმართა.

1992-93 წლებში, აფხაზეთის ომის ბოლო ეტაპზე კომპლექსი ბრძოლის ეპიცენტრში აღმოჩნდა და 1993 წლის 27 სექტემბერს დაიწვა.

ხანძრის შემდეგ აფხაზეთის ახალი ხელისუფლება კომუნისტური პარტიის ყოფილი ოლქის შენობაში გადავიდა, დანგრეული სამთავრობო კომპლექსი კი სამ ათწლეულზე მეტი ხნის განმავლობაში უფუნქციოდ იდგა – მისი აღდგენისთვის ფინანსები არ არსებობდა. ახლა, როგორც ჩანს, რესურსები მოიძებნა.

თუ რა დანიშნულება ექნება “ფერფლიდან აღდგენილ“ შენობას, ჯერჯერობით უცნობია.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო