ეუთო/ოდირი 4 ოქტომბრის არჩევნებზე საქართველოში სადამკვირვებლო მისიას არ გამოგზავნის
ეუთო/ოდირის პასუხი
ეუთო/ოდირის განცხადებით 4 ოქტომბერს საქართველოში ჩანიშნულ ადგილობრივ არჩევნებზე ეფექტიანი დაკვირვება შეუძლებელია და შესაბამისად, სადამკვირვებლო მისია არ გამოიგზავნება. ამის მიზეზად ეუთო/ოდირი “ქართული ოცნების” მხრიდან დაგვიანებულ მოწვევას ასახელებს.
“ქართულმა ოცნებამ” 4 ოქტომბერს გასამართ ადგილობრივ არჩევნებზე დასაკვირვებლად ეუთო/ოდირის მისია 6 სექტემბერს მოიწვია.
ირაკლი კობახიძის თქმით, იმისათვის, რომ არ დარჩეს არავითარი კითხვა არჩევნებთან დაკავშირებით, ხელისუფლებამ მიიღო გადაწყვეტილება ადგილობრივი თვითმმართველობის არჩევნების დასაკვირვებლად ეუთო/ოდირის მისიის მოწვევის შესახებ.
კობახიძემ განაცხადა, რომ 2024 წლის საპარლამენტო არჩევნების შესახებ გამოქვეყნებული დასკვნის გამო ეუთო/ოდირი ქართული ოპოზიციისა და ასევე ევროპელი და ამერიკელი დიპლომატების მხრიდან ზეწოლის ქვეშ მოექცა და დაამატა, რომ წელს ეს ზეწოლა უფრო გაიზრდება.
განცხადებაში ასევე ხაზგასმულია, რომ ეუთო/ოდირმა “ოცნებასთან” არაერთხელ გაუსვა ხაზი დროული მოწვევის აუცილებლობას. მათივე განმარტებით, გამჭვირვალე და სანდო საარჩევნო დაკვირვება მოითხოვს საფუძვლიან მომზადებას და არჩევნების პროცესის ძირითად ეტაპებზე წვდომის შესაძლებლობას.
რას ამბობს ეუთო/ოდირი
“სამწუხაროდ, საქართველოს ხელისუფლების მიერ ასეთ გვიან ეტაპზე მოწვევის გადაწყვეტილება ხელს უშლის ეფექტიან დაკვირვებას და ეუთო/ოდირი ვერ შეძლებს სადამკვირვებლო მისიის გაგზავნას. მიუხედავად ამისა, ჩვენ ვიმედოვნებთ, რომ გავაგრძელებთ ხანგრძლივ თანამშრომლობას საქართველოს ინსტიტუტებთან და სამოქალაქო საზოგადოებასთან დემოკრატიისა და ადამიანის უფლებების გასაძლიერებლად“.
საქართველოს ხელისუფლებასთან კონტაქტისას, ეუთო/ოდირი მუდმივად უსვამდა ხაზს დროული მოწვევის მნიშვნელობას, რათა უზრუნველყოფილი ყოფილიყო სანდო და ყოვლისმომცველი საარჩევნო დაკვირვება. წარსულში, ეუთო/ოდირმა მიიღო დროული მოწვევები საქართველოსგან, რათა დაეკვირვებინა ადგილობრივი არჩევნებისთვის 2006, 2010, 2014, 2017 და 2021 წლებში, რაც იძლეოდა ეფექტური მომზადების საშუალებას ეუთო/ოდირის მეთოდოლოგიის შესაბამისად.
როგორც ეუთოს მონაწილე სახელმწიფო, საქართველოს აღებული აქვს ვალდებულება, რომ ჩაატაროს დემოკრატიული არჩევნები საერთაშორისო სტანდარტების შესაბამისად. მიუხედავად იმისა, რომ ეუთო/ოდირი არ აკეთებს კომენტარს იმ არჩევნებზე, რომლებსაც ის არ აკვირდება, ოფისი გააგრძელებს საქართველოში მოვლენების მონიტორინგს მისი მანდატით გათვალისწინებულ ყველა სფეროში, მათ შორის დემოკრატიული მმართველობის, ფუნდამენტური თავისუფლებების და კანონის უზენაესობის მიმართულებით.” – წერია განცხადებაში.
