ტუბერკულოზი ცხინვალში: ადგილობრივები ეჭვობენ, რომ ხელისუფლება ინფიცირებულთა ნამდვილ რაოდენობას მალავს
ე.წ. სამხრეთ ოსეთის საავტომობილო ინსპექციის (ГАИ) რამდენიმე თანამშრომელს ტუბერკულოზი დაუდასტურდა. აღნიშნული ინფორმაცია თავდაპირველად სოციალურ ქსელებში გავრცელდა, ხოლო მოგვიანებით ჯანდაცვის სამინისტროს ტუბერკულოზთან ბრძოლის დისპანსერმა დაადასტურა. მიუხედავად ამისა, ოფიციალური რეაგირება მნიშვნელოვნად დაგვიანდა და ვერ შეძლო შეშფოთებული მოსახლეობის დამშვიდება.
- “ჰავანას სინდრომის” და გრუ-ს აგენტების კვალი თბილისში. The Insider-ის, Spiegel-ის და CBS-ი გამოძიება
ოპოზიციურმა ტელეგრამ-არხმა ჯერ კიდევ 13 თებერვალს, ერთ-ერთი თანამშრომლის მშობლებზე დაყრდნობით, გაავრცელა ინფორმაცია, რომ ტუბერკულოზი 20-ზე მეტ ადამიანს დაუდასტურდა.
“იმ თანამშრომლებს, რომლებსაც ტუბერკულოზის ღია ფორმა აღმოაჩნდათ, ინფორმაციის გასაჯაროება აუკრძალეს, მეტიც – ხელმძღვანელობა აიძულებს მათ, კვლავ განაგრძონ მუშაობა და მოსახლეობასთან კონტაქტში იყვნენ. ბევრმა ინკოგნიტოდ მიმართა სამკურნალო დაწესებულებებს რუსეთში. ამ დროისთვის, შინაგან საქმეთა სამინისტროს თანამშრომლების მხოლოდ 3%-მა გაიარა შემოწმება,“ – წერს არხი.
ცხინვალის მცხოვრებლებს აღელვებდათ ის ფაქტი, რომ შინაგან საქმეთა სამინისტრო (რომლის დაქვემდებარებაშია საავტომობილო ინსპექცია) დუმილს ინარჩუნებდა და გავრცელებულ ინფორმაციას არც ადასტურებდა და არც უარყოფდა. ეს კი ზრდიდა ინფიცირებულ თანამშრომელთან კონტაქტის და დაავადების გავრცელების რისკს.
“ასევე, [შსს] ვერ უარყოფს ინფორმაციას იმის შესახებ, რომ მათი თანამშრომლები მასობრივად ავადდებიან იმის გამო, რომ ბოლო ორი წლის განმავლობაში მათთვის დისპანსერიზაციის ჩატარების შესაბამისი პირობები ვერ შეიქმნა,“ – აღნიშნავდა იგივე არხი.
აღშფოთებული მოქალაქეები ხელისუფლებას უმოქმედობაში ადანაშაულებდნენ და ამას მოსახლეობის ჯანმრთელობის მიმართ გამოჩენილი გულგრილობით ხსნიან.
ერთი კვირის განმავლობაში გავრცელებული ცნობების შემდეგ, საბოლოოდ, ე.წ. სამხრეთ ოსეთის ჯანდაცვის სამინისტრომ რეაგირება ბოლოს და ბოლოს მაინც მოახდინა. სამინისტროს პრესსამსახურმა განაცხადა, რომ შინაგან საქმეთა სამინისტროს თანამშრომელთა დისპანსერიზაციის შედეგად ტუბერკულოზი ორ ადამიანს დაუდასტურდა, რომლებიც სამკურნალოდ ჩრდილოეთ ოსეთში გაგზავნეს.
“შსს-ს სამედიცინო-სანიტარული სამსახურის ექიმებმა, ტუბერკულოზთან ბრძოლის დისპანსერთან ერთად, განსაზღვრეს კონტაქტური პირების წრე და ორგანიზებული იქნა ყველა საჭირო ეპიდემიოლოგიური და პრევენციული ღონისძიება. უწყების მთელი პერსონალი, ასევე მათი ოჯახის წევრები, გამოკვლეულნი არიან და სამედიცინო მეთვალყურეობის ქვეშ იმყოფებიან,“ – აღნიშნულია ჯანდაცვის სამინისტროს განცხადებაში.
მიუხედავად ამისა, უწყება იძულებული გახდა ეღიარებინა, რომ სამხრეთ ოსეთში არ არსებობს სპეციალური დიაგნოსტიკური აღჭურვილობა და ლაბორატორია, რის გამოც მოსახლეობისთვის დროული და კვალიფიციური დახმარების გაწევა შეუძლებელია.
“დამატებითი გამოკვლევისა და პაციენტთა მკურნალობის პროცესში პრობლემები იქმნება, რის გამოც ისინი ჩრდილოეთ ოსეთში იგზავნებიან,“ – განმარტა სამინისტრომ.
მთავრობის განცხადებები, რომ ვითარება კონტროლს ექვემდებარება, მოსახლეობისთვის დამაჯერებელი არ აღმოჩნდა. JAMnews-ის რესპონდენტების თქმით, ხელისუფლება ინფიცირებულთა რეალურ რაოდენობას მალავს, ხოლო საუბარია, სულ მცირე, სამი შემთხვევის დადასტურებაზე საავტომობილო ინსპექციის თანამშრომლებს შორის. ამასთან, კონტაქტური პირების წრის დადგენა – მათ შორის, ავტომანქანების მძღოლებისა და მგზავრების – ფაქტობრივად შეუძლებელია.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
