პროევროპული პროტესტი საქართველოში გრძელდება. მომიტინგეები დაშლას არ აპირებენ
პროტესტი გრძელდება
თბილისში გრძელდება საპროტესტო აქცია. აქციის ათასობით მონაწილემ ღამე ქუჩაში გაათენა. წუხელ სამართალდამცავებმა განსაკუთრებით დიდი ოდენობით ცრემლსადენი გაზი და წიწაკის სპრეი გამოიყენეს აქციის მონაწილეთა დასაშლელად.
თბილისში,სამი დღეა პროევროპული საპროტესტო აქციები იმართება. აქციები მას შემდეგ დაიწყო, რაც 28 ნოემბერს, ქვეყნის პრემიერმა, ირაკლი კობახიძემ გააკეთა ოფიციალური განცხადება, რომ საქართველო 2028 წლამდე აჩერებს მოლაპარაკებების პროცესს ევროკავშირში გასაწევრიანებლად. ამ განცხადების შემდეგ თბილისში მრავალათასიანი მიტინგები არ წყდება.
წუხელ, ისევე როგორც წინა დღეებში სამართალდამცავებმა მომიტინგეთა დასაშლელად სპეცტექნიკა გამოიყენეს. რამდენიმეჯერ წყლის ჭავლის შესხმისა და ცრემლსადენი გაზის გამოყენების შემდეგ, პროტესტის მონაწილეებმა ნელ-ნელა უკან დაიხიეს, თუმცა დემონსტრანტების სრულად დაშლა სამართალდამცავებმა ვერ შეძლეს.
დემონსტრანტები თავის მხრივ სამართალდამცავების მისამართით ფოერვერკებს და შუშხუნებს ისროდნენ.
ათასობით ადამიანი კვლავ დგას ქუჩაში. დილას მათ ჭავჭავაძის გამზირზე გადაინაცვლეს, თბილისის სახელმწიფო უნივერსიტეტის პირველი კორპუსის შენობასთან.
პროტესტის მიმართ სრულ სოლიდარობას გამოხატავს საქართველოს პრეზიდენტი სალომე ზურაბიშვილი. მან თქვა, რომ ჩაუდგება სათავეში პოლიტიკურ პროცესს ოპოზიციასთან ერთად. ამ პროცესის საბოლოო მიზანია საქართველოში ხელახალი საპარლამენტო არჩევნების დანიშვნა. მისი თქმით, პრეზიდენტი ერთადერთი ლეგიტიმური ინსტიტუტია დღეს საქარველოში მას შემდეგ, რაც ხელისუყფლებამ 26 ოქტომბრის არჩევნები გააყალბა და თვითნებურად, კონსტიტუციის სრული დარღვევით ახალი პარლამენტის უფლებამოსილება ცნო.
კიდევ ერთი ცხელი კერა გუშინ საზოგადოებრივი მაუწყებელი იყო, რომლის შენობასთანაც მომიტინგეთა ნაწილი მივიდა. მათ მოითხოვეს არხის ხელმძღვანელების ვასილ მაღლაფერიძის, თინათინ ბერძენიშვილისა და ახალი და მიმდინარე ამბების ბლოკის ხელმძღვანელის, გიორგი გვიმრაძის გადადგომა პირველი დეკემბრის საღამოს ექვს საათამდე.
პარალელურად გრძელდება სხვადასხვა საჯარო მოხელის, ჩინოვნიკების, სხვადასხვა კომპანიების მხრიდან საკუთარი ნეგატიური პოზიციის გამოხატვა მიმდინარე პროცესების მიმართ.
გუშინ თანამდებობა დატოვა ამერიკაში საქართველოს ელჩმა დავით ზალკალიანმა. სხვა გადადგომებისა და პროტესტების შესახებ ინფორმაცია შეგიძლიათ ნახოთ აქ:
საქართველოში მიმდინარე პროცესებს და “ქართული ოცნების” ხელისუფლების გადაწყვეტილებას, შეაჩეროს ევროპული ინტეგრაცია, გამოეხმაურა გუშინ თეთრი სახლი.
აშშ-ს სახელმწიფო დეპარტამენტის სპიკერის განცხადება სახდეპის ვებგვერდზე ვრცელდება. მეთიუ მილერის თქმით, აშშ-მ ეს გადაწყვეტილება მიიღო, რადგან “ქართული ოცნების” ბოლოდროინდელი ანტიდემოკრატიული ნაბიჯები აშშ-სა და საქართველოს შორის სტრატეგიული პარტნიორობის ძირითადად დებულებებს არღვევდა.
დღეს 1 დეკემბერს, მომიტინგეები პერმანენტულ აქციებს განაგრძობენ როგორც თბილისში, ისე საქართველოს სხვა ქალაქებში.
ასევე, სალომე ზურაბიშვილი ოპოზიციის ლიდერებთან შეხვედრას გეგმავს, რათა პარალელურად პოლიტიკური პროცესი დაიწყოს, რომლის მთავარი მოთხოვნა ხელახალი არჩევნებია.
