“ნაციონალურმა მოძრაობამ“ ისანში მაჟორიტარი დეპუტატის კანდიდატად ხატია დეკანოიძე წარადგინა

2020 წლის ოქტომბრის საპარლამენტო არჩევნებში თბილისში, ისნის ოლქში “ნაციონალური მოძრაობიდან” კენჭს ხატია დეკანოიძე იყრის. აქამდე გაერთიანებულ ოპოზიციას – “ძალა ერთობაშია”, რომლის წევრი “ნაციონალური მოძრაობაც” არის, ჰქონდა შეთანხმება, რომ ისანში ისინი საერთო კანდიდატს დაუჭერდნენ მხარს, საერთო კანდიდატი კი გიორგი ვაშაძე იქნებოდა. 

როგორც “ნაციონალურ მოძრაობაში” განმარტავენ, გადაწყვეტილება მას შემდეგ შეცვალეს, რაც გიორგი ვაშაძემ “ძალა ერთობაშია” დატოვა. 

“დღესაც მხარს ვუჭერთ შეთანხმებულ კანდიდატებს, მაგრამ ისნის ოლქთან მიმართებით პოლიტიკური ვითარება შეიცვალა იმიტომ, რომ გიორგი ვაშაძემ დატოვა გაერთიანება „ძალა ერთობაშია“ მას შემდეგ, რაც ის მაჟორიტარ კანდიდატად დასახელდა. ასევე, გადაწყვიტა, რომ წარედგინა საკუთარი პოლიტიკური პარტნიორი, თაკო ჩარკვიანი საბურთალოს მაჟორიტარ კანდიდატად,“ – აცხადებს ნაციონალური მოძრაობის ერთ-ერთი ლიდერი, სალომე სამადაშვილი. 

სამადაშვილი განმარტავს, რომ მას შემდეგ, რაც გიორგი ვაშაძემ „ძალა ერთობაშია“ დატოვა, ისნის ოლქში მისი გამარჯვების შანსი შემცირდა. 

“აღნიშნულ ოლქს ნამდვილად ვერ დავუთმობთ ივანიშვილის კანდიდატს. გადავწყვიტეთ, რომ დავაყენოთ ჩვენი საკუთარი კანდიდატი, რომელიც დარწმუნებული ვარ, ბიძინა ივანიშვილის კონკურენტს დაამარცხებს,“ – ამბობს სამადაშვილი.

გაერთიანებული ოპოზიცია თბილისში საერთო კანდიდატებზე 19 ივნისს შეთანხმდა.

გიორგი ვაშაძემ და თაკო ჩარკვიანმა ოპოზიციური გაერთიანება “ძალა ერთობაშია” 27 ივლისს დატოვეს. მანამდე, 20 ივნისს, თაკო ჩარკვიანმა საკუთარი თავი საბურთალოს მაჟორიტარობის კანდიდატად წარადგინა.