სააკაშვილმა უკრაინაში ლეგალური სტატუსი მიიღო

საქართველოს ყოფილმა პრეზიდენტმა, ოდესის ოლქის ექს-ხელმძღვანელმა მიხეილ სააკაშვილმა უკრაინის სახელმწიფო მიგრაციული სამსახურისგან მიიღო საბუთი, რომელიც მისი უკრაინაში ყოფნის ლეგალურ სტატუსს ადასტურებს.

ამის შესახებ მან Facebook-ის საკუთარ გვერდზე დაწერა.

„დღეს, როგორც იქნა, მიგრაციული სამსახურისგან მივიღე იმის დამადასტურებელი საბუთი, რომ უკრაინის ტერიტორიაზე ლეგალურად ვიმყოფები. რასაკვირველია, ამით არ ვკმაყოფილდები, და ვცდილობ, სასამართლოს ძალით მოქალაქეობა აღვიდგინო“, – წერს პოლიტიკოსი.

როგორც ჰრომადსკოე განმარტავს,  სააკაშვილის მიერ მიღებული საბუთის თანახმად, ეს სტატუსი 2017 წლის 1 დეკემბრამდე მოქმედებს.

შეგახსენებთ, რომ 1 ნოემბერს უკრაინის სახელმწიფო მიგრაციის სამსახურმა სააკაშვილს დევნილის სტატუსის მინიჭებაზე მეორედ უთხრა უარი. თავად სააკაშვილი კი აცხდებს, რომ გენერალურ პროკურატურაში მისი საქართველოში ექსტრადიციისთვის საბუთებს ამზადებენ.

სააკაშვილმა უკრაინა-პოლონეთის საზღვარი 10 სექტემბრს გადაკვეთა, როდესაც მისი მომხრეების მასამ სამართალდამცავების კორდონი გაარღვია და ის უკრაინის მხარეს „გადაიყვანა“. სასამართლომ სააკაშვილს საზღვრის უკანონოდ გადაკვეთა დასდო ბრალად.