მოსკოვმა განმარტა, თუ რატომ არ აუქმებს საქართველოსთან სავიზო რეჟიმს

სამხედრო კონფლიქტებთან ტერიტორიული სიახლოვე არის ერთ-ერთი მიზეზი, რის გამოც რუსეთი თავს იკავებს საქართველოსთან უვიზო რეჟმის შემოღებისგან, – განაცხადა რუსეთის საგარეო საქმეთა მინისტრის მოადგილემ გრიგორი კარასინმა, რომელიც ხუთშაბათს პრაღაში საქართველოს პრემიერის სპეციალურ წარმომადგენელს რუსეთთან ურთიერთობის საკითხებში ზურაბ აბაშიძეს შეხვდა.

• საქართველოსა და რუსეთს შორის სავიზო რეჟიმი 2000 წლის 5 დეკემბერს, რუსეთის ინიციატივით შევიდა ძალაში. 2012 წლის 29 თებერვლიდან, პრეზიდენტ მიხეილ სააკაშვილის ბრძანებულების თანახმად, საქართველომ ცალმხრივად გააუქმა სავიზო რეჟიმი –  რუსეთის მოქალაქეებს შეუძლიათ საქართველოში უვიზოდ შემოვიდნენ და ქვეყანაში ერთ წელიწადს დარჩნენ.

•  საქართველომ რუსეთთან დიპლომატიური ურთერთობა 2008 წლის აგვისტოს ომის შემდეგ გაწყვიტა  –  მოსკოვის მიერ აფხაზეთისა და სამხრეთი ოსეთის დამოუკიდებლობის აღიარების საპასუხოდ.

•  „ქართული ოცნების“ მთავრობამ, რომელიც ხელისუფლებაში 2012 წლის 1 ოქტომბრის არჩევნების შედეგად მოვიდა, რუსეთთან ურთიერთობის დარეგულირება ერთ-ერთ მთავარ პრიორიტეტად გამოაცხადა. ამ მიმართულებით კონკრეტული ნაბიჯები გადაიდგა, მათ შორის აღდგა რუსეთსა და საქართველოს შორის პირდაპირი დიალოგი, რომელიც ზურაბ აბაშიძისა და გრიგორი კარასინის შეხვედრების ფორმატში მიმდინარეობს. 

• მოცემულ მომენტში რუსეთსა და საქართველოს შორის დიალოგი ჟენევის დისკუსიების ფარგლებშიც გრძელდება, თუმცა – საერთაშორისო შუამავლების თანდასწრებით. ჟენევაში მხოლოდ ჰუმანიტარული, სატრანსპორტო, ეკონომიკური და კულტურული საკითხები განიხილება.