თვეში 30 მილიონი ლარით იზარალებს საქართველოს ტურიზმი ირანსა და ჩინეთში შეწყვეტილი ფრენების გამო

კორონავირუსის გავრცელების საფრთხის გამო მხოლოდ ჩინეთთან და ირანთან პირდაპირი ფრენების შეზღუდვით, ერთ თვეში საქართველოს ტურიზმი 30 მილიონი ლარით იზარალებს.

ასეთ გათვლებს აკეთებს ეკონომიკისა და მდგრადი განვითარების მინისტრი, ნათია თურნავა.

ფრენების შეჩერებას თურნავა “არაპოპულარულ ზომებს” უწოდებს, თუმცა ამბობს, რომ მთავარი “მოქალაქეების ჯანმრთელობაა”.

“იმედი გვაქვს, რომ მსოფლიო სწრაფად გაუმკლავდება ამ გამოწვევას,” – ამბობს თურნავა.

•კორონავირუსი კავკასიას მიუახლოვდა. როგორ რეაგირებენ ამაზე აზერბაიჯანი, სომხეთი და საქართველო

• კორონავირუსი: მსოფლიო პანდემიისთვის უნდა მოემზადოს. ქრონიკა

მისი თქმით, მიუხედავად იმისა, რომ ახალი კორონავირუსი მსოფლიო ეკონომიკისთვის გლობალური გამოწვევაა, ქართულ ეკონომიკას ძლიერი რყევები ამ ეტაპზე არ ელოდება და ეროვნული ვალუტაც გამყარებას განაგრძობს.

“ჩვენი მაკროეკონომიკური ვითარება არის ერთ-ერთი ყველაზე ჯანსაღი რეგიონში. ჩვენი ეკონომიკა იზრდება ექსპორტი იზრდება, ლარი მყარდება და ეს არის სწორი მონეტარული და  ეკონომიკური პოლიტიკის შედეგი“, – განაცხადა თურნავამ.

ამავე დროს, მისი თქმით თუ კორონავირუსის გარშემო შექმნილი სიტუაცია გაგრძელდა, “საქართველოს მთავრობა ანტიკრიზისულ ზომებზე იფიქრებს”.

•  კორონავირუსის გავრცელების საფრთხის გამო საქართველომ ჯერ კიდევ იანვრის ბოლოს შეაჩერა ავიამიმოსვლა ჩინეთთან, ხოლო 23 თებერვალს, მას შემდეგ, რაც ვირუსის კერა ირანში გაჩნდა, საქართველომ ამ ქვეყანასთან ავიამიმოსვლაც შეზღუდა. 

•  ტურიზმის ეროვნული ადმინისტრაციის ინფორმაციით, 2019 წელს საქართველოში 5 მლნ ტურისტი შემოვიდა, რაც წინა 2018 წლის მაჩვენებელზე 6.8%-ით მეტია.

•  2018 წელს ტურიზმის სექტორის წილი საქართველოს მშპ-ში 7.6% იყო.

• ტურიზმი საქართველოში პირდაპირი გზით 140 300 სამუშაო ადგილს ქმნის.