მუშაობა სახლიდან, თვითიზოლაცია, კარანტინი - რა რეკომენდაციებს გასცემს საქართველოს მთავრობა

საქართველოს მთავრობა მუშაობის 24 საათიან, საგანგებო რეჟიმზე გადადის. ამის შესახებ განაცხადა პრემიერ-მინისტრმა გიორგი გახარიამ მთავრობის დღევანდელ სხდომაზე.

ეს პირველი მთავრობის სხდომაა, მას შემდეგ, რაც მსოფლიო ჯანდაცვის ორგანიზაციამ ახალი კორონავირუსი პანდემიად გამოაცხადა. 

12 მარტის დილის 11 საათისთვის საქართველოში კორონავირუსით ინფიცირების 24 დადასტურებული შემთხვევაა. 

პრემიერის თქმით, საგანგებო რეჟიმი განსაკუთრებით ეხება ჯანდაცვის, შინაგან საქმეთა, განათლების, იუსტიციის, საგარეო საქმეთა სამინისტროებს. ასევე ფინანსთა სამინისტროს შესაბამის უწყებებს, რომლებიც საზღვრებზე ფუნქციონირებენ. 

“გვესმის, რომ ეს გლობალური გამოწვევაა, მაგრამ დროებითი. ყველაფერი უნდა გავაკეთოთ იმისთვის, რომ ამ გლობალური გამოწვევის წინაშე საქართველოს პასუხი ერთ-ერთი ყველაზე ეფექტური იყოს,” – აღნიშნა პრემიერმა. 

მისი თქმით, საქართველო მიყვება მსოფლიო ჯანდაცვის ორგანიზაციის რეკომენდაციებს: 

“ახლა არ არის პანიკის დრო. ახლა ერთიანობის და ეფექტური მოქმედების დროა…გამოწვევები, როგორც ჩანს ყოველდღიურად გაიზრდება და ჩვენ ვალდებულები ვართ შესაბამისად ვიყოთ მზად საპასუხოდ… პირველ რიგში, ჩვენ უნდა ვიზრუნოთ ჩვენს მოხუცებზე, ბავშვებზე და რა თქმა უნდა, ერთმანეთზე.” – აღნიშნა გახარიამ. 

მთავრობის სხდომაზე რამდენიმე კონკრეტული, სავალდებულო გადაწყვეტილება და რეკომენდაცია მიიღეს:

საზღვარზე შემოსვლის და კარანტინის წესები შეიცვალა

მკაცრდება საქართველოს საზღვარზე შემოსვლის წესები. თუ აქამდე სავალდებულო კარანტინი მოქმედებდა ჩინეთიდან, ირანიდან, იტალიიდან და სამხრეთ კორეიდან ჩამოსულებისთვის, 12 მარტიდან ქვეყნების ამ ჩამონათვალს დაემატა გერმანია, საფრანგეთი, ავსტრია და ესპანეთი.

საქართველოს ყველა მოქალაქე, ვინც ამ რვა ქვეყნებიდან დაბრუნდება, აუცილებელ 14 დღიან საკარანტინო რეჟიმს გაივლის.

რაც შეეხება უცხო ქვეყნის მოქალაქეებს – მათ საზღვარზე კორონავირუსზე კვლევის ცნობა უნდა წარადგინონ ან მათაც ასევე სავალდებულო საკარანტინო რეჟიმი უნდა გაიარონ.

გარდა ამისა, საქართველოს თითოეულ მოქალაქეს ეძლევა რეკომენდაცია, თავი შევიკავოთ უცხო ქვეყნებში მოგზაურობისგან რამდენიმე თვით.

“ეს არის ძალზე მნიშვნელოვანი რეკომენდაცია და იმედი გვაქვს, რომ ჩვენი მოქალაქეები სამოქალაქო პასუხისმგებლობის პოზიციიდან გამომდინარე გაითვალისწინებენ ამ რეკომენდაციას“, – განაცხადა გახარიამ.

თვითიზოლაციის პროცესს შსს გააკონტროლებს 

პრემიერი ამბობს, რომ თვითიზოლაცია არის უმნიშვნელოვანესი ნაბიჯი ვირუსის გავრცელების პრევენციისკენ და მისი სწორად დაცვა ქვეყნისთვის დღეს მთავარი გამოწვევაა.

გიორგი გახარია მოუწოდებს იმ მოქალაქეებს, რომელიც ახალი კორონავირუსის პრევენციის თვალსაზრისით თვითიზოლაციის რეჟიმში იმყოფებიან, კარგად დაიცვან შესაბამისი პირობები.

მეტიც, პრემიერი შს სამინისტროს ავალებს, რომ გააკონტროლოს, რამდენად სწორად იცავენ მოქალაქეები თვითიზოლაციას.

„ადამიანებს, რომლებიც პოტენციურად შეიძლება ვირუსის მატარებლები იყვნენ, ვალდებულება აქვთ ჩვენი ქვეყნის თითოეული მოქალაქის წინაშე და თვითიზოლაციის რეჟიმის შესაბამისი დაცვა არის ჩვენი სამოქალაქო პასუხისმგებლობის ყველაზე მნიშვნელოვანი კომპონენტი. მოვუწოდებთ მოქალაქეებს, რომლებიც თვითიზოლაციის რეჟიმში იმყოფებიან, კარად დაიცვან ეს პირობები. ასევე, ვავალებ შინაგან საქმეთა სამინისტროს, ჯანდაცვის სამინისტროსთან სრულ კოორდინაციაში უზრუნველყონ წესების ზუსტი და შესაბამისი აღსრულება იმ მოქალაქეების თვითიზოლაციის, რომელიც ჯანდაცვის სამინისტროს მიერ არის განსაზღვრული“, – განაცხადა  გახარიამ.

მუშაობის დისტანციურ რეჟიმზე გადასვლა

გახარია სახელმწიფო უწყებებსა და ასევე კერძო ორგანიზაციებს რეკომენდაციით მიმართავს, მაქსიმალურად დისტანციური მუშაობის რეჟიმზე გადავიდნენ. მისი თქმით, თითოეული თანამშრომელი, რომლის ადგილზე ყოფნა არ არის აუცილებელი, “უნდა იყოს დისტანციურ რეჟიმში გადაყვანილი”.

გახარიამ ხაზი გაუსვა, რომ ეს რეკომენდაცია ეძლევა არა მარტო სახელმწიფო უწყებებს, არამედ ასევე ყველა კერძო სტრუქტურასა და კომპანიას.

“ამავე დროს, მნიშვნელოვანია, ამ ნაბიჯმა მთავრობის ეფექტურ მუშაობას ხელი არ შეუშალოს,” – განაცხადა გახარიამ. 

ეკონომიკური სტიმულირების გეგმა

პრემიერმა ეკონომიკურ გუნდს დღის ბოლომდე მისცა დრო, რომ ეკონომიკური სტიმულირების კონკრეტული გეგმა წარმოადგინონ.

„ეკონომიკურ გუნდს ევალება, უახლოეს პერიოდში, დღეს, დღის ბოლომდე, შემუშავებული გეგმის სახით წარმოგვიდგინონ ეკონომიკური სტიმულირების კონკრეტული გეგმა, რომელიც ხვალიდან განხორციელდება. ეს ძალზედ მნიშვნელოვანია – ჯანმრთელობის გარდა, ჩვენ გვაქვს ვალდებულება ჩვენი ქვეყნის მოქალაქეების და მათი სოციალური უზრუნველყოფის წინაშე, ისევე, როგორც ქვეყნის შემდგომი განვითარების წინაშე,” – აღნიშნა გახარიამ.

სხვა ცვლილებები და შეზღუდვები

• ჯერ კიდევ გუშინ გახდა ცნობილი, რომ სასწავლო პროცესი პირველ აპრილამდე გადაიდო. როგორც „ინტერპრესნიუსს“ განათლების სამინისტროში განუცხადეს, გაცდენილი საათები მოსწავლეებს სასწავლო პროცესის განახლების შემდეგ სხვადასხვა სისტემით აუნაზღაურდებათ. შესაძლოა, სკოლამ გაკვეთილების ასანაზღაურებლად შაბათი და კვირა გამოიყენოს, შეიძლება ეს იყოს ძირითადი გაკვეთილების შემდეგ დამატებითი გაკვეთილები და ასევე, შეიძლება ეს იყოს გაკვეთილზევე გარკვეული თემების გაერთიანება.

• მუშაობის საგანგებო რეჟიმზე გადადის თბილისის მერიაც. აპირებენ ისეთი სერვისების შეზღუდვას, რომელთა მიწოდება დაკავშირებულია ხალხმრავლობასთან. აქ არის ჩამონათვალი, თუ რა სერვისებია ეს.

• ერთი თვით, 13 აპრილამდე,  გადავადდა სავალდებულო სამხედრო სამსახურში საგაზაფხულო გაწვევა.

• როგორც დაავადებათა კონტროლის ცენტრის ხელმძღვანელი პაატა იმნაძე ამბობს, არ არის გამორიცხული, ძალიან მალე მთავრობამ კიდევ უფრო გაამკაცროს ზომები – პირველ რიგში, შეზღუდოს დიდი თავყრილობები – ქორწილი, ქელეხი და ა.შ.