ვაჟა გაფრინდაშვილს ცხინვალში 1 წლითა და 9 წლით პატიმრობა მიუსაჯეს
ცხინვალში დაკავებულ ექიმ ვაჟა გაფრინდაშვილს 1 წლით და 9 თვით თავისუფლების აღკვეთა მიესაჯა. ცხინვალის დე ფაქტო სასამართლომ გადაწყვეტილება დღეს 20 დეკემბერს მიიღო.
ექიმ გაფრინდაშვილს ცხინვალის დეფაქტო ხელისუფლება ე.წ. სახელმწიფო საზღვრის განზრახ დარღვევას ედავებოდა, რაც ვაჟა გაფრინდაშვილმა არ აღიარა. ცხინვალის დე ფაქტო უშიშროების კომიტეტის განცხადებაში აღნიშნულია, რომ გაფრინდაშვილის მიმართ გამოძიება “რუსეთის ფედერაციის სისხლის სამართლის კოდექსის 322-ე მუხლით [საზღვრის უკანონო კვეთა] დაიწყო”.
• ცხინვალის უშიშროება ვაჟა გაფრინდაშვილის ქართულ სპეცსამსახურებთან კავშირზე მიუთითებს
• შეიძლება თუ არა პატიმრების ცემა? ცხინვალის გამოცდილება
ვაჟა გაფრინდაშვილი სამხრეთ ოსეთის კონფლიქტის ზონაში, სოფელ ორჭოსანთან რუსმა სამხედროებმა 9 ნოემბერს დააკავეს.
დე ფაქტო უშიშროების კომიტეტის 19 ნოემბრის განცხადებით, „გამოძიებით დადგენილია, რომ 2019 წლის 9 ნოემბერს დილით, ვაჟა გაფრინდაშვილი თბილისიდან სპეციალურად ჩავიდა სამხრეთ ოსეთთან მოსაზღვრე სოფელ საკორინთლოში, საიდანაც უკანონოდ გადაკვეთა საქართველოსთან სამხრეთ ოსეთის სახელმწიფო საზღვარი“.
მისი დაკავების გარემოებებზე ცოტა რამეა ცნობილი. ერთერთ ვერსიად ისიც დასახელდა, რომ გაფრინდაშვილმა საზღვარი პაციენტის მოსანახულებლად გადაკვეთა. დაკავებისას, სავარაუდოდ, მას უფლება მისცეს ერთი ზარი გაეკეთებინა – გაფრინდაშვილმა მეუღლეს დაახლოებით 15:30 საათზე დაურეკა და უთხრა, რომ რუს სამხედროებს ცხინვალში გადაჰყავდათ.
ცნობილია ისიც, რომ ე.წ. საზღვართან გაფრინდაშვილს არავინ ელოდა. როგორც წესი, როდესაც უცხო ადამიანებს ახალგორში შესვლა უნდათ, მათ ვინმე ადგილობრივი გამშვებ პუნქტთან ხვდება ხოლმე.
