რუსეთში საპენსიო ასაკი გაიზარდა და გადასახადებმა მოიმატა

პრეზიდენტ ვლადიმირ პუტინის ინაუგურაციიდან ერთ თვეზე ნაკლები დროის შემდეგ რუსეთის ხელისუფლებამ უაღრესად არაპოპულარული ნაბიჯები გადადგა – საპენსიო ასაკის გაზრდა და  გადასახადის მომატება, რაც მთელი სამომხმარებლო საქონლის ფასზე ახდენს გავლენას.  რა არის ასეთი ნაბიჯის მიზეზი?

•  რას უნდა ელოდოს ვლადიმირ პუტინის გამარჯვებით რუსეთი და მსოფლიო?

გადასახადები

რუსეთის პრემიერ-მინისტრმა დმიტრი მედვედევმა განაცხადა, რომ ხელისუფლებამ დამატებით ღირებულებაზე გადასახადის (დღგ) 18-დან 20 პროცენტამდე გაზრდის წინადადება წამოაყენა. როგორც ჩანს, 20-პროცენტიანი გადასახადი 2019 წლიდან ამოქმედდება, – იუწყება რუსული გაზეთი  „კომერსანტი“.

დღგ – არის გადასახადი, რომელსაც სახელმწიფო სხვადასხვა საქონლის მწარმოებლებისგან ამოიღებს. მეწარმე ამ გადასახადს საკუთარი საქონლის ღირებულების დაანგარიშებისას ითვალისწინებს, ანუ გადასახადის გაზრდა უშუალოდ ზემოქმედებს მომხმარებლის მიერ გადასახდელ ფასზე.  

დღევანდელი რუსული ეკონომიკის პირობებში, დღგ-ს ორი პროცენტით გაზრდამ, შესაძლოა, გადასახადების ერთი პროცენტით გაზრდა გამოიწვიოს. ექსპერტები ერთხმად ამტკიცებენ, რომ რადგანაც რუსეთის მოსახლეობის შემოსავალი არ იზრდება, ფასების გაზრდას ზოგიერთ საქონელზე მოთხოვნილების შემცირება მოჰყვება.

პენსიები

დღგ-ს გაზრდასთან ერთად რუსეთის ხელისუფლებამ საპენსიო ასაკის გაზრდის გადაწყვეტილებაც მიიღო.

• უახლოესი ათი წლის განმავლობაში მამაკაცების საპენსიო ასაკი 60-დან 65 წლამდე მოიმატებს;
  
• ქალების საპენსიო ასაკი 8 წლით გაიზრდება და 2034 წლისთვის  63 წელს შეადგენს.

რუსეთის საპენსიო ფონდი, უკვე რამდენიმე წელიწადია, არ ივსება, და როგოც ჩანს, ხელისუფლება ამ გზით მის დაბალანსებას ცდილობს. ქალებისა და მამაკაცების საპენსიო ასაკს შორის განსხვავება რომ მცირდება, რუსეთის ხელისუფლება ამას „ქალის საზოგადოებრივი როლის შეცვლითა“ და „ოჯახის წევრებს შორის საოჯახო დატვირთვის თანაბარი განაწილებით“ ხსნის.

მიზეზები და შედეგები

რუსეთის ხელისუფლება ირწმუნება, რომ ეკონომიკაზე ამ ღონისძიებების დადებითი გავლენა რამდენიმე წელიწადში თვალსაჩინო გახდება.

მაგრამ დღგ-ს გაზრდის შედეგად ფასების მატება მომენტალურად მოხდება, საპენსიო ასაკის გაზრდა კი  რუსეთის ბევრი მაცხოვრებლისთვის ტრაგედიად იქცევა – ისინი მრავალი წლის განმავლობაში დაბალანაზღაურებად სამსახურებში სწორედ პენსიის იმედით მუშაობდნენ.

ბევრი ექსპერტის აზრით, ასეთი არაპოპულარული ღონისძიებების მთავარი მიზეზია რუსეთის ეკონომიკის რთული მდგომარეობა, რომელიც უკვე რამდენიმე წელიწადია, ზრდას ვერ აღწევს. ეს დიდწილად ორი ფუნდამენტური პროცესის შედეგია: ყირიმის ანექსიისა და აშშ-ს საპრეზიდენტო არჩევნებში ჩარევისთვის დაწესებული საერთაშორისო სანქციები – ნავთობსა და ბუნებრივ აირზე – რუსეთის ექსპორტის მთავარ საგნებზე ფასების დაცემის.

•  რა არის აშშ-სა და ევროკავშირის მიერ რუსეთის წინააღმდეგ დაწესებული სანქციების არსი და როგორია ამის შედეგი?

პროტესტი საზოგადოებაში

საპენსიო ასაკის გაზრდის შესახებ ხელისუფლებამ განაცხადა ფეხბურთის  მსოფლიოს ჩემპიონატის გახსნის დღეს, რომელიც ახლა რუსეთში ტარდება. თითქმის მაშინვე, სრულიად რუსეთის პროფკავშირების გაერთიანებამ საპროტესტო ონლაინ-პეტიცია შექმნა. მის ტექსტში ნათქვამია, რომ „რუსეთში საპენსიო ასაკის გაზრდისთვის დღეს საფუძველი არ არსებობს“. დღეისთვის საპენსიო ასაკის გაზრდის წინააღმდეგ პეტიციას თითქმის მილიონნახევარმა ადამიანმა მოაწერა ხელი.

რუსეთის პრეზიდენტის ადმინისტრაციაში ამ არაპოპულარული ღონისძიების გამო შესაძლო პროტესტის საშიშროებას ხედავენ, და რეფორმის შერბილებისთვის ემზადებიან, – წყაროებზე დაყრდნობით წერდა  რუსული გაზეთი „ვედომოსტი“.