პოლიტიკაში დაბრუნება მას პრემიერ-მინისტრმა კვირიკაშვილმა სთხოვა" />

ბიძინა ივანიშვილი პოლიტიკაში ბრუნდება. ის კვლავ “ქართულ ოცნების” თავმჯდომარე გახდება

პოლიტიკაში დაბრუნება მას პრემიერ-მინისტრმა კვირიკაშვილმა სთხოვა

ბიძინა ივანიშვილი. ფოტო: REUTERS/დავით მძინარიშვილი

საპრეზიდენტო არჩევნებამდე რამდენიმე თვით ადრე, ბიძინა ივანიშვილი მმართველი გუნდის – “ქართული ოცნება-დემოკრატიული საქართველოს” თავმჯდომარეობას დაუბრუნდება. პრემიერ-მინისტრ გიორგი კვირიკაშვილის განცხადებით, პოლიტიკაში დაბრუნება ივანიშვილს პირადად მან მთელი გუნდის სახელით თხოვა და ბიძინა ივანიშვილი ამ შეთავაზებას დათანხმდა.

ამის შესახებ დღევანდელ ბრიფინგზე საქართველოს პრემიერმა და პარტიის ამჟამინდელმა ლიდერმა გიორგი კვირიკაშვილმა განაცხადა. ბრიფინგს წინ უძღოდა საპარლამენტო უმრავლესობის წევრების შეხვედრა პრემიერთან.

„დადგა აუცილებლობა მაქსიმალურად გავაძლიეროთ პარტია ქართული ოცნება. ჩვენთვის ძალიან მნიშვნელოვანია პარტიის შიგნით მიმდინარე პროცესები. ამიტომ მნიშვნელოვანია, რომ ჩვენ შევინარჩუნოთ ერთსულოვნება ფუნდამენტურ სახელმწიფო საკითხებთან დაკავშირებით. ყველასათვის ნათელია რამდენად დიდია ჩვენი გუნდისთვის მისი დამაარსებლის, ბატონი ივანიშვილის ფაქტორი. მინდა გითხრათ რომ მე შევთავაზე და ვთხოვე ჩვენი პარტიის დამფუძნებელს რომ სათავეში ჩაუდგეს პარტიას და მოხარული ვარ რომ მან თანხმობა განაცხადა“, – განაცხადა გიორგი კვირიკაშვილმა.

პრემიერის თქმით, უახლოეს დღეებში გაიმართება პარტიის პოლიტსაბჭოს სხდომა, რასაც მოჰყვება ყრილობა, სადაც დელეგატები აირჩევენ ბიძინა ივანიშვილს პარტიის თავმჯდომარედ. ასევე არჩეული იქნება პოლიტსაბჭოს ახალი შემადგენლობა.

უკვე ოთხი წელია ბიძინა ივანიშვილი აღარ არის საქართველოს პრემიერ-მინისტრი. 2012 წელს მან და მის მიერ შექმნილმა პოლიტიკურმა კოალიციამ არჩევნების გზით მიხეილ სააკაშვილის ხელისუფლება დაამარცხა. 

არჩევნებში გამარჯვების შემდეგ ივანიშვილი საქართველოს პრემიერ-მინისტრი გახდა, თუმცა 2013 წლის შემოდგომაზე  ივანიშვილმა პრემიერ-მინისტრის პოსტი საკუთარი სურვილით დატოვა და როგორც თავად აცხადებდა, სამოქალაქო სექტორში გადაინაცვლა.

პრემიერ-მინისტრობიდან გადადგომის შემდეგ ივანიშვილს რაიმე თანამდებობა არ ეკავა. თავდაპირველად, ის ხშირად ჩნდებოდა მედიასთან, 2016 წლის საპარლამენტო არჩევნების დროს აქტიურად მონაწილეობდა წინასაარჩევნო კამპანიაში, მართავდა ვრცელ პრესკონფერენციებს ჟურნალისტებისთვის, თუმცა, ბოლო ერთი წელია, ის საჯაროდ იშვიათად ჩნდება. 

მას მონაწილეობა არ მიუღია 2017 წლის თვითმმართველობის არჩევნების წინასაარჩევნო კამპანიაში. მედიაში ის ძირითადად მრავალწლიანი ხეების გადაზიდვის პროცესის გაშუქებისას ჩნდებოდა.

თუმცა, საქართველოში ეჭვი არავის ეპარებოდა იმაში, რომ ივანიშვილი ქვეყნის არაფორმალურ მმართველად რჩებოდა და მმართველი გუნდი გადაწვეტილებებს მხოლოდ მასთან შეთანხმებით იღებდა. 

2018 წლის შემოდგომაზე საქართველოში საპრეზიდენტო არჩევნებია. „ქართულ ოცნებას“ ამ თანამდებობაზე თავისი კანდიდატი ჯერ არ წარუდგენია.

Facebook Comments

ასევე წაიკითხეთ