ყინწვისში სასულიერო პირებს შორის დაპირისპირება მოხდა

შსს-მ გამოძიება იარაღის უკანონო შეძენა-შენახვა-ტარების ბრალდებით დაიწყო

მედიაში გავრცელებული ინფორმაციით, ყინწვისის მამათა მონასტრის წინამძღვარმა, დავით აქიაშვილმა არქიმანდრიტი საბა ჟღენტი ცეცხლსასროლი იარაღით ხელში დაჭრა.

JAMnews-ისთვის ცნობილი გახდა, რომ ყინწვისის მონასტრის წინამძღვარი, მამა დავით აქიაშვილი მიტროპოლიტ იობის (აქიაშვილის) შვილია და ის რუის-ურბნისის ეპარქიაში დიდი ძალაუფლებით სარგებლობს. 

არქიმანდრიტი საბა ჟღენტი, რომელიც ყინწვისში კეთილგონიერი ავაზაკის სახელობის მონასტრის წინამძღვარია, მამა დავითთან დაპირისპირებას უარყოფს. 

ყინწვისის მონასტერში ინციდენტს უარყოფს მიტროპოლიტი იობიც. 

თუმცა, შინაგან საქმეთა სამინისტროში აცხადებენ, რომ ყინწვისში მომხდარ ფაქტთან დაკავშირებით გამოძიება დაწყებულია სისხლის სამართლის კოდექსის 236-ე მუხლით, რაც  ცეცხლსასროლი იარაღის ან საბრძოლო მასალის უკანონო შეძენა/შენახვას გულისხმობს. უწყებაში სხვა დეტალებზე ამ ეტაპზე არ საუბრობენ.

• კორონავირუსი და ბოლო ჟამის ეკლესია. საუბარი გია ნოდიასთან და ბექა მინდიაშვილთან
• პატრიარქი: სიცოცხლეც და გარდაცვალებაც უფლის ხელშია

თეოლოგი ბექა მინდიაშვილი წერს, რომ “საქართველოში ბევრი სასულიერო პირი იწონებს თავს იარაღით და მებრძოლი მართლმადიდებლობის შესახებ წარმოდგენა პირდაპირ მოძალადე მართლმადიდებლობასთან არის გაიგივებული.”

მინდიაშვილი იხსენებს, რომ ყინწვისის მონასტრიდან რამდენიმე წლის წინ, იარაღი ამოიღეს. 90-იან წლებში კი იმ დროისთვის ყველაზე პუპულარული მღვდელი, თეიმურაზ ბერიშვილი საკურთხეველში  მხედრიონის კუთვნილი იარაღის შენახვის გამო დააკავეს, თუმცა პატრიარქის მოთხოვნით ორ თვეში გამოუშვეს და ახლა ის სამების მართლმკვეთელი დეკანოზია.