ყარაბაღი, ბრძოლა გრძელდება: 23 ოქტომბერი

„აზერბაიჯანის შეიარაღებული ძალები სრულად იცავს ცეცხლის შეწყვეტის ჰუმანიტარულ შეთანხმებას“, – განაცხადეს უწყებაში.

აშშ-ის პრეზიდენტს, როგორც ჩანს, მხედველობაში ჰქონდა აშშ-ის სახელმწიფო მდივნის, მაიკ პომპეოს სომხეთისა და აზერბაიჯანის საგარეო საქმეთა მინისტრებთან, ზოგრაბ მნაცაკანიანსა და ჯეიჰუნ ბაირამოვთან შეხვედრები. საგარეო უწყებების ხელმძღვანელებთან მოლაპარაკებები დღეს გაიმართა.

ტრამპმა ასევე განაცხადა, რომ მონაწილეობს მთიანი ყარაბაღის კონფლიქტის შესახებ მოლაპარაკებებში, მაგრამ არ დაუზუსტებია, ესაუბრა თუ არა ორი ქვეყნის ლიდერებს.

„არ მინდა ლაპარაკი“, – თქვა აშშ-ის პრეზიდენტმა.

თუმცა, მან განცხადება გააკეთა სომხეთისა და სომხების შესახებ:

„ჩვენ ველაპარაკებით სომხებს. ძალიან კარგი ურთიერთობები გვაქვს სომხეთთან. იქ ძალიან ბევრი კარგი ადამიანი ცხოვრობს, შესანიშნავი ხალხი. ვნახოთ, რა იქნება“.

აზერბაიჯანის შეიარაღებული ძალები ყარაბაღში, ქალაქ მარტუნის საარტილერიო დაბომბვას ახორციელებს. რამდენიმე წუთია, სტეპანაკერტის დაბომბვაც დაიწყო.

ზოგრაბ მნაცაკანიანმა და მაიკ პომპეომ ყარაბაღის კონფლიქტის მშვიდობიანი დარეგულირების მნიშვნელობასა და ეუთოს მინსკის ჯგუფის ფარგლებში, მოლაპარაკებების გაგრძელების აუცილებლობაზე ისაუბრეს. შეხვედრის ზოგიერთი დეტალის შესახებ ინფორმაციას, სომხეთის საგარეო საქმეთა სამინისტროს პრესსამსახური ავრცელებს.

მნაცაკანიანმა პომპეოსთან შეხვედრისას ხაზი გაუსვა, რომ აზერბაიჯანის მხრიდან აგრესია თურქეთის პირდაპირი ჩართულობით ხორციელდება. მისი თქმით, თურქეთი არა მხოლოდ სამხედრო-ტექნიკურ დახმარებას უწევს აზერბაიჯანს, არამედ რეგიონში შეიარაღებული ტერორისტებიც ჩაჰყავს.

სომხეთის საგარეო საქმეთა მინისტრმა აშშ-ის სახელმწიფო მდივანს ინფორმაცია მიაწოდა საბრძოლო მოქმედებების დროს, აზერბაიჯანის შეიარაღებული ძალების მიერ ჩადენილ ომის დანაშაულებთან დაკავშირებით: ყარაბაღის მშვიდობიანი მოსახლეობისა და ინფრასტრუქტურის განზრახ დაბომბვა, დამამცირებელი მოპყრობა მშვიდობიანი მოსახლეობისა და სამხედრო ტყვეების მიმართ.

„აზერბაიჯანის მხრიდან ცეცხლის შეწყვეტის შეთანხმების დარღვევა და არცახელი ხალხის წინააღმდეგ საბრძოლო მოქმედებების გაგრძელება, კიდევ ერთხელ ადასტურებს აზერბაიჯანის განზრახვას, ომის გზით გადაწყვიტოს საკითხი“, – განაცხადა ზოგრაბ მნაცაკანიანმა.

მხარეებმა ყარაბაღში ვითარების ესკალაცია განიხილეს.

„განვიხილეთ ყარაბაღის საკითხში სომხური მხარის დესტრუქციული პოლიტიკა, აზერბაიჯანის მშვიდობიანი მოსახლეობის დაბომბვა, სომხების მიერ დაქირავებული მებრძოლებისა და ტერორისტების რეკრუტირება“, – ნათქვამია აზერბაიჯანის საგარეო საქმეთა სამინისტროსგანცხადებაში.

ამას გარდა, მხარეებმა ორმხრივი ურთიერთობების შესახებ გაცვალეს მოსაზრებები.

არაიკ არუთუნიანმა რუსეთის პრეზიდენტს ღია წერილი მიწერა. ყარაბაღის პრეზიდენტი ვლადიმირ პუტინის ბოლო გამოსვლას შეეხო, რომელიც მას „ვალდაისის“ ფორუმზე ჰქონდა:

„გამოსვლისას, თქვენ ხაზი გაუსვით შემდეგს: „ეს კონფლიქტი დაიწყო არა, როგორც უბრალოდ სახელმწიფოთაშორისი კონფლიქტი და ბრძოლა ტერიტორიებისთვის, არამედ, ის დაიწყო ეთნიკურ ნიადაგზე. სამწუხაროდ, ეს ფაქტია, რომ სუმგაითსა და შემდეგ მთიან ყარაბაღში, სასტიკი დანაშაულები ჩაიდინეს სომეხი ხალხის წინააღმდეგ. ჩვენ უნდა გავითვალისწინოთ ეს ყველაფერი კომპლექსში“.

სამწუხაროდ, აზერბაიჯანი ამ დრომდე აგრძელებს გენოციდის პოლიტიკას. გთხოვთ, ყველაფერი გააკეთოთ შესაძლებლობების ფარგლებში საბრძოლო მოქმედებების შესაჩერებლად და აზერბაიჯან-ყარაბაღის კონფლიქტში, პოლიტიკური პროცესების განახლებისთვის“.

• „უკვე სულ მცირე ხუთი ათასი ადამიანი დაიღუპა ორივე მხარეს“ – პუტინი ყარაბაღის ომის შესახებ

აზერბაიჯანის პრეზიდენტმა ილჰამ ალიევმა აზერბაიჯანის არმიის მიერ, ოთხ რაიონში, კიდევ 13 დასახლებული პუნქტის აღების შესახებ განაცხადა.

ტვიტერის საკუთარ გვერდზე, მან შემდეგი დასახლებული პუნქტები ჩამოთვალა:

ხოჯავენდის რაიონი: დოლნარი და ბუნიადლი;

ჯებრაილის რაიონი: დაღ თუმასი, ნიუსუსი, ჰალაფლი, მინბაშილი, ვეისელი;

ზანგილანის რაიონი: ვენედლი და მირზაჰასანლი;

გუბადლის რაიონი: ზილანლი, ქიურდ მაჰრიზლი, მუღანლი და ალაგურშაღი.

საერთაშორისო უფლებადაცვითი ორგანიზაციის, Human Rights Watch-ის ექსპერტებმა 2020 წლის ოქტომბერში, მთიან ყარაბაღში, მშვიდობიანი მოსახლეობით დასახლებულ ტერიტორიებზე კასეტური ბომბების გამოყენების ოთხი შემთხვევის დოკუმენტირება მოახდინეს.

„კასეტური ბომბების გამოყენების გაგრძელება – განსაკუთრებით მჭიდროდ დასახლებულ რაიონებში – მეტყველებს მშვიდობიანი მოსახლეობის უსაფრთხოების აშკარა უგულებელყოფაზე. კასეტური ბომბები არავითარ შემთხვევაში არ უნდა გამოიყენოს არავინ, მით უმეტეს, ქალაქებში, მშვიდობიანი მოსახლეობისთვის პროგნოზირებადი და მიუღებელი ზიანის გამო“, – განაცხადა Human Rights Watch-ის შეიარაღების მიმართულებისა და კასეტური საბრძოლო საშუალებების კოალიციის ხელმძღვანელმა, სტივენ გუსმა.

ორგანიზაციამ შეისწავლა ჭურვის ნამსხვრევები, აფეთქებული საბრძოლო საშუალების ნაწილები, ასევე, ფოტოსურათები, რომლებიც ჰადრუთში, კასეტური ბომბების გამოყენებას ადასტურებს. Human Rights Watch-მა, რამდენჯერმე მიმართა აზერბაიჯანის ხელმძღვანელობას თხოვნით, მისცეს საკუთარ ტერიტორიაზე საგამოძიებო საქმიანობის ჩატარების საშუალება, მაგრამ ამ დრომდე არ მიუღია ნებართვა.

აზერბაიჯანის გენერალური პროკურატურის განცხადების თანახმად, საბრძოლო მოქმედებების დაწყებიდან, აზერბაიჯანში, 63 მშვიდობიანი მოქალაქე დაიღუპა, კიდევ 298 კი დაიჭრა.

დღეს, დღის მეორე ნახევარში, აშშ-ის სახელმწიფო მდივანი მაიკ პომპეო ცალ-ცალკე შეხვდება სომხეთისა და აზერბაიჯანის საგარეო საქმეთა მინისტრებს.

აზერბაიჯანის საგარეო საქმეთა მინისტრთან, ჯეიჰუნ ბაირამოვთან შეხვედრა დაგეგმილია 17:30 საათზე (15:30 CET), სომხეთის საგარეო უწყების ხელმძღვანელთან, ზოგრაბ მნაცაკანიანთან კი 18:30 საათზე (16:30 СЕТ).

ყარაბაღში, ბრძოლების დაწყებიდან 27-ე დღე

• რუსეთის პრეზიდენტმა კონფლიქტთან დაკავშირებით საკუთარი პოზიცია გამოთქვა: „ჩვენ განსაკუთრებული კავშირი გვაქვს სომხეთთანაც და აზერბაიჯანთანაც“; „ჩვენი (რუსეთის და თურქეთის) პოზიციები ერთმანეთს არ ემთხვევა, იმიტომ, რომ, ჩვენი აზრით, სადავო საკითხები უნდა გადაიჭრას არა იარაღის დახმარებით, არამედ მოლაპარაკებების მაგიდასთან“.

• „უკვე სულ მცირე ხუთი ათასი ადამიანი დაიღუპა ორივე მხარეს“ – პუტინი ყარაბაღის ომის შესახებ

• აზერბაიჯანის პრეზიდენტის განცხადებით, აზერბაიჯანის არმია უკვე სრულად აკონტროლებს ირანთან საზღვრს. სომხეთის თავდაცვის სამინისტრომ ეს კატეგორიულად უარყო და განაცხადა, რომ მთელი საზღვრის გასწვრივ, ინტენსიური ბრძოლები მიმდინარეობს.

• სომხეთის პრემიერ-მინისტრმაგანმარტა, თუ რას ნიშნავს მისი განცხადება ყარაბაღის კონფლიქტის დიპლომატიური გადაწყვეტის შეუძლებლობის შესახებ. სომხეთისთვის პრინციპულ საკითხად მან მთიანი ყარაბაღის საკითხი დაასახელა და თქვა, რომ სომხეთი კომპრომისისთვის მზად არის, აზერბაიჯანი კი – არა.

• აზერბაიჯანის პრეზიდენტმა იაპონურ გაზეთ Nikkei-სთან ინტერვიუში საკუთარი პოზიციაგამოთქვა: „უნდა გათავისუფლდეს აზერბაიჯანის ყველა რაიონი, მოლაპარაკებებზე მთავარია – გაირკვეს, როდის მოხდება ეს“; „მთიანი ყარაბაღის სომხებს, შეიძლება, კულტურული ავტონომია შევთავაზოთ“.

• აზერბაიჯანმა განაცხადა, რომ სომეხი სამხედროები სარაკეტო დარტყმის მიყენებას ცდილობდნენ ოღუზი-გაბალა-ბაქოს წყალსადენზე, რომელიც სასმელი წყლით ამარაგებს აფშერონის ნახევარკუნძულს და სტრატეგიული მნიშვნელობისაა.

• ოფიციალურმა ბაქომ სომხეთი აზერბაიჯანის ტერიტორიების სარაკეტო დაბომბვაში დაადანაშაულა, სომხეთის თავდაცვის სამინისტრომ ეს კატეგორიულად უარყო.

• ყარაბაღელმა ქალებმა და ბავშვებმა ერევანში, აშშ-ის საელჩოსთან საპროტესტო აქცია გამართეს. ისინი მთიანი ყარაბაღის დამოუკიდებლობის აღიარებასა და ომის შეჩერებას ითხოვენ.

• ახალი ამბები, ფოტო/ვიდეო ყარაბაღში მიმდინარე საბრძოლო მოქმედებებთან დაკავშირებით – 22 ოქტომბერი, 2020