წყლის ჭავლისა და ცრემლსადენი გაზის ნაცვლად მშვიდობიან მომიტინგეებს "ტიტუშკები" არბევენ. პროტესტის მეათე დღე
რუსთაველის გამზირზე 7-8 დეკემბრის ღამეს წყლის ჭავლისა და ცრემლსადენი გაზის ნაცვლად მშვიდობიან დემონსტრანტებს მოძალადე ჯგუფები, ე.წ. “ტიტუშკები” არბევდნენ.
შავებში ჩაცმული ნიღბიანი პირები აქციის მშვიდობიან მონაწილეებსა და ჟურნალისტებს თავს ესხმოდნენ, დაარბიეს ოპოზიციური პარტიის ოფისი. რამდენიმე ასეთ შემთხვევას პოლიციაც შეესწრო, თუმცა მათ რეაგირება არ ჰქონიათ და თვითმხილველები ამბობენ, რომ პოლიციამ მშვიდობიანად გააცილა მოძალადეები.
თავდასხმა “ტვ პირველის” გადამღებ ჯგუფზე
ე.წ. “ტიტუშკები” პირდაპირ ერთერში დაესხნენ თავს “ტვ პირველის” გადამღებ ჯგუფს სწორედ მაშინ, როდესაც ისინი მოძალადე ჯგუფებს ამხელდნენ. მათ სასტიკად სცემეს ოპერატორ გიორგი შეწირულს და თავი გაუტეხეს. დაშავდა ჟურნალისტი მაკა ჩილაძე. ორივე მათგანს წაართვეს ტექნიკა.
ჟურნალისტიც და ოპერატორიც საავადმყოფოში გადაიყვანეს. ექიმების თქმით, ორივე მათგანს ტვინის შერყევა აქვს, თუმცა მდგომარეობა სტაბილურია.
მოგვიანებით სპეციალურმა საგამოძიებო სამსახურმა გაავრცელა ინფორმაცია, რომ ჟურნალისტების ცემის ფაქტზე მიმდინარეობს გამოძიება. საქმე სისხლის სამართლის კოდექსის 154-ე მუხლის მეორე ნაწილით არის აღძრული. ეს მუხლი ჟურნალისტისთვის პროფესიულ საქმიანობაში ხელის შეშლას გულისხმობს და ითვალისწინებს ჯარიმას ან ორ წლამდე პატიმრობას.
“ტვ პირველის” გადამღებ ჯგუფზე თავდასხმისას ბესიკის ქუჩაზე იძალადეს ასევე ჟურნალისტ მაკა ჯანაშიაზე, რომელიც შემთხვევას შეესწრო და ტელეფონით ვიდეოს იღებდა.
“მივდიოდით ბესიკის ქუჩიდან რუსთაველისკენ, ბესიკის ქუჩისკენ შემოგვესმა ყვირილი და ჩოჩქოლი ცოტა უკან დავიხიეთ და დავინახე რომ პატრულის მანქანასთან, მაკა ჩიხლაძეს სპრეი შეასხა ვიღაც შავებში ჩაცმულმა ნიღბიანმა ადამიანებმა, მაშინვე ჩავრთე კამერა ტელეფონის და წავედი რომ გადამეღო, ამასობაში მაკამ გაუხვია, იმიტომ რომ ეს ნიღბიანი ჯგრო და ადამიანები გავიდნენ ქუჩაზე, რომლის სახელიც არ მახსოვს, მარჯვენა მხარეს. მაკა გაჰყვა და მეც გავყევი, ამასობაში ოპერატორიც დამეწია, იღებდა, თქვენი ოპერატორი [ტვ “პირველის”] და რომ ვიღებდი ამას. მაკას რომ ეჭიდავებოდა ეს ერთ-ერთი ნიღბიანი ადამიანი, ერთი ტიპი მეცა, ნიღბიანი, რომელსაც, დამამახსოვრდა რომ სახეზე ჰქონდა ჩონჩხის გამოსახულება. მეცა, ტელეფონი გამტაცა და სახეში ჩამარტყა მუშტი, მის გვერდზე მყოფმა წიხლები დამიშინა ფეხებში და ეგ იყო და ეგ, მერე ვნახე რომ გამოქცეულ ჯგუფს ოპერატორი უცემია და იყო საშინელ მდგომარეობაში. როცა მართმევდა ტელეფონს ჟურნალისტი ვარ-მეთქი ვუთხარი და ეს რომ ვუთხარი, ზუსტად მაგიტომ ჩამარტყა სახეში მე მგონი, ასეთი ეჭვი მაქვს”, – თქვა მაკა ჯანაშიამ “ტვ პირველთან” საუბრისას.
“კოალიცია ცვლილებებისთვის” ოფისის დარბევა. სცემეს ორი პირი
ე.წ. “ტიტუშკები” შეიჭრნენ “კოალიცია ცვლილებებისთვის” ოფისში ბესიკის ქუჩაზე. მათ დაარბიეს ოფისი და თავს დაესხნენ ორ პირს. ნაცემია კოალიციის ერთ-ერთი წევრი, კობა ხაბაზი. მისი თქმით, ოფისის ლიფტიდან გამოდიოდა, როდესაც 50-მდე ადამიანი თავს დაესხა.
„კიბეებთან შავებში ჩაცმული 50 კაცი იყო, როგორც კი დამინახეს, აგერო დაიძახეს და ჩამარტყეს, თავში ჩამარტყეს, იყვნენ დავალებით მოსული რომ ფიზიკურად ეცემათ ვინმე…მობილური მაქვს დაკარგული“, – ამბობს ხაბაზი.
როგორც პარტიაში აცხადებენ, ოფისში შესულ პირებს ნიღბები ეკეთათ, ამიტომ მათი იდენტიფიცირება ვერ მოახერხეს.
თავდასხმა მსახიობ გიორგი მახარაძეზე
ე.წ. “ტიტუშკებმა” სცემეს მსახიობ გიორგი მახარაძესაც. ის იხსენებს, რომ როდესაც მას სცემდნენ ერთერთი პოლიციელი ამ ყველაფერს უყურებდა და არაფერი იღონა მოძალადეთა შესაჩერებლად.
“რუსული რეჟიმი დევნის მშვიდობიან მოქალაქეებს”, – საქართველოს პრეზიდენტი
თბილისში მომხდარ ფაქტებს გამოეხმაურა პარიზში მყოფი საქართველოს პრეზიდენტი სალომე ზურაბიშვილი. მან თქვა, რომ თბილისში რუსული რეჟიმი კვლავ შეუდგა საქმეს.
“ქუჩებში დევნის მშვიდობიან მოქალაქეებს, რომლებიც გაურბიან ტერორს, მიზანში იღებს პოლიტიკოსებს, ჟურნალისტებს, მსახიობებს… ამტვრევს ოპოზიციის ოფისების კარებებს შიგნით მყოფი პოლიტიკოსების დარბევისა და დაზიანების მიზნით”, – წერს პრეზიდენტი სალომე ზურაბიშვილი პლატფორმა X-ზე. ის იყენებს ჰეშთეგს #terrorinGeorgia (ტერორი საქართველოში).
ზურაბიშვილი ასევე ამბობს, რომ ბრძოლა მომავლისთვის გრძელდება და არცერთ რეჟიმს არ შეუძლია წინ აღუდგეს ხალხის ნებას იმის მიუხედავად, თუ რა საშუალებებს გამოიყენებენ მის წინააღმდეგ.
#terrorinGeorgia : The Russian regime is back at work tonight in Tbilisi – chasing civilians through the streets as they flee terror, targeting politicians, media, artists …Breaking down the doors of opposition offices to raid and brutalize politicians inside pic.twitter.com/Mt71Bq7cbl
— Salome Zourabichvili (@Zourabichvili_S) December 7, 2024
სახალხო დამცველი საპოლიციო ძალებს რეაგირებისკენ მოუწოდებს
დაუდგენელ პირთა ჯგუფების მიერ ძალადობის ფაქტებს გამოეხმაურა სახალხო დამცველი ლევან იოსელიანი. მან დაგმო აქციის მონაწილეების მიმართ რეპრესიები. ომბუდსმენმა მოუწოდა საპოლიციო ძალებს, დაუყოვნებლივ მოხადინონ რეაგირება და უზრუნველყონ ადგილზე მოქალაქეთა უსაფრთხოება.
