"სერიოზული ხარვეზები" - რა წერია წამების პრევენციის კომიტეტის დასკვნაში "ვივამედისა" და სააკაშვილის შესახებ
წამების პრევენციის კომიტეტის დასკვნა
ევროპის საბჭოს წამების პრევენციის კომიტეტი აქვეყნებს ანგარიშს კლინიკა “ვივამედის” დაცული პალატების შესახებ, სადაც მსჯავრდადებულები სამედიცინო მომსახურებას იღებენ. ანგარიშში აღნიშნულია, რომ “ვივამედი” პაციენტებს ვერ სთავაზობს შესაბამის თერაპიულ გარემოს, რადგან “საბოლოო სიტყვა არა ექიმებზე, არამედ პენიტენციურ სისტემაზეა”.
დოკუმენტში საქართველოს მესამე პრეზიდენტი, მიხეილ სააკაშვილიც არის ნახსენები, თუმცა კონფიდენციალურობიდან გამომდინარე, დოკუმენტში ის მოხსენიებულია როგორც პაციენტი C-ი. კომიტეტის შეფასებით, კლინიკაში არსებული მჩაგვრელი და დამამცირებელი გარემო არ უწყობს ხელს მისი ჯანმრთელობის მდგომარეობის გაუმჯობესებას.
ანგარიშის მიხედვით, სააკაშვილის პალატაში CCTV კამერების განთავსებით მისი პირადი სივრცე დაირღვა და მის ადამიანურ ღირსებას შეურაცხყოფა მიაყენეს. როგორც კომიტეტი წერს, კამერები განთავსებულია სააკაშვილის პალატის ყველა ოთახში, გარდა აბაზანისა და საპირფარეშოსი, მათ შორის საძინებელ ოთახშიც.
ანგარიში დღეს გამოქვეყნდა. ევროპის საბჭოს წამებისა და არაადამიანური ან ღირსების შემლახველი მოპყრობისა თუ დასჯის საწინააღმდეგო კომიტეტის წევრები დაუგეგმავად კლინიკა ვივამედს გასული წლის მარტში ეწვივნენ და ვითარებას რამდენიმე დღის განმავლობაში სწავლობდნენ.
რა წერია ანგარიშში
● ანგარიშში წერია, რომ პაციენტის [სააკაშვილის] პირადი ცხოვრებისა და სამედიცინო კონფიდენციალურობის მიმართ პატივისცემის სრული ნაკლებობაა. გარდა ამისა, წამების კომიტეტი კლინიკა “ვივამედში” მკაცრი რეჟიმის პალატების ფუნქციონირების წესის რეკომენდაციას გასცემს, რომელშიც ნათქვამია: “დელეგაციის დასკვნები ადასტურებს სამედიცინო პერსონალის პროფესიული არადამოუკიდებლობის მუდმივ პრობლემას. ამიტომ, კომიტეტი მიიჩნევს, რომ დიდი ხნის დაგეგმილი ციხის ჯანდაცვის პასუხისმგებლობების გადაცემა ჯანდაცვის სამინისტროსთვის აუცილებელი და დროულია.”
● ანგარიშში ასევე წერია: “კიდევ ერთი სერიოზული ხარვეზი იყო ის, რომ კლინიკას არ ჰყავდა დასაქმებული არც ფსიქიატრი და არც კლინიკური ფსიქოლოგი. პრინციპში, როდესაც საჭირო იყო, კლინიკას შეეძლო ასეთი სპეციალისტის მომსახურების მიღება კლინიკის მიღმა კონსულტანტებისგან, მაგრამ პაციენტის სიტუაცია იძლევა მტკიცებულებას, რომ პრაქტიკაში ამან კარგად არ იმუშავა. მისი ჯანმრთელობის მდგომარეობის დეტალებში შესვლის სურვილის გარეშე, ფსიქიატრიული დახმარების შეთავაზება, საუკეთესო შემთხვევაში აშკარად იყო მწირი და სპონტანური. კომიტეტი რეკომენდაციას იძლევა, გადაიდგას ნაბიჯები ფსიქიატრიულ დახმარებასთან წვდომის გასაუმჯობესებლად პატიმრებისთვის, რომლებიც “ვივამედის” კლინიკის მკაცრი რეჟიმის პალატებში არიან გადაყვანილი.”
● “სააკაშვილი დაღმავალი ფიგურაა ქართულ პოლიტიკაში”. რას ფიქრობენ ექსპერტები “ნაციონალური მოძრაობის” დაშლაზე
● სახალხო დამცველის კონსილიუმი: სააკაშვილი მჭიდრო სამედიცინო მეთვალყურეობას საჭიროებს
● სააკაშვილის საქმეები. რისთვის ზის ციხეში ყოფილი პრეზიდენტი
● ანგარიშში მოცემულია საქართველოს მთავრობის პასუხიც: “პაციენტ C-ს მკურნალობაში მედიკოსები სხვადასხვა სფეროდან არიან ჩართული. ექიმების მიერ გამოწერილი ყველა საჭირო გამოკვლევა და მკურნალობა ეთანხმება კონკრეტული დაავადებებისთვის გაწერილ გაიდლაინებსა და პროტოკოლებს. უნდა აღინიშნოს, რომ პაციენტი C-ი არაერთხელ ამბობდა უარს ფსიქოლოგსა თუ ფსიქიატრთან კონსულტაციაზე. წამების საწინააღმდეგო კომიტეტის ვიზიტის შემდეგაც კი, პაციენტ C-ის შესთავაზეს ფსიქიატრის მკურნალობა. მას ასევე ჰქონდა თავისუფლება თვითონ აერჩია ფსიქიატრი მკურნალობისთვის, თუმცა კიდევ ერთხელ უარი თქვა, დროის უქონლობაზე მითითებით”.
● ამავე ანგარიშში ვკითხულობთ: “ვივამედის” კლინიკის მე-4, მე-5 და მე-6 სართულებზე უსაფრთხოების ზომები იყო გადამეტებული, რაც შეუთავსებელია თერაპიისთვის გარემოს შექმნასთან. კერძოდ მე-5 სართულზე, პროცედურები უტოლდებოდა სამედიცინო კონფიდენციალურობის სრულ უარყოფას, რამაც დააზიანა ნდობა პაციენტსა და ჯანდაცვის პერსონალს შორის. ამან კი ძირი გამოუთხარა მისი სამედიცინო მდგომარეობის გაუმჯობესების პერსპექტივებს. ეს სავალალო მდგომარეობა კიდევ უფრო გაამწვავა წესებმა, რომელიც არეგულირებს პაციენტთა სამედიცინო მონაცემებისადმი მოპყრობას. პაციენტების თანხმობას მოითხოვდნენ მხოლოდ იმისთვის, რომ სამედიცინო ინფორმაცია მათი ადვოკატებისთვის მიეწოდებინათ, საპირისპირო შემთხვევაში, გადაწყვეტილებას სამედიცინო დახმარებასთან წვდომაზე იღებდა სპეციალური პენიტენციური სამსახური, რაც იმ პრინციპის აშკარა დარღვევაა, რომლის თანახმად, არასამედიცინო პერსონალს მსგავსი ინფორმაცია მხოლოდ უნდა მიეწოდოს მკაცრი მოთხოვნის აუცილებლობის საფუძველზე”.
● ანგარიშის 21-ე პარაგრაფი: “რამდენიმე ბოლო დროინდელ შემთხვევებთან დაკავშირებით, განცხადებები გაკეთდა მედიისთვის კლინიკის ექიმებისა და სპეციალური პენიტენციური სამსახურის ან იუსტიციის სამინისტროს პერსონალის მიერ პაციენტ სის ჯანმრთელობის მდგომარეობაზე, მკურნალობასა და შეთავაზებული თერაპიის მიმართ მიდგომაზე, აშკარად მისი წინასწარი თანხმობის გარეშე. ეს წარმოადგენდა სამედიცინო კონფიდენციალურობის მორიგ უხეშ დარღვევას”.
“დასტურია, რომ სააკაშვილი ღირსების შემლახავი მოპყრობის მსხვერპლია” – ენმ-ს განცხადება
“ნაციონალური მოძრაობა” პრევენციის კომიტეტის ანგარიშს განცხადებით ეხმაურება. პარტიაში აცხადებენ, რომ აღნიშნული ანგარიში დასტურია იმისა, რომ პრეზიდენტი მიხეილ სააკაშვილი კლინიკა ვივამედში ვერ იღებს სათანადო მკურნალობას და “ღირსებისთვის შემლახავი მოპყრობის მსხვერპლია”.
ენმ-ში აღნიშნავენ, რომ მიხეილ სააკაშვილის ეს მდგომარეობა “ოლიგარქ ივანიშვილის პოლიტიკური მართლმსაჯულებითაა გამოწვეული”. მათივე განმარტებით, სააკაშვილი, როგორც პოლიტიკური პატიმარი, დაუყოვნებლივ უნდა გათავისუფლდეს.
“პრეზიდენტ სააკაშვილის წინააღმდეგ აღძრული პოლიტიკური საქმეების ავტორი ყოფილი გენერალური პროკურორი, ბიძინა ივანიშვილის კლანის წევრი, შეერთებული შტატების მიერ რუსეთის უშიშროების სამსახურის ოფიცრობისთვის სანქცირებული, ოთარ ფარცხალაძეა. სააკაშვილის საქმეებს სასამართლოში წარმართავენ და/ან კურირებენ შეერთებული შტატების მიერ სანქცირებული მოსამართლეები.
პრეზიდენტი სააკაშვილი უნდა გათავისუფლდეს პოლიტიკური პატიმრობიდან და ამას ითხოვს ქართველი ხალხის უმრავლესობა. ძირითადი ოპოზიციური პოლიტიკური პარტიის ლიდერის პოლიტიკური პატიმრობა საფუძველშივე სპობს შესაძლებლობას, რომ 2024 წლის არჩევნებში ქართველმა ხალხმა თავისი ნება თავისუფალ, სამართლიან და კონკურენტულ გარემოში გამოხატოს. აღსანიშნავია, რომ 2024 წლის არჩევნების თავისუფალ, სამართლიან და კონკურენტულ გარემოში ჩატარება ევროკავშირის წევრობაზე მოლაპარაკებების გახსნის წინაპირობაა.” – ნათქვამია ოპოზიციური პარტიის განცხადებაში.
“ვივამედის” დირექტორი: “ეს არის პენიტენციური დაწესებულების კომპეტენცია”
ვივამედის დირექტორმა, ზურაბ ჩხაიძემ TV პირველთან სატელეფონო საუბარში თქვა, რომ ევროპული საბჭოს წამების პრევენციის კომიტეტის (CPT) მიერ სააკაშვილის შესახებ გამოქვეყნებულ დასკვნაში არსებული შენიშვნები პენიტენციური დაწესებულების კომპეტენციაა და კლინიკა “ვივამედი” პალატაში არსებულ პირობებთან და დაბურულ შუშებთან კავშირში არ არის.
“ეს პრეტენზიები არის პენიტენციური დაწესებულების დადგენილი პირობები. ჩვენი მთავარი ამოცანა არის პაციენტის მკურნალობა. მკურნალობასთან დაკავშირებით, მაგ კომიტეტის დასკვნაში ყველაფერი კარგი წერია”. – თქვა ჩხაიძემ.
