ვიოლა ფონ კრამონი: ქართველმა ტროლებმა რუსებსაც აჯობეს  – სავარაუდო დამკვეთი ოცნებაში უნდა ვეძებოთ

ვიოლა ფონ კრამონი ტროლებზე

ევროპარლამენტარი ვიოლა ფონ კრამონი ქართულ სოციალურ ქსელში მის შესახებ გავრცელებულ ფეიკ ნიუსს და დამონტაჟებულ ვიდეოს ეხმაურება და ამბობს, რომ ქართველმა ტროლებმა რუს ტროლებსაც აჯობეს, სავარაუდო დამკვეთი კი “ქართულ ოცნებაში” უნდა ვეძებოთ. კრამონმა მიმართვა საკუთარ ტვიტერზე, ქართული სუბტიტრებით გამოაქვეყნა.

4 აპრილს TV სეზონის გადაცემაში “დღის შეჯამება ნიკოლოზ მჟავანაძესთან” ისტორიკოსმა დიტო ჩუბინიძემ ვიოლა ფონ კრამონის შესახებ ისაუბრა. ჩუბინიძის მტკიცებით, ევროპარლამენტარის ქალიშვილობის გვარი გერინგია და ის ლუფტვაფეს რაიხსმარშლის ჰერმან გერინგის “გენეტიკური და სულიერი შთამომავალია.”

გადაცემის სტუმარი ასევე ამტკიცებს, რომ ფონ კრამონის საქართველოში ვიზიტების მიზანი იმის განხორციელებაა, რასაც გერინგი, გებელსი, ჰიმლერი, ბორმანი და სხვები მეოცე საუკუნის 30-40-იან წლებში კაცობრიობის წინააღმდეგ ჩადიოდნენ. 

დეზინფორმაციის შესახებ მასალა “მითების დეტექტორმა” მოამზადა, სადაც აღნიშნულია, რომ მტკიცება, რომ ვიოლა ფონ კრამონი ჰერმან გერინგის შთამომავალია, მცდარია.

“ნაცისტური გერმანიის მაღალჩინოსანს და ევროპარლამენტარს სხვადასხვა გვარი აქვთ და არ არსებობს მტკიცებულება, რომ მათ შორის ნათესაური კავშირია. ქორწინებამდე ვიოლა ფონ კრამონის გვარი Gehring-ი, ხოლო ჰერმან გერინგის გვარი – Göring-ია.“ – ნათქვამია კვლევაში.

ჰერმან გერინგი (Hermann Göring) ლუფტვაფეს (გერმანიის საჰაერო ძალები) მთავარსარდალი, ეკონომიკის ოთხწლიანი გეგმის ხელმძღვანელი და პარტიულ და სახელმწიფოებრივ თანამდებობებზე ჰიტლერის გაცხადებული მემკვიდრე იყო. მეორე მსოფლიო ომის შემდეგ, ნიურნბერგის პროცესზე გერინგს კაცობრიობის წინააღმდეგ ჩადენილი სამხედრო დანაშაულებისთვის წაუყენეს ბრალდება. მისი განაჩენი იყო ჩამოხრჩობა, თუმცა, ჩამოხრჩობამდე ერთი დღით ადრე, გერინგმა ციანიდი დალია.

“მომილოცავს! თვის ტროლის ჯილდო ამჯერად აუცილებლად გადმოგეცემათ ქართველ ტროლებს. მათ რუს ტროლებსაც კი აჯობეს. რატომ? მათ მე ჰერმან გიორინგის შესაძლო ნათესავად გამამწესეს. მსგავსი აზრი მხოლოდ მათ მოუვათ თავში, ვინც ჩემი ქალიშვილობის გვარის “გერინგის” რუსულ თარგმანს აიღებს. “გერინგი” და “გიორგინგი” კირილიცათი ერთნაირად იწერება. ლათინურ დამწერლობაში კი ამ ორ გვარს არაფერი აქვს საერთო. ისევე, როგორც, საბედნიეროდ არც მე მაკავშირებს რაიმე ნაცისტ პოლიტიკოსსა და ომის დამნაშავე ჰერმან გიორინგთან. 

მეორე Fake კიდევ უფრო აბსურდული და უხერხული იყო. ნასვამი ქალი (ბრიტანულ) ქორწილში. სიამოვნებით წავიდოდი ქართულ ქორწილში, მაგრამ ჯერ არავის დავუპატიჟებივარ. ამ ქალბატონთანაც არაფერი მაქვს საერთო. ეს კლასიკური Deep Fake ვიდეო იყო. საინტერესო გარემოებაა, რომ ეს Fake-ები ძირითადად მმართველი პარტიის მხარდამჭერების მიერ იქნა გაზიარებული. საფიქრებელია, რომ სავარაუდო დამკვეთიც აქ უნდა ვეძებოთ. ვფიქრობ, უმჯობესია ღია პოლიტიკური დისკუსიების გამართვა, შეთითხნილი ვიდეოების გავრცელების ნაცვლად”. – თქვა კრამონმა.

🧵1/3
🇷🇺Kremlin-style #disinformation in 🇬🇪#Gerogia started ridiculous smearing against me. As a @EP_Democracy Rapporteur 4 @GreensEFA, I know perfectly that combating #disinfo would be impossible without independent fact-checkers. Thanks to @MythDetector for uncovering. More👇 pic.twitter.com/3gA13Ayw3y

— Viola von Cramon 🇺🇦🇪🇺 (@ViolavonCramon) April 26, 2023

● “შეიძლება ევროპა მართლაც არ არის სათქვენო” – დასავლელი პარტნიორები ღარიბაშვილის ინტერვიუს ეხმაურებიან
● “დემოკრატიული ლპობის საფუძველი ბიძინა ივანიშვილია” – დებატები ევროპარლამენტში საქართველოზე 
● ვიოლა ფონ კრამონი: არ ვარ დარწმუნებული, რომ ქართულ ოცნებას ევროპული ინტეგრაცია სურს

მმართველი პარტიის და მასთან დაკავშირებული ტელევიზიებისა და პროპაგანდისტების გაღიზიანება 25 აპრილს, ვიოლა ფონ კრამონის ტვიტერზე დაწერილმა პოსტმა გამოიწვია, რომელიც IRI-ის მიერ საქართველოში ჩატარებულ კვლევას ეხებოდა.

“ძალიან კარგი სიახლე საქართველოდან! ქართული ოცნებისა და მისი სატელიტების ევროკავშირის საწინააღმდეგო კამპანია სრულიად ჩავარდა. ქართველების თითქმის 90% ახლა ევროკავშირში გაწევრიანებას უჭერს მხარს. ეს არის ევროკავშირში გაწევრიანების მომხრეთა ისტორიული მაქსიმუმი. ხალხმა მშვენივრად იცის, ვინ არის ნამდვილი მეგობარი და ვინ არა!” – დაწერა ევროპარლამენტარმა.

ვიოლა ფონ კრამონს წარსულშიც არაერთხელ დაუდანაშაულებია “ქართული ოცნება” რუსულ პროპაგანდაში. გასული წლის მაისში, მან კულტურის მინისტრს, თეა წულუკიანს უპასუხა, რომელიც ამტკიცებდა, რომ უცხოელების “მცირე ჯგუფს” ენმ-სთან ერთად მთავრობის “გადაყირავების” ინტერესი აქვს.

“ქართული ოცნების დეზინფორმაცია კრემლის დონეს აღწევს. ქართული ოცნება არაა საქართველო, ქართული ოცნების გაკრიტიკება არაა საქართველოს გაკრიტიკება. ამიტომ ვეძახი ჩემს თავს საქართველოს მეგობარს და არა “ქართული ოცნების მეგობარს”. შეწყვიტეთ ქვეყნის კარგი სახელის უკან ამოფარება. აიღეთ პასუხისმგებლობა თქვენს წარუმატებლობებზე.” – დაწერა მაშინ დეპუტატმა.