"ვიბრძვით მთავარისთვის" - ტელევიზიის მხარდასაჭერად თბილისში ასობით ჟურნალისტი შეიკრიბა
აქცია “მთავარი არხის” მხარდასაჭერად
“სოლიდარობა მთავარ არხს”, “საქართველოს ევროპული არჩევანი საფრთხეშია”, “მედიასთან ბრძოლას აგებს ხელისუფლება”, “თავისუფლება ნიკას” – ამ ტრანსფარანტებით, ქვეყნის ყველაზე პოპულარული ოპოზიციური ტელეკომპანიის “მთავარი არხის” მხარდასაჭერად თბილისში, რესპუბლიკის მოედანზე, ასობით ადამიანი შეიკრიბა.
აქციის მონაწილეებმა, რომელთა შორის, ჟურნალისტები, ოპოზიციონერი პოლიტიკოსები და რიგითი მოქალაქეები იყვნენ, რესპუბლიკის მოედნიდან ჯერ პარლამენტთან გადაინაცვლეს, შემდეგ კი „მთავარი არხის“ ოფისთან მივიდნენ. ისინი აცხადებდნენ, რომ ნიკა გვარამია პოლიტიკური პატიმარია და ის აუცილებლად უნდა გათავისუფლდეს.
აქცია მედიასაშუალებების მიერ მას შემდეგ დაიგეგმა, რაც 16 მაისს, „მთავარი არხის“ დამფუძნებელი ნიკა გვარამია დააკავეს.
“თქვენს გარეშე აზრი არ აქვს ჩვენს არსებობას, საკანში ცხოვრებას ჩვენ არ ვაპირებთ, ჩვენ უნდა ვიცხოვროთ თავისუფალ სამყაროში”, – ამ სიტყვებით მიმართა “მთავარი არხის” გენერალური დირექტორის მოვალეობის შემსრულებელმა, გიორგი გაბუნიამ “მთავარი არხის” ეზოში შეკრებულ მხარდამჭერებს.
- “დღეს ჩვენ მთავარი სამიზნე ვართ”. როგორ აღმოჩნდნენ ჟურნალისტები პოლიტიკური ბრძოლის სათავეში?
- დაუსჯელობა, სასამართლო, მედია და სააკაშვილი. რა წერია სახდეპის ახალ ანგარიშში
- საზოგადოებრივი მაუწყებლის ჟურნალისტები არხზე არსებულ ცენზურაზე და “შავ სიებზე”
„დღეს, როცა გახსნილია შესაძლებლობის ფანჯარა, კრიტიკული მედიის მფლობელის დაპატიმრება არის უკან დახევა ათწლეულობით ნაბრძოლი და ნაშრომი ევროინტეგრაციის შესაძლებლობისგან და დაბრუნება რუსეთში“, – აცხადებენ აქციის ორგანიზატორები.
“მთავარი არხის” გენერალური დირექტორი სასამართლო დარბაზში დააპატიმრეს. კრიტიკული მედიის ხელმძღვანელს სამი წლითა და ექვსი თვით თავისუფლების აღკვეთა მიესაჯა. მას სამსახურებრივი მანქანის ოჯახის საჭიროებებისთვის გამოყენებას ედავებიან.
ექსპერტები, ასევე, ადგილობრივი და საერთაშორისო არასამთავრობო ორგანიზაციები, გვარამიას დაკავებას პოლიტიკურად მოტივირებულად მიიჩნევენ.
აქცია “მთავარი არხის” მხარდასაჭერად
