ვაქცინაცია აზერბაიჯანში ფაქტობრივად სავალდებულო გახდა
აზერბაიჯანში ფაქტობრივად ყველა სახელმწიფო და კერძო საწარმოს თანამშრომლებს, ასევე, უმაღლესი სასწავლებლების სტუდენტებს კორონავირუსის საწინააღმდეგო ვაქცინაცია დაევალათ. 2021 წლის სექტემბრიდან, მხოლოდ COVID-პასპორტის წარდგენის შემდეგ დაიშვებიან 18 წელზე უფროსი ასაკის პირები საზოგადოებრივი კვების ობიექტებში, სასტუმროებსა და სავაჭრო ცენტრებში.
- აფხაზეთი: „როგორ დავრჩით პანდემიასთან ერთი ერთზე“
- მოგზაურობის მიზანი – ვაქცინაცია: სომხეთს ირანიდან ტურისტების ნაკადი მიაწყდა
აზერბაიჯანის მინისტრთა კაბინეტმა ცვლილებები შეიტანა დადგენილებაში „სპეციალური საკარანტინო რეჟიმის გახანგრძლივებისა და გარკვეული შეზღუდვების მოხსნის შესახებ“. ამ ცვლილებების თანახმად, ვაქცინაცია აზერბაიჯანში ფაქტობრივად სავალდებულო გახდა.
აუცრელი სტუდენტები ლექციებზე არ დაიშვებიან
მინისტრთა კაბინეტის ახალი დადგენილების თანახმად, 18 წელზე უფროსი ასაკის ყველა პირს, რომელიც უმაღლეს და საშუალო-სპეციალურ სასწავლო დაწესებულებაში სწავლობს, COVID-პასპორტი უნდა ჰქონდეს. აზერბაიჯანში სასწავლო წელი 15 სექტემბერს დაიწყება.
COVID-პასპორტი აზერბაიჯანში 2021 წლის ივნისში შემოიღეს და ორი სახით გაიცემა.
ვაქცინირებულის სერტიფიკატს იღებს ყველა, ვინც კორონავირუსის საწინააღმდეგო ვაქცინის ორივე დოზით იცრება. ამ ტიპის სერტიფიკატის მოქმედების ვადა განუსაზღვრელია.
ბოლო ექვსი თვის განმავლობაში კორონავირუსგადატანილი მოქალაქეები იმუნიტეტის სერტიფიკატს იღებენ. ეს დოკუმენტი გამოჯანმრთელების დღიდან ექვსი თვის განმავლობაში მოქმედებს. ნახევარი წლის შემდეგ, ასეთი სერტიფიკატის მფლობელები ვალდებული არიან, ვაქცინის ერთი დოზით აიცრან.
სავაჭრო ცენტრში COVID-პასპორტით
2021 წლის 1 სექტემბრიდან, სახელმწიფო სტრუქტურების თანამშრომლების სულ მცირე 80-მა პროცენტმა, ასევე, სახელმწიფო და კერძო საწარმოების თანამშრომლებმა, რომელთა სამსახურიც დაკავშირებულია მოსახლეობის მომსახურებასთან, აუცილებლად უნდა მიიღონ COVID-19-ის საწინააღმდეგო ვაქცინის პირველი დოზა, 1 ოქტომბრიდან კი ვაქცინის მეორე დოზა ან COVID-19-ის საწინააღმდეგო იმუნიტეტის სერტიფიკატი.
2021 წლის 1 სექტემბრიდან, 18 წელზე უფროსი ასაკის პირებს შეეძლებათ ისარგებლონ დახურულ შენობებში სხვადასხვა ტიპის მომსახურებით მხოლოდ COVID-პასპორტის ქონის შემთხვევაში. ასეთ დაწესებულებათა რიცხვს განეკუთვნება საზოგადოებრივი კვების ობიექტები, სასტუმროები და სავაჭრო ცენტრები.
ასევე, 1 სექტემბრიდან, საპარიკმახეროებისა და სილამაზის სალონების მომსახურების მიღება შესაძლებელი იქნება მხოლოდ COVID-პასპორტის წარდგენის შემთხვევაში.
რა გააკეთონ მათ, ვისთვისაც ვაქცინას უკუჩვენება აქვს?
მათ, ვისთვისაც კორონავირუსის საწინააღმდეგო ვაქცინას უკუჩვენება აქვს, უახლოეს პერიოდში სპეციალურ სერტიფიკატს მისცემენ QR-კოდით, აღნიშნეს აზერბაიჯანის მთავრობაში.
