უკრაინამ ბიძინა ივანიშვილს და მისი გარემოცვის 18 წევრს სანქციები დაუწესა
უკრაინამ ბიძინა ივანიშვილს სანქციები დაუწესა
უკრაინის პრეზიდენტმა ვოლოდიმირ ზელენსკიმ “ქართული ოცნების” ხელისუფლებისთვის სანქციების დაწესების ბრძანებას ხელი მოაწერა. ამის შესახებ ვოლოდიმირ ზელენსკიმ ვიდეომიმართვაში ისაუბრა. ზელენსკის თქმით, სანქციები მიმართულია ხელისუფლების იმ ნაწილის მიმართ, რომელიც “საქართველოს პუტინს გადასცემს”.
“უკრაინამ მიიღო სანქციები ბიძინა ივანიშვილსა და მისი 18 თანამოაზრის წინააღმდეგ. ზუსტად მათ წინააღმდეგ, ვინც ყიდის საქართველოსა და ქართველი ხალხის ინტერესებს. ჩვენ მოვუწოდებთ ევროპას, ამერიკას, ყველას მსოფლიოში, პრინციპულად იმოქმედონ”, – განაცხადა ზელენსკიმ.
უკრაინის პრეზიდენტის ბრძანების თანახმად, სანქცირებულთა სიაში არიან:
- ბიძინა ივანიშვილი – “ქართული ოცნების” თავმჯდომარე
- ირაკლი კობახიძე – პრემიერმინისტრი
- გრიგოლ ლილუაშვილი – სახელმწიფო უსაფრთხოების სამსახურის უფროსი
- კახა კალაძე – თბილისის მერი
- მიხეილ ჩინჩალაძე – მოსამართლე, თბილისის სააპელაციო სასამართლოს თავმჯდომარე
- მამუკა მდინარაძე – ქართული ოცნების საპარლამენტო უმრავლესობის ლიდერი
- ვახტანგ გომელაური – შინაგან საქმეთა მინისტრი
- ოთარ ფარცხალაძე – ყოფილი გენერალური პროკურორი
- ირაკლი რუხაძე – ტელეკომპანია იმედის მფლობელი
- ლევან მურუსიძე – მოსამართლე, იუსტიციის უმაღლესი საბჭოს წევრი
- ვიქტორ ჯაფარიძე – ქართული ოცნების დეპუტატი
- დიმიტრი სამხარაძე – ქართული ოცნების დეპუტატი
- გიორგი (გოგა) ხაინდრავა – პროპაგანდისტი
- გიორგი კობახიძე – ირაკლი კობახიძის მამა
- ზვიად შალამბერიძე – ქართული ოცნების დეპუტატი
- შალვა თადუმაძე – უზენაესი სასამართლოს თავმჯდომარის მოადგილე
- თეა წულუკიანი – იუსტიციისა და კულტურის ყოფილი მინისტრი, ქართული ოცნების დეპუტატი
- ირაკლი ქარსელაძე – რეგიონული განვითარებისა და ინფრასტრუქტურის მინისტრი
- კახა ბექაური – კომუნიკაციების კომისიის თავმჯდომარე
სანქციების დაწესება უკრაინის პრეზიდენტმა გუშინ, 4 დეკემბერს გავრცელებულ ვიდეომიმართვაში დააანონსა. მან საქართველოში მიმდინარე მოვლენებზე ისაუბრა.
“უბრალოდ სამარცხვინოა, რას აკეთებენ ახლა ისინი საკუთარი ხალხის წინააღმდეგ და როცა მოსკოვი აქებს ამ ხელისუფლებას საქართველოში, ეს ნათლად მიუთითებს, ვისთვის მუშაობენ თბილისში და ვისთვის შლიან საპროტესტო აქციებს. საქართველოსთვის ნამდვილად არა.” – თქვა ვოლოდიმირ ზელენსკიმ გუშინდელ ვიდეომიმართვაში.
სანქციებზე გუშინ აშშ-ის სახელმწიფო მდივანმა ენტონი ბლინკენმაც მიუთითა. ქართულ თემაზე მომუშავე ჟურნალისტი ალექს რაუფოღლუ, აშშ-ს სახელმწიფო მდივნის, ენტონი ბლინკენის კომენტარს ავრცელებს, რომელშიც ვკითხულობთ, რომ შეერთებული შტატები ემზადება მათ ხელთ არსებული ინსტრუმენტების გამოსაყენებლად, მათ შორის სანქციებისთვის.
მანამდე საქართველოში მიმდინარე პოლიტიკურ მოვლენებთან დაკავშირებით, ამერიკის შეერთებული შტატების ჰელსინკის კომისიის თავმჯდომარემ, ჯო უილსონი საგანგებო განცხადება გაავრცელა.
ჯო უილსონი სახელმწიფო დეპარტამენტს და ევროპულ მოკავშირეებს მოუწოდებს, თბილისის მერს, შინაგან საქმეთა მინისტრსა და “რეპრესიების ორგანიზებაზე პასუხისმგებელ ყველა პირს” პერსონალური სანქციები დაუწესონ.
“აშშ-ის სახელმწიფო დეპარტამენტმა უნდა დაუწესოს პერსონალური სანქციები თბილისის მერს, შინაგან საქმეთა მინისტრს და ყველა სხვა ოფიციალურ პირს, ვინც პასუხისმგებელია ამ [აქციის დაშლის] ორგანიზებაზე. მოვუწოდებ ევროპელ მოკავშირეებს, იგივე გააკეთონ.” – ამბობს უილსონი.
აღსანიშნავია, რომ 1 დეკემბერს ბალტიის სამი სახელმწიფო – ლიეტუვა, ლატვია და ესტონეთი – საქართველოში “ლეგიტიმური პროტესტის ჩამხშობების” წინააღმდეგ სანქციებზე შეთანხმდა და მალევე ბიძინა ივანიშვილი და შსს-ს მაღალჩინოსნები დაასანქცირა.
